發佈時間：19:53 2024-10-25
容祖兒（Joey）今天（25日）出席GAC E9新車發布會，獲贈全新混能七人車。她稱在保姆車上的時間比在家還要多，有了新車就像給她第二個家。除了坐車，她亦愛駕車，記得剛考獲車牌時，技術似打遊戲機，但現時已進步神速，可安心在外地自駕遊。嚟緊工作仍十分忙碌，被問到是否需要愛情滋潤？她幽默回應拍拖像落偈油（引擎潤滑油），她的引擎冇問題，只是電池麻麻，如搵到靚偈油就要，最好係高級嗰種！
獲贈「第二個家」
容祖兒即場體驗新車功能，她表示：「好開心大會話送畀我，頭先入車箱體驗，我覺得座位舒適好緊要，而且我知道呢架車有按摩功能，仲要冬暖夏涼，特別係冷氣可以平均送出好舒服，好適合我。」她還大讚新車速度快，續航又長，一年可慳番唔少油錢。最重要是她逗留在保姆車上的時間比屋企多，有了新車就像多了另外一個家。
刮花學友架車
除了坐車，她自言亦愛駕車，雖然開車技術仍有待改進，但比起當年剛考獲車牌時已進步了很多。她笑言︰「當年我嘅駕駛技術，被形容為似打遊戲機，最經典係出席梅艷芳生日會時，被相機閃光燈閃到睇唔到條路，最後刮花咗張學友架車，好在因為係朋友先唔使賠錢。不過𠵱家嘅駕駛技術已進步神速，去年我喺滂沱大雨下開車，以為自己喺度駕駛橡皮艇，但仲可以將阿Sa（蔡卓妍）安全送返屋企，肯定咗自己嘅駕車技術，我喺外地都可以安心自駕遊。」
搵高級「靚偈油」
她續稱上星期一天內分別到北京和新加坡工作，因兩地天氣差異大而患感冒兼聲沙，回港後狂睡24小時才好番好多，並直言現在的體力不及從前，要午睡讓自己「充電」。被問到是否需要愛情滋潤？她笑說︰「咁唔係充電，而係落偈油（引擎潤滑油）滋潤，我嘅引擎冇問題，只係電池麻麻，如搵到靚偈油就要，當然要搵最高級嗰種！」
明年港澳開騷
提到有傳她不會參加新一季的內地節目《聲生不息》，她澄清︰「我係長駐㗎，月尾就開始錄影。」並表示已錄好多首廣東新歌，很快便會推出市場。至於明年初亦會到澳門開騷，但明年底在香港舉行的演唱會，則未有定案，她稱很想在啟德體育園舉行。
