發佈時間：18:35 2024-10-24
男團MIRROR成員盧瀚霆（Anson Lo），工作一直繁忙，今年他嘗試放慢腳步，令生活各方面取得平衡，他更將這個生活改變融入新歌《致我》中，與樂迷分享；可惜他卻因為拍攝歌曲的MV，陷入前所未有的迷茫之中，其中沙灘Shot仲要NG咗10幾次，一個字「甘」！
延伸閱讀：《903 AllStar 籃球賽》排球熱身賽激戰 Stephy讚Anson Lo Set波好 Ian輸波話會復仇
延伸閱讀：汪明荃夠晒潮 孖教主Anson Lo跳《Hey Hey OK！》
沙灘經歷為主題
Anson Lo今年初推出的《MY LIFE》，首度搵嚟周耀輝填詞，輪到這首《致我》，他再次邀請對方幫手，將自己這個感受轉化成歌詞，「新歌靈感來自我行山或去沙灘休息時，之前我喺Social Media都有分享一啲我去沙灘嘅經歷，嚟到年尾我好想回顧一下，所以就用咗沙灘休息嘅時間，作為今次歌曲嘅主題。」Anson Lo指歌曲既是送給自己，又是送給樂迷，他解釋：「呢首歌係送畀每日喺呢個繁忙城市生活嘅人，希望大家可以抖抖氣，放慢腳步去享受寧靜，同埋搵番簡單嘅生活節奏。」
多咗時間陪家人
今年初，他亦曾許下承諾，希望可以做到Work Life Balance，他覺得自己都算做到，並說：「因為我喺工作與工作之間，花多咗時間同屋企人食飯，亦都喺放假、放break嘅日子，走上山睇下風景散下步，令到自己內心平靜咗好多。」Anson Lo以往沒有行山的習慣，在2024年，他作出了一些改變，他分享道：「自己好少有戶外活動或者行山經驗，但今年想突破下自己，發覺同大自然相處，自己會舒服啲。」
MV營造恬靜感覺
由於《致我》講述尋獲寧靜的感覺與狀態，所以MV方面亦希望營造出一份恬靜，所以需用長鏡頭拍攝無物一身輕的簡單生活，Anson Lo笑言：「MV係講我自己喺間屋入面，處於一個比較沉靜鬱悶嘅狀態，所以喺每個Shot嘅背景會愈嚟愈少嘢，直至後面所有傢俬封晒，慢慢由一個齊全屋企變成一個好簡單，甚至乜嘢都冇嘅屋企，寓意係最簡單生活嘅模式，都可以做到一個好開心同平靜嘅感覺。MV入面仲會見到一幅畫，寓意MV男主角望住幅畫好似去咗一個沙灘咁，原來回歸大自然係佢最想要嘅嘢，同埋最開心嘅Moment。」
拍攝手法好陌生
按照Anson Lo所描述，照道理MV製作應該好簡單才是，但其實不然，他續說：「今次係我拍過嘅MV中最迷茫嘅一次，因為以往係以跳舞為主，或者慢歌都係有故事情節，來得比較直接，但今次比較Moody，寓意多啲，節奏比較慢，而我對呢種拍攝手法好陌生，出道6年都冇試過用呢種拍攝方式同節奏，就算戲劇嘅演出經驗都好少。」
唔知自己做緊乜
鏡頭外的Anson Lo，時而傻笑時而皺眉，他坦言：「其實拍攝時我係好迷茫，好多時唔知做緊乜，所以要多謝導演同埋所有Crew嘅幫手，大家見到一個好簡單嘅呈現模式，但其實背後用咗超級多時間去排練，甚至我落場排之前，所有工作人員已先排一次，所以你見到每個Take背後其實都排咗10次以上，先可以做到呢個效果。」
一Take要NG10幾次
還有，屋內環境尚算容易控制，反而沙灘的場面因受外在天氣影響，於拍攝時會增加難度，Anson Lo稱：「沙灘嘅部分比我想像中嚟得複雜，因為我哋既要配合陽光走向，又要避開所有Crew嘅人影，有時轉身嘅Timing又唔太準，所以花嘅時間相當長，總共拍咗10幾Take，辛苦晒所有工作人員對完美嘅追求，因為通常嚟一次NG ，都係為咗少少嘅唔同，可能想再Wide啲或者想再Close Up多少少，大家都係想有個好啲嘅畫面，希望大家會鍾意啦！」
