發佈時間：15:45 2024-10-24
去年憑《不日成婚2》首次獲香港電影金像獎「最佳女主角」提名的衛詩雅（Michelle），昨晚於澳門舉行的第39屆華鼎獎，憑電影《破·地獄》獲得「華語最佳影視女演員」，她開心話：「呢個獎對我太重要！」問她會否增加來屆金像獎提名的信心，她亦坦言：「信心係高咗！」恭喜！恭喜！
首奪女演員獎
近年屢獲電影獎項提名的衛詩雅，今次在第39屆華鼎獎勇奪「華語最佳影視女演員」，她表現激動說：「呢個獎對我嚟講太重要，對演員嚟講，係一個肯定，亦都係提醒人哋：『我仲喺呢行㗎！大家可以搵我拍戲。』憑《破·地獄》呢套電影得到嘅獎項，即係代表大家好喜歡我哋嘅電影，所以好開心！」問到會否增加來屆金像獎提名的信心，她坦言：「感覺會實在啲，信心係高咗嘅。」
長期保持沉鬱
在電影《破·地獄》中，衛詩雅飾演一名救護員，她表示這個角色無論在體能和心理上，都有很大發揮，她直言：「喺心理上，如果大家睇過呢套電影，就會明白嗰種沉鬱，要長時間培養沉鬱嘅情緒，每日同屋企人有好多矛盾、好多爭吵，所以嗰段時間係難過嘅。」
做Gym操體能
至於在體能上亦是一大挑戰，她續說：「體能上除咗要練一啲儀式上嘅嘢，亦要做好多體能同體力嘅訓練，因為個角色係一個救護員，我好希望最貼近呢個角色，所以由嗰一刻開始，我每日都去做Gym，所以嗰段時間體能真係幾好，同埋大隻咗好多，經過呢啲訓練，之後我真係可以『稱」到個人上救護床。」
同許冠文沖涼
她最難忘的是跟許冠文（Michael）拍攝一幕洗澡戲，她稱：「Michael神喺戲入面飾演我嘅爸爸，有一場戲係我要幫佢沖涼，我記得拍攝時係冬天，好凍，所以成個劇組都擔心佢，佢反而話：『唔緊要㗎！你哋拍到OK先。』佢為電影嘅畫面同劇情需要行先，好唔錫身，我既心痛，又覺得好深刻，佢好犀利，所以好尊敬佢，喺佢身上絕對學到乜嘢叫做敬業樂業。」
驚個假髮會甩
至於方中信亦憑電影《金手指》於第三屆澳淶塢五大洲電影節金莉花獎，獲得「全球最佳男配角」，他表現得十分開心，更謙虛表示獎項並非屬於他一個人，而是整個拍攝團隊一起努力的成果。他稱最難忘是一場戲，是他被殺後伏屍泳池的鏡頭，「我記得拍嗰陣時係冬天，其實都幾凍，我都着咗潛水衣打底，其實都OK嘅，問題不大，但之後我要趴喺水面，嗰時啲水喺鼻湧入去，係呢樣嘢辛苦啲；又要孭住啲鉛帶，做到半浮沉嘅效果，恐懼就冇，因為我都有潛開水，而且導演佢哋好好，安全措施做到足，搵咗兩個潛水員喺池底Stand By，放晒啲氧氣樽，好安全，唯一係驚個假髮會甩囉，哈哈！」
