人生路，從來並非一片坦途，如何走過高山低谷，完全取決於個人態度。

51歲的黎瑞恩，樂迷眼中的「小恩子」，唱着〈陽光路上〉的她，一路上也不是邊度都有陽光。

90年代的「小花」，00年代結婚產子，10年代經歷觸礁的婚姻，胰臟還長了兩顆腫瘤；到20年代，腫瘤消失了，子女也入讀了大學，黎瑞恩仍笑着昂首闊步。

「嗰時醫生話開唔到刀，做唔到其他治療，我叫醫生俾藥我食，原來係冇藥食。我自己諗，算把啦！好多人不開心會有病，我就開心啲！既然冇藥食，就要開心啲。

「我都迷惘，但諗深一層，其實人始終要一死，係睇點死，一係早死一係遲死，係咪都係要死。我就唔好諗太多，每日都開心過，每一日都好似賺到咁。」

能夠賺到笑，黎瑞恩歸功自己的健忘，令她可無視煩憂。

「我比較開朗，可能呢頭講完，我轉頭唔記得咗，我嬲人係咁，做咩都係咁，轉頭就唔記得之前嬲乜，或者唔開心啲乜。到𠵱家年紀咁大，我就會覺得，唔會取悅到呢個世界所有人，一定有啲人唔鍾意你，我都聽唔到咁多，係咪？

「我又唔會選擇唔睇，不過有時見到啲好偏激嘅人，我會問佢，點解要咁嬲？嬲，你又傷身，但我又唔會唔見咗忽肉，係咪很傻？」

正能量滿滿，黎瑞恩也透過歌聲，為其他人的路，點起光芒。

「入行做歌手，我冇後悔！我好感恩，能夠有機會做到歌手，係一件好好嘅事。

當我唱歌，又有好多人鍾意聽，唔只係滿足感，仲可以幫到人。」

人生路上，就是需要一點光，才能照亮前面的坦途。

莫失莫忘

有一段時間，黎瑞恩經常透過網上平台開Live，以歌會知音；要現場欣賞其歌聲，最快也要等到10月中其演唱會，而這次成事，也源於緣份。

「我之前一直都想喺工作上做一啲事，但冇辦法做到，於是我選擇去休息，睇吓唔同嘅地方。所以去年，都冇10日留喺香港，但突然有人約我出去吃飯，仲問我有冇諗過開演唱會。

「我話如果Book到場咪開囉，點知真係有兩日，咁就玩吓啦！都好似好開心！」

開心，是她也是你和我生命中不可或缺的情緒，為了更盡興，黎瑞恩這次也力求完美。

「演唱會名係我改嘅，『V Union』，即係我嘅Reunion；中文名叫『恩賞』，即係欣賞黎瑞恩嘅歌。」

去年黎瑞恩少留在港，今年相對地就把工作排得「密麻麻」，到12月，她還與陳友演出音樂劇《娛樂圈夫人》。

「陳友哥哥突然打電話俾我，之前我同佢唔係好熟，但佢話，想搵我做舞台劇，我本來都驚記唔到台詞，但佢話係音樂劇，係講佢同佢太太嘅故事。

「佢俾我睇劇本，我睇完就流咗兩行眼淚，一邊睇一邊喊，好感動，所以就應承咗佢。」

一切也是她以唱歌為起點，而唱歌，是她最純粹的喜愛。

「我嗰時唱歌，只係覺得我鍾意，至於影相、做訪問，咁多嘢，喺我啱啱入行嘅時候，得嗰18、19歲，真係咩都唔識。

「譬如我出Show、表演，我會比正常人返工，收入會高一啲，但可能〈一人有一個夢想〉成功，到我下一首歌，或下一隻碟，又未必會得到觀眾認同。其實每一次出新碟，我都會有啲驚，唔知道大家會唔會接受，諸如此類。但係冇辦法，都要去面對。」

多情

今時今日，名氣帶來的「配套」，對黎瑞恩來說已是輕而易舉，就如訪問這天，一身便服的她，於鏡頭前更是駕輕就熟。

大概是經歷過可大可小的胰臟瘤事件，令本已是樂天一族的她，更看淡生死。

「驗到有兩個瘤嗰一年，我40歲，然後8年後，我48歲，有一日個胃好唔舒服，我覺得差唔多可以走了，因為好脹同好痛，我自己去醫院，醫院方面就叫我上房。我同醫生講：『醫生，我應該差唔多嘞，你幫我睇睇胰臟嗰兩個瘤係咪好大？』。

「第二天出檢查報告，我緊張的那一刻，佢話：『黎小姐，你腸胃炎喎，我見唔到有瘤。』，咁即係冇咗啦。其實我好鍾意買保險，有一份保險我一直好想買，但是我買唔到⋯⋯就係因為我有呢個病，如果真係要買，就要證明真係冇咗啲瘤，先可以受保。

「點知我到50歲真係受咗保，真係開心到不得了！我覺得是一份好好嘅生日禮物。」

收到絕佳的禮物，另一方面，黎瑞恩也樂於行善，到內地遊歷時，走訪一些偏遠地區，並捐贈物資，體現大愛。

「我冇特別扶貧，例如我要去新疆一個點玩，當然要經過一啲窮困嘅村落，但當地人都過得好開心，只係佢哋嘅生活，比較冇咁富裕。

「我會買好多物資，而佢哋好熱情，好歡迎我哋入屋，仲會請我飲嘢，我覺得我哋去到，又送禮物俾佢哋，令大家都好開心。」

如果我有事

黎瑞恩的愛，回歸基本，是理所當然的母愛，由她一手撫育成人、分別21歲與19歲的兒女，她早已對他們曉以生死大義。

「我要俾佢哋知，生老病死係一個正常人生必經嘅階段，我知道自己有兩個瘤嘅時候，解釋咗俾佢哋聽，佢哋當然有喊，但都明白有好多嘢係控制唔到，我個女同個仔都睇得好開。

「我開頭當然有啲擔心，但睇睇吓好似都Ok，所以經常教佢哋，你要自己咁、如果冇工人你要點，所以我由細到大，都要佢哋自己洗衫、學煮飯、燙衫⋯⋯咩都要識，要照顧好自己。」

自幼被好好教導，加上優良音樂基因，令現赴笈澳洲的大女Sheree，曾閃過繼承媽媽衣缽的念頭。

「佢都21歲，我管唔到佢，曾經有一刻，佢好似想入呢行唱歌，但我解釋佢聽，佢唔似媽媽，以前諗住要唱歌，喜歡唱歌就得，仲有多事要面對，面對群眾、傳媒，尤其是𠵱家網絡咁發達，有好多人會寫唔好嘅抨擊，佢可唔可以接受到呢？

「𠵱家她讀室內設計，我覺得好好，如果佢讀得好，可以幫人去裝修房屋，賺到好多錢；但如果佢幫低下層嘅人，活用一個好細嘅空間，就令啲小朋友唔使喺床上面寫字，或者令佢哋屋企多啲空間，可以回饋社會。」

黎瑞恩於2014年與前夫曾智明離婚時，一對子女只得9歲和7歲，亦令他們較同齡小朋友懂事。

「當時佢哋其實都知，仲返學同啲同學分享，啲同學好好，會安慰佢哋『唔緊要啦，我哋啲父母都係咁。』，因為離婚率太高，所以我個女又覺得冇乜嘢。不過，我都有同佢傾偈，我都會話其實爸爸媽媽都好愛你哋，但係冇辦法可以一齊相處，我哋要分開。

「人與人之間，係好睇緣份。朋友、夫妻、子女都係，有時去到一個點，行唔到落去，唔好夾硬行，可能分開，大家會更加舒服。」

陽光路上

婚姻觸礁，令她有感而發。

「我信前世今生。我睇咗一部電影《大隻佬》，睇完之後，深深感受到呢件事。可能我前世欠佢，或者佢欠我，今世完成咗，下一世唔使再拖欠，我覺得好好。童話都係呃人嘅，但婚姻唔一定係失敗，當中嘅經歷，有小朋友開心嘅時候⋯⋯但緣盡就Close File嘞。

「我冇陰影，仲係好喜歡談戀愛嘅朋友，但未搵到啱㗎啫。我覺得未必一定要有一個人，同我喺埋一齊，可能係有好多朋友。我有時都跟朋友說，不如搵一間屋，幾個人一齊住，𠵱家好流行㗎。」

走過不同的「岩石陣」，令黎瑞恩看得更開，愛情如是，生死也如是。

「我𠵱家信佛教，我都有想過自己死後會放在哪裏，我已經找了一個神秘的地方。我覺得塵歸塵，土歸土，而我嗰個地方，要見到斜陽同海；或者我有想過，會放喺煙花度，射向太空，好靚！」

一人有一個夢想

歌已唱了31年，〈一人有一個夢想〉，並非只是唱一唱那麼簡單，歌者本身，也有如你我般的夢想。

「我嘅童年夢想就係做警察，但係唔成功，當年我仲未讀完書就已經入咗行，呢個埋藏喺心底嘅夢，惟有寄望下一世。」

人生滿希望，黎瑞恩的兒時夢，至今已經過進化。

「喺我嘅餘生，我好想開一間免費食堂。喺國內，我見到有一位朋友就做咗呢件事，啲人去佢食堂攞飯，嗰啲朋友真係好窮困，可能係日日都係執汽水罐為生。

「但係嗰啲人攞完個飯，一個禮拜後會攞番一盒雞蛋返去，好似俾佢哋加餸咁樣，我覺得呢樣嘢好感動呀！」

向夢想進發，從來並非遙不可及，只要有夢想，凡事也可成真。