發佈時間：13:53 2024-10-14
香港地識揸船，還要擁有船牌的人不多，而近年開網店賣花膠、有「花膠公主」之稱的藝人謝芷倫，為了興趣，年前就考獲二級遊樂船牌，可在香港水域駕駛15米以下的遊樂船隻；之後她再進修英國課程，能在大部分歐洲國家駕駛10米以下的機動船。
有兩個船牌在手，早前她出海滑水時，就把握機會坐上快艇的駕駛席，載着友人在海上飛馳，她說：「無論是揸遊艇、快艇或賽艇，我都好enjoy 在海上航行那份無拘無束的自由感覺。」
一眼關七
跟謝芷倫談揸船，她由船隻機械、駕駛態度、天氣潮汐等，樣樣都說得頭頭是道。問她為何會考船牌，她說：「我好鍾意水上活動，有次出海見人揸水上電單車好有型，而喺香港要揸水上電單車，就要持有二級遊樂船牌，加上我希望可以有日載我爸爸出海釣魚，於是便計劃考船牌。」
她坐言起行，適逢其身邊有朋友教揸船，近水樓台的她，馬上向友人請教，「佢教識我好多理論和船隻基本機械知識，又鼓勵我考牌。當我了解過，原來只要勤力溫書，就好容易考到，過程亦唔會花好長時間，於是就膽粗粗去考咗個牌返嚟。同考車一樣，要先考筆試，再考『路』試，要揸住隻船做窄位調頭同泊位等一些基本動作。
「同陸上駕駛最唔同係，在海面上要一眼關七，留意很多唔同嘅變化，如風向、水流、潮汐漲退等，還有白天黑夜在大霧、落雨能見度低時，或遇上危急情況，都要有信心控制到隻船。」
問她有否遇過驚險事，她笑說：「記得有次在晚上駕駛一艘大型遊艇，期間拋描停泊喺海面上，但過咗一段時間，發現前面有個大黑影越來越近，睇真啲發現係座山，於是急急開船駛離現場。事後才知拋描拋得唔好，隻船就隨水飄流，如果撞上礁石擱淺就好麻煩。」
考獲船牌，更為她的演藝工作帶來一次難忘的體驗，「公司知我有船牌後，有次安排我在節目《野外步出》，跟男主持玩賽艇，雖然只係喺海上兜咗幾個圈，但速度超快，最後我仲贏咗，嗰次真係超興奮。」
滑水高手
2014年參加港姐入行的謝芷倫，2017年憑《愛回家》大小姐秘書Mandy一角成功入屋，及後轉跑道擔任《流行都巿》主持。2019年與圈外人馬志恆結婚後，更發展網上花膠生意。
喜愛運動的她，平日愛打高爾夫球和羽毛球，又喜歡滑水，「玩咗幾年，有段時間都玩得幾密，每周最少兩至三日，早上6點就喺碼頭同朋友集合，中午前回航。由夏天5、6月，一直玩到12月初。就算冬天天氣凍，我哋一樣照出海，有次着晒wet suit去玩，但我上水時，個嘴凍到變咗紫色。自己又貪玩，嫌一般花式太普通，又想做啲花巧嘢，所以會着啲唔同造型嘅衫，如蜘蛛俠、小丸子同校服等，我仲試過一邊滑水一邊跳舞。」
每次滑水，她亦會自動請纓，幫手檢查快艇，「之前去滑水，啲快艇經常發生故障，所以有船牌後，開船前我都幫手check吓水箱水溫、機器溫度，減低出海後發生故障的機會。」
雖然喜歡揸船，但她笑言不會買船，「香港船會數量少，一般都泊滿晒船，養一隻大船好貴。而快艇價錢雖然都平民化，二手幾萬蚊都有交易，但覺得租船比較方便。𠵱家我同朋友出海多數都係租船玩，每次千幾蚊，一班朋友咪開心share囉！」
