發佈時間：14:56 2026-04-06
提起中菜，印象中是老師傅的天下，但眼前的北角尚萃軒One Duck Lane總廚陳偉傑，入行逾30年，年青又風趣，CV更非常靚仔，曾任職香港喜來登酒店天寶閣的中菜行政總廚。
成功非僥倖，他認為熱愛這行業，醒目和虛心學習很重要，「做呢行冇愛好難堅持，我入行5年後，才獲准埋爐真正煮第一餐畀客人食，係炒飯嚟。」
回憶舊事，他最難忘明星走後門，經廚房入酒店出席活動。「嗰時切切下嘢，成日見到劉德華、周潤發經過，最後悔係冇同關之琳、李嘉欣、鍾楚紅合照。」機會不等人，下次唔使怕醜，影多兩張補數啦。
見慣發哥
曾帶領團隊連續7年榮獲《黑珍珠餐廳指南》一鑽殊榮的陳偉傑，去年底轉到北角的香港維港凱悅尚萃酒店闖天下，成為中菜廳尚萃軒的大廚，招牌菜京式明爐烤鴨，皮脆肉嫩。他對出品要求嚴格，「每日水準要相若，唔可以話今日得，聽日唔得，呢樣好重要。」
他歷來接待過不少名人紅星，生存之道，就是要記得他們的口味，「譬如有啲鍾意食辣，但唔可以太油，要調節佢哋想要嘅。通常第一次會撞板，唔知佢哋鍾意食乜，佢哋梗係鬧你啦，鬧完就問佢哋想點，下次就要記住。」
星級食客之中，陳偉傑樂於與李司棋分享煮食心得，「佢煮嘢好叻，佢同我講佢好為食，唔鍾意食得太清淡，炸嘢OK，仲帶屋企人嚟捧場㖭。」
入行初期，他曾在麗晶酒店當學徒，「當年許冠傑喺度搞榮休派對，好多明星出席，佢哋唔行正門，會經廚房出入，見過劉德華、周潤發等。印象最深刻係林志穎，佢啲粉絲坐喺酒店門口由朝等到晚，我收工嗰陣仲問我知唔知林志穎住邊間房，我點會知啫，哈哈！」
見慣明星，他通常會揮手打招呼，沒趁機集郵嗎？「冇喎，好尷尬，不過諗番起冇同關之琳、李嘉欣、鍾楚紅合照，都有啲遺憾。」
拒承父業
陳爸爸以前從事海味生意，子承父業，正常到不得了，偏偏陳偉傑的心思只願花在廚房，16歲就入行。
「我唔鍾意賣嘢，鍾意煮嘢，屋企人梗係反對啦！冇諗過我咁細個入行做廚房學徒。眾所周知，做中菜廚師條路好漫長，要經過十幾廿年先爬到大廚位置，當中要捱過好多磨練，唔夠熱愛嘅話，做幾年就會轉行。」
食材落入他的手，都可變出佳餚，問他喜歡入廚的原因？他笑說：「搵錢囉！呢行以前比較容易搵到工作，之後點樣發展就睇個人。而我專攻中菜，係因為中菜千變萬化，易學難精。我好享受呢份工，可以喺廚房不斷挑戰，學識好多書本上學唔到嘅烹調方法。」
由低做起，要突圍而出，他指不外乎醒目、聽話、尊重和不可偷懶。
「好多上一代師傅唔識表達，耷低頭密密做，你要醒目，幫到佢手，咁佢就會無私奉獻教你嘢。其次，我會跟兩、三個師傅學習，起碼跟5年，將佢哋叻嘅嘢，加上自己嘅變化，呢段時間要虛心。同埋唔可以因為人手唔夠等原因，簡化烹調程序，要跟返傳統方法去做，呢個係中菜最值錢嘅地方。」
薪火相傳
嚴師出高徒，陳偉傑笑言跟過的師傅都好惡，慶幸自己沒有被鬧過。「鬧你其實係想你進步，會永遠記得衰乜，但呢一代唔可以再用同一套嚴厲嘅方法去教，尤其啱啱入行嗰啲，要改為長氣啲同佢講，要教識佢嘢之餘，又唔傷害到佢自尊，可以繼續留低發展。」
做大廚之餘，要兼顧心理輔導，陳偉傑說沒辦法，「其實新一代對煮嘢好有熱情，創作又叻，唯一問題係捱唔過工時長，大時大節冇得放假出去玩，廚房又熱又嘈。」
薪火相傳，變得尤其重要。有趣的是，他升做總廚後，有前輩的兒子一滿18歲，就入行拜他為師，一跟就十幾年。由一張白紙，教到現在獨當一面。他笑說：「不斷循環，或者將來我嘅小朋友入行，由佢帶番轉頭。」
時代不同，媒體發達，從前躲在廚房煮得一手好菜就OK的廚師，今時今日多了曝光機會，要跟客人有更多互動。
「好多人問我點樣煮，落啲乜，可以令個菜式好食啲，我會話落乜唔重要，最重要落啲感情，諗住煮畀邊個食，咁會精彩好多。」
只要每一碟菜，都帶着愛去煮，即使是鹹魚白菜，也會好好味。
《東周網》訪談系列節目《星桄伴我心》4月重磅嘉賓：
即睇：《中年好聲音4》「鹿七伯」譚永浩 新秀冠軍變賣菜謀生｜戶口剩幾十蚊難受歲月｜神跡驅使愛上網紅杜小喬
立即追蹤《東周刊》全新WhatsApp頻道，緊貼全城熱話、突發猛料、獨家消息！
