翁嘉穗97年贏得港姐冠軍，未幾就做了海馬床褥老闆娘，為老公鄔友正誕下兩子。25年過去，大仔鄔謨雲在舉重界發光發亮，贏得多個世界賽冠軍。

翁嘉穗的人生，似乎無風無浪。然而幸福背後，原來她有個悲慘身世，在她9歲那年，媽媽跳樓自殺，為她的童年蒙上陰影。

今年是她和鄔友正銀婚紀念，這段緣份得來不易。翁嘉穗自爆曾經離家出走，相處日久，才開始自創一套獨門的御夫術。「我發現當我駁嘴，他就會再講多幾日，所以之後我盡量避免拗，寧願唔出聲。」

百世修得同船渡，千世修來共枕眠。夫妻相處之道，當然要慢慢磨合。

鄔友正音波功

50歲的翁嘉穗和70歲的鄔友正相愛25年，今年是二人銀婚紀念，在這個特別日子，鄔友正卻不太注重儀式感，主要還是送首飾冧妻。回望25年相處之道，翁嘉穗坦言拍拖和結婚初期相安無事，後來兩人開始火星撞地球，會為教仔等問題而嗌交。

「我發現當我駁嘴，他就會再講多幾日，所以之後我盡量避免拗，寧願唔出聲。試過有次冷戰，我搬去酒店住了幾天，他第一日冇搵我，第二日大家啲火熄咗，講番幾句，之後我咪死死地氣返屋企囉，哈哈！」

兩公婆床頭打交床尾和，何況鄔友正也有貼心的一面。翁嘉穗甜絲絲地說：「生兩個仔的時候，他主動陪我一齊住院。之前我做甲狀腺手術，他又陪我，好感動。」

提到老公最近活躍小紅書，和網民互動時，更發表愛的宣言：「緣分天注定，冇得揀！」翁嘉穗指老公講多了，但心底仍非常受落，「學他話齋，緣份天注定，鍾意他踏實、有事業基礎，對我都好好。」

對於老公狂練一字馬，既學唱歌望進軍《中年好聲音》，又學跳舞，想出戰英國黑池比賽，翁嘉穗不但沒有潑冷水，還笑說：「他的歌喉的確好咗，但距離專業水平還有距離。最近他每個星期都有練歌，最鍾意唱〈大海〉和劉德華的歌。」

問她可會考慮夫妻檔拍住上參加《中年好聲音》？她想了一想後說：「我的歌喉應該麻麻哋，因為早幾年做過甲狀腺手術，聲帶有少少冇以前咁好，音域窄咗。不過講真，我唔係好夠膽一齊參加。」

險命喪菜刀下

夫妻有得揀，血濃於水的父母親情，則是由天定。翁嘉穗在小學3年級時，已經歷失去摯親之痛。她還記得當年媽媽患上抑鬱症，有晚更把菜刀藏在身後，打算向她行兇後再跳樓。幸好婆婆察覺有異，即刻呼喝她伸出雙手，再搶去菜刀。

小小年紀的翁嘉穗，因而避過一劫，但始終避不過之後失去媽媽陪伴成長的命運。「9歲那年，媽咪跳樓，嗰刻我好驚又好嬲，唔知點算。婆婆震晒咁報警，爹哋打返屋企，我仲認錯係叔叔把聲。在喪禮上，我忍唔住控訴：『點解要丟低我？做乜要跳樓死？』」

母女緣淺，但翁嘉穗記得媽咪好錫自己，她嘆息道：「媽咪對我要求好高，後來姨媽告訴我，話媽咪希望我不要像她一樣寂寂無名，要出人頭地。好無奈，我覺得我已經做到，但她已看不到。」

翁媽媽在她沒有心理準備之下離開，相隔20年後，翁嘉穗29歲時，爸爸又突然去世，「他走前兩、三日，我們才飲過茶，他和我大仔走來走去，好正常。怎知隔日之後，妹妹打給我，話爹哋唔得，叫我趕去醫院，我去到時他已經走了。之後check番，原來他血管生咗個瘤爆咗。」

多番面對生離死別，她仍堅持要好好過生活，「可能跟媽咪30頭咁早離開有關，我覺得做人一定要經歷晒生老病死的過程，就算點辛苦都要hold on，做人先至不枉過。」

大仔舉重冠軍

翁嘉穗育有兩子，大仔謨雲今年24歲，細仔謨風9歲。相隔15年再生第二胎，原來是老公的主意。眼見昔日做功課都要勞氣的謨雲，今日在健力舉重界已贏過至少兩個世界冠軍，兼打破世界紀錄，做媽媽的她，倍感欣慰。

「好神奇、冇諗過！他16、17歲開始玩，應該有少少天份。他入了港隊powerlifting（健力舉重）項目，如果當初冇拒絕教練邀請，入埋舉重項目的話，可能奧運都有份。他成日話啲嘢好輕，試過好輕易就舉起我，細仔又會叫哥哥拋他落泳池。」

將家庭打理得頭頭是道的她，也有幫老公打理生意，令她眼界大開，發現沒有最荒唐，只有更荒唐。她苦笑謂：「內地冒牌海馬充斥，每年訴訟費過千萬。試過租舖，幾個商場都唔肯出租，原因是場內有4、5間假海馬，如果租給我們，其他幾間就會執笠。」

她又指，以前會比較多去巡舖。員工見到老闆娘出巡，有如太平紳士探監，會趁機提出訴求，「好似啲運輸夥計，他們不敢直接跟老闆講，但就會跟我講：『鄔太，點點點……』」

工作以外，翁嘉穗會打泰拳、做瑜伽等來保持少女體態，亦會畫畫抒發心情，「現在儲吓畫先，儲到一定數量，再計劃開個人畫展。我幫先生畫過素描，但就未幫兩個仔畫過，可以考慮吓。」

捱過悲慘童年，現在的她隨心生活，迎接她的，只有滿滿的幸福。

珍惜生命，防止自殺求助熱線：
香港撒瑪利亞防止自殺會： 2389 2222
撒瑪利亞會熱線(多種語言)： 2896 0000
生命熱線： 2382 0000
明愛向晴軒： 18288
東華三院芷若園： 18281
醫管局精神健康專線： 2466 7350
社會福利署： 2343 2255
利民會： 3512 2626