不知何時起，MBTI（16型人格）熱捲起，且熱力比奧運持久，成了打開話匣子名物。

「我係ESFP，表演者人格！」麗英如是說。

麗英，鄧麗英，是本地YouTube知名頻道「小薯茄」的成員之一。這只是其起步點，5年下來，她由YouTube，躍至電視、大銀幕，拍劇、拍電影、為動畫《玩轉腦朋友2》配音；又投身樂壇，去年還舉辦了個人音樂會，完全沒有辜負「表演者」之名。

「我係介乎喺ESFP同ENFP之間，E一定係膽，代表我係好外向嗰隻，哈哈！就算係感性啲，我都係匿埋喊一場，之後都會繼續向前行。」

只計今年，26歲的麗英已為自己的「愛情三部曲」推出了兩首單曲，最新的那首，叫〈解咒說明書〉。

「我曾經喺一段關係入面，被嫌棄過，我覺得被嫌棄一定唔會好受，我都經歷過自信心低落嘅時期。

「不過，最重要係自己要明白自己嘅價值，而呢個價值係由自己嚟定嘅，自己一定要愛自己。」

說到底，無論名物度有多高，MBTI跟星座血型生肖運程一樣，只供參考，實戰還是自己最可靠。

禮物

年輕的一代，有着各種「斜棟」身份，像生於1997年的麗英，身兼YouTuber、歌手、演員3職。

她坦言：「我嘅夢想係唱歌、演戲，𠵱家係夢想成真！雖然係咁，但係我都想可以一直Keep住對呢兩樣嘢嘅熱情，因為有時都會做到有啲滑椏，所以我希望可以盡量避免呢個情況出現。」

要保持初心、熱情，麗英於去年底已給自己一份習作：推出「愛情三部曲」，作為她投資於自己歌唱事業的目標。

「三部曲係講愛情嘅唔同狀態，第一部曲〈美男子圖鑑〉，係講對愛情嘅憧憬；今次嘅〈解咒說明書〉就係講緊受情傷嘅時候，自我療癒嘅過程；到第三部曲，就係開心嘅，全部都係同書有關㗎。

「3首歌都係我俾自己嘅禮物，今次直情係我嘅親身經歷，之前講過我俾人嫌棄，其中一個分手理由，係嫌棄我成日着T-shirt牛仔褲，令到我好傷心。不過，𠵱家我仲係咁鍾意着T-shirt牛仔褲。」

事過境遷，麗英就以親身經歷，既治癒自己，也安慰有類似經歷的樂迷。而情傷過後，單身的她笑言：「𠵱家仲搵緊。」

幸運

物理上，其實麗英並不孤單，與她相伴的，還有「Martin」。

「Martin係的第一支買嘅結他，我會形容係『轉角遇到佢』，喺琴行嘅轉角位，我見到佢就雙眼發光！我生得矮，所以唔啱太大支結他，佢嘅Size較細。同埋我有啲『外協』（外貌協會），佢嘅木色好靚，我係一見鍾情。」

Martin陪伴麗英走過自彈自唱拍片的日子，也是她於中學時上台比賽的「武器」。

「咁多年以嚟，我因為聽到YUI（日本唱作人）嘅〈Goodbye Days〉，開始想學結他；到中學時期，就迷上Taylor Swift，所以參加學校嘅歌唱比賽，都係自彈自唱佢嘅〈Begin Again〉。

「我覺得自己好幸運，鍾意演戲、唱歌，𠵱家真係可以做呢兩樣嘢，我嘅歌〈東京一轉〉，同啱啱講過嘅兩首歌一樣，都係對我嘅人生，有好大嘅代表性。」
喜愛J-Pop、日本、演戲、唱歌，成就了今天的麗英，但其旅途並不平坦，為追夢，她試過3次投考演藝學院，屢戰屢敗，輾轉下成了「小薯茄」一員，才見到今天的麗英。

「好彩入唔到演藝，我覺得呢啲失敗，係俾到我一個更加強大嘅心臟，去面對挫折。如果冇當時嘅失敗，我真係唔會有動力去提升自己。當時我都好幸運，遇到程人富，佢帶我加入『小薯茄』，所以我係好幸運、開心嘅。」

古怪

不只挫折，麗英的成長，還要多得鄧爸爸、鄧媽媽，與跟她年齡相差10載的胞兄。

「我細細個就古靈精怪㗎嘞，坐唔定，仲會扮《唱K小魚仙》嘅人物唱歌⋯⋯其實我迷上日本動漫，就係因為我阿哥，佢係動漫迷，所以連我都鍾意埋一份。
「爸爸媽媽都俾我哋自由發揮，我阿媽見我有咩合唱團都參加，又成日整古做怪咁，都知道我鍾意表演，佢都唔會特別逼我讀書。」

放養的威力，有時比刻意栽培更強大，家長對孩子的最低門檻，肯肯定是不學壞，麗英做到了，而且其DSE的成績，也是穩中求勝的10多分，足以交代了。

「屋企人都想我過得開心，所以成績嗰啲都唔係睇得太重，咁我都會自動自覺嘅。家用？我啱啱做YouTube嘅時候，其實仲讀緊書，所以都有喺補習社做兼職，幫啲小學生補習，自給自足㗎。

「後來收入好咗，所以我都冇返兼職，媽咪冇催我同阿哥俾家用，但係每個月我哋都識做嘅。哈哈！」

終結者

問心，這世代要「了解」一個人，IG、Threads、Wiki（維基百科）⋯⋯種種的網絡平台，可會是閣下求教的首選？

然而，當人人也可當Wiki寫手，閱讀資料時，需要抱存疑態度，有機會，要見疑即報。

一報，麗英便笑說：「我要澄清，我並唔係屏山鄧氏後人嚟㗎，只係我都為姓鄧啫，我真係唔知點解會俾人話係屏山鄧氏㗎。」

她自稱為尋常「鄧家人」後，其英文名Amy，則有補充資料。

「Amy係我嘅英文名，我由小學就開始用，係我嘅小學嘅英文老師改嘅。到我開始喺YouTube唱Cover歌，就想改一個藝名，於是我就將自己『Lai Ying』嘅『Ying』，入面嘅Y同G調轉，變成『Giny』，都係代表我。」

不分世代，要了解一個人，最好還是面對面，網上Info要消化，你唔係唔知吖嘛？

雖然，IG和Threads的訊息量，真的很高⋯