數流行經典，點止要數50年？

看葉麗儀，既是香港樂壇的代表人物，由外語到國語，再到風靡全球華人近半世紀的〈上海灘〉⋯⋯入行55年，早已是「行走的經典」。

看盡浪奔浪流，坐在風景處處的天台，76歲的葉麗儀笑言：「眨吓眼就過咗55年，我都好詫異時間過得咁快，我好幸福，可以有一個咁嘅音樂旅程。」

音樂路上，葉麗儀早於上世紀已唱遍全球；人生路上，即使於1996年患上乳癌，她也樂觀抗病，又力抵抑鬱症侵襲，面對一個又一個的挑戰，她也越戰越勇。

「𠵱家我喺事業上冇咩野心㗎嘞，只係希望盡量保持身體健康，Cancer之後，我盡量唔諗（生死），因為唔知自己幾時死，又唔會知自己點死，諗嚟好無謂。」

話畢，她頓了一頓、挑一下眉再說：「只要每日都過得充實，咁我就不枉此生，係咪？」

同時享受燦爛與平淡，令葉麗儀更加珍惜每一個明媚的風光。

感恩

為了紀念入行55周年這個大日子，葉麗儀將於8月初舉行一連兩場的《感恩55週年香港演唱會2024》。

「以『感恩』做今次演唱會嘅主題，係要感恩上天對我嘅眷顧，除咗帶我入行嘅煇哥（顧嘉煇）、霑叔（黃霑），我仲遇到好多愛錫我嘅音樂人。

「為咗今次演唱會，我要多謝我𠵱家嘅唱片Label WOW! Music，搵咗一位出色嘅印尼作曲家，嚟香港同我見面，為我度身訂造咗一首新歌〈感恩〉。加埋劉卓輝幫我填咗好靚嘅詞，我好鍾意。」

旅程的起點，是葉麗儀於1969年參加《聲寶之夜》，但她笑言：「我由幼稚園就開始唱歌，到15、6歲就參加好多歌唱比賽，我喺荃灣大，係一個『鄉下妹』，仲參加埋荃灣嘅歌唱比賽。

「第一次比賽，樂手見到我唱Gene Pitney嘅〈Town Without Pity〉，眉頭都皺晒，因為好多Chord要轉。」

入行前到初期，葉麗儀上台演唱，原來有個小秘密，「我係大近視嚟嘅，所以上台就會除咗副眼鏡，上到台就自己同自己唱，唔使睇到台下嘅人，心情係會平靜啲嘅。參加《聲寶之夜》嗰時都係，上台前除眼鏡俾工作人員，落台再戴番。

「後來就戴隱形眼鏡，到𠵱家就冇近視嘞，因為做咗白內障手術，淨係要戴老花眼鏡。」

感動

無論是「濛查查」還是看得一清二楚，站在舞台上的感覺，55年來始終如一，而背後的故事，更見動人。

「咁多年來，有好多演出都好歷歷在目。好似我喺1974年9月，喺利舞台開嘅演唱會。當年係得Diana Ross、Paul Anka呢啲外國知名歌手，先可以喺利舞台開演唱會，香港歌手，我係第一個。

「嗰日我好激動，因為我爸爸去咗睇。出場嘅時候，我喺觀眾席行上台，期間我仲抱一抱爸爸先上台，佢都眼泛淚光，諗唔到個女可以喺利舞台唱歌。」

那些年，利舞台猶如現今的紅館，葉麗儀除了率先「登頂」，還把歌聲帶到南半球。

「到1983年，有人託TVB搵我，請我去大溪地表演。原來當地有10%華人，佢哋都係鍾意〈上海灘〉！當年由香港去大溪地，要喺悉尼轉機去新西蘭，再轉多次機先到，足足要兩日。

「當地人好Nice好熱情，我去咗10日，唱咗3場，其餘時間係佢哋帶我遊山玩水，揸小型飛機去其他島嶼玩。同埋佢哋真係好鍾意音樂，食飯都有人拎住樂器，同我唱〈夜來香〉。」
 

感激

葉麗儀的音樂旅程，如寰宇風情般多姿多采，其人生旅途，就相對地平淡是福。經歷過抗癌抗抑鬱後，其丈夫David又因脊椎退化，失去左腿機能，花了兩年時間，兩夫妻才能再次一同打最愛的高爾夫球。

「打高爾夫球同音樂，係我哋嘅共同愛好。喺一齊嘅51年入面，我哋兩個相處24小時都冇問題嘅，一齊做嘢、一齊喺屋企都係。可能我哋曾經都大病過，所以會更加珍惜對方，互相扶持。
「雖然今年我好忙，要周圍飛，但係4月我老公80歲生日嘅時候，我都返咗澳洲同佢慶祝。𠵱家佢耐唔中都會跌傷，我就哦佢，要佢每日坐低、起身，每次10下，做3 Set，等佢對腳同Balance好啲，冇咁易跌倒。」

與兒子一家四口同住於一幢大廈，葉麗儀跟孫女、孫兒也十分親密。

「我細孫（14歲孫兒George）細個有Cancer，令到我哋成家人更加親密，有時我會幫手湊大孫（16歲孫女Zoe），𠵱家我抱唔到George㗎嘞，係唱吓歌仔俾佢聽。今次嚟香港，我日日都有同佢哋FaceTime，叫George gimme a kiss，即刻Gur晒。」

52年不變

變幻原是永恆，令「不變」更見珍貴。

自言由幼稚園便開始唱歌的葉麗儀，靚聲70多年也絲毫毋損，是得天獨厚，也足見其內功深厚。另一個「不變」，則是其光滑美腿，請對照攝於1972年下圖，及本訪問攝於2024年的照片，有圖有真相。

「哈哈！我唔係特登去Keep㗎！我係坐唔定嘅人，成日郁嚟郁去。打高爾夫球、踩單車、Pilates⋯⋯仲有每日都會散步。

「返到嚟香港，高爾夫球照打，係唔敢踩單車，因為我好驚啲對頭車，但就每日都拉筋動作。」

日子有功，美腿才得以保持，但葉麗儀更在意的，是保持健康。

「我見番啲同學，有幾個行路真係唔方便，又成日聽到佢哋跌倒，所以我都好小心。年紀大咗，要令腳同『忽忽』（臀部）嘅肌肉強壯，上落樓梯就唔會有問題。」

無論世事如何變幻，保持開朗豁達，才能以不變應萬變。