發佈時間：08:06 2023-08-17
小朋友潛力無限，與其讓他們放暑假宅在家打機，去旅行食買玩，倒不如發掘他們潛在的小宇宙，安排他們學習新事物，解鎖新技能。
模特兒出身的靚太陳君宜，與車婉婉、岑潔儀和Rosemary等，這個暑假就讓兒子入營接受軍訓，或學騎馬、學踩滑板、學陶瓷，有動又有靜，最緊要是全部有fun，放完電又可有得着。
陳君宜8歲仔射火箭炮
陳君宜（Qinnie）的8歲兒子鄭嵐升（Ayden）喜歡玩槍，今個暑假他主動舉手，要求去廣州黃埔迷彩軍旅夏令營受訓。
為期14天的「兵哥」生活，Ayden告別高床暖枕，要瞓木板床，每朝清晨5時起身梳洗，直踩到晚上10時才睡覺。期間他每日都要嚴守教官的指令，學操兵、練軍拳、接受戰術訓練、體驗射火箭炮等等。要做個真的漢子，一點也不容易。
Qinnie說：「囝囝瘦咗又黑咗，但體能好咗，入營前咳咗成個月啲咳冇晒。佢好多地方都有改善，例如對我好咗，可能入營時有一part係要感恩父母。佢啲普通話又好咗，以前叫佢做嘢，可能叫10次都唔願郁，𠵱家叫一、兩次就即刻做。
「同埋等佢見識多啲人，唔會驚。我個仔睇落好似好大隻，但其實好腍善，有時喺學校會被人蝦，𠵱家就變得強咗少少。」
車婉婉6歲仔馴服小馬
車婉婉結婚10年，跟他十足餅印的兒子車浚義（BBQ），不經不覺已經6歲，暑假後便會升讀小一。人仔細細的他，比起很多大人更加大膽，唔怕試，唔怕跌。
今年他其中一項暑期活動，就是首次騎馬仔。面對身形比自己巨大的馬仔「小不點」，BBQ起初有點緊張，在教練的協助下坐上馬鞍，於馬房內兜圈慢步。不過他很快已進入狀態，見到媽咪影相時，即刻鬼馬伸脷，張開雙手，事後更問媽咪：「可唔可以買隻馬仔返屋企？」
好動的BBQ，精力充沛，騎馬唔夠喉，又報名學踩滑板。落場練習前，他做足安全措施，戴齊頭盔和手腳護墊，細心聽教練講解要求的動作和技巧。那種專注受教的表情好charm，無論成績如何，都值得掌聲鼓勵。
岑潔儀大細仔騎馬仔
嫁給馬來西亞富商的岑潔儀，家中有兩個小老闆，大仔Damian今年8歲，細仔Donnie亦4歲，她笑言：「放暑假安排去玩嘅行程，比喺公司開會更有挑戰性。」
她帶着兩兄弟去到上水雙魚河騎馬仔。長高了不少的Damian，膚色黝黑，騎馬時戰戰兢兢；反而弟弟Donnie就秒速啟動輕鬆mode，一臉享受。看見兩個仔健康快樂地成長，肯克服恐懼挑戰自己，岑潔儀已心滿意足。
Rosemary5歲仔體驗拉坯
混血名模Rosemary在2015年與印度富商Jason拉埋天窗，婚後移居峇里，發展瑜伽導師事業。
近日，Rosemary帶着快5歲的大仔Hendrix，體驗拉坯整陶瓷的樂趣。陶藝可以訓練一個人的耐性，做錯一步，所有步驟可能要從頭再來。Hendrix很有心機，慢慢加水，在拉坯機上塑形整杯碟，之後更拿起畫筆，與媽咪細心地為製成品上色。沒有時下小朋友的三分鐘熱度陋習，抵讚。
