入行40年的攝影師黃永熹（Sam Wong），鏡頭下粒粒巨星。

在洛杉磯做助手時，他近距離接觸過米高積遜（Michael Jackson）；80年代回港發展，撞正香港娛樂圈的黃金時代，不少唱片封套都是由他操刀，跟「發哥」周潤發、「哥哥」張國榮、「梅姐」梅艷芳等巨星，合作過無數次。能成為攝影大師，大概總有天份吧？
「唔係啩！只不過是緣份，因為好多人成世都未必遇到自己鍾意做的事。」

做人最緊要開心，所以他沒計劃退休，一切隨意。

借相發哥研究

Sam的個人攝影展《It's About Time》，將於本月15日起在香港知專設計學院舉行，66歲的他笑言：「好友慫恿我做，而且我年紀唔細，現在不做，遲些可能不會做。」

縱橫業界40年，Sam見過不少中外巨星。當年在洛杉磯做Matthew Rolston的助手，執頭執尾，幸運地令他有機會一睹MJ的風采4次，「那時候MJ 好紅，剛推出了《Thriller》唱片，他走過來摸我的頭髮，因為他是鬈髮，喜歡我的直髮。」

84年回港發展後，他逐漸打響名堂。發哥88年推出的《12分十分吋》唱片封套，幕後攝影師正是Sam。「發哥當晚11時一落機，就即刻過來，影到凌晨5時，好professional。後來有一次幫他影廣告，傾開影相，我就借了一疊以前讀書時期影落的功課給他研究。我又跟過發哥跑山，好攞命！我唔想樣衰，死頂冇叫停，跑完後，我隻腳『打柴』了3日。」

Sam印象中的「哥哥」，好忙、好charming，「我由《側面》開始，影到哥哥《Final Encounter》封咪。他好忙，等寶麗來的短短時間，都要和經理人傾另一件事，他還撩我在跑馬地開studio呢。」

Eason操場跑圈

在80、90年代，娛樂圈百花齊放，Sam印象最深刻是幫梅姐影《金枝玉葉2》電影海報，「梅姐、哥哥和靚靚（袁詠儀），每人一張大頭黑白相，梅姐滿意呀。她最後一個演唱會的海報，也是我影，當時給她看寶麗來效果，告訴她想怎樣影，她說：『你們話事，我唔識。』我覺得她很謙虛，好尊重我們。」

Sam跟後一輩的歌手如陳奕迅（Eason）、鄭伊健和謝霆鋒，也有不少難忘回憶。「98年，在小學影Eason的《我的快樂時代》唱片封套。他化完妝，我覺得個妝『新鮮』得滯，提議跟他落操場跑10個圈。大熱天時，他好好人，冇say no。跑完後他一撻落凳，正是我想要的mood。」
影過無數唱片封套，Sam笑言不會有最滿意的作品，因為每個時間的看法都不同，人要向前望。正如他沒有後悔77年讀邁阿密大學，放棄將來做生意人的決定。

「父母要我讀business，其實我對錢唔係好有興趣。剛好見到有部相機，就學吓點用，點知一拎上手便放不低，讀完學校所有影相course都唔夠喉，咪去LA的ArtCenter College of Design再讀。」

代表出戰冰球

攝影基本功穩了，Sam開始找尋實戰機會，於是做freelance助手和接job。累積實力後，便告別將廁所當黑房曬相的日子，在ArtCenter的師姐介紹下，回港大展拳腳。

有傳Sam遇到麻煩客人或明星，會鑽進studio的角落瘋狂打鼓，他承認以前有，但現在已把鼓收起來。「要發洩㗎！現在隨和了，留番啖氣暖肚啦，都冇以前咁衝動。好多事情了解後，發覺不值得鬧情緒。」

由菲林轉到數碼年代，Sam坦言數碼太方便，「以前菲林攝影師會被尊重，但現在相好易影，後期製作又太容易，冇咗嗰種尊重、地位，仲冇咁值錢。」

攝影以外，Sam愛滑雪，又是冰球高手，06、07年曾代表香港參加亞洲冬季運動會。他笑言現在年紀大要hea玩，「通常打龍門，一、兩星期玩一次。」

他享受現在的生活，得閒幫美指朱祖兒影相，或者飛去加拿大探細仔，「做人要開開心心，學識放低。以前鍾意玩車，要跑好多數，現在揸hybrid自動波，細細架已好開心，泊位唔使煩，好慳油。」

隨心隨意，便是現在的Sam了。