砌模型看似是男生專利，但原來亦有不少女生享受砌模型樂趣。
新晉澳門女團All In的隊長蘇俏慧（Kayaku），自十年前就沉醉於砌高達模型，由最初入門高級版HG（High Grade），到大師版MG（Master Grade），再到後期的完美級PG（Perfect Grade） ，一步步向高難度挑戰，砌過連同收藏的高達模型，超過百隻，年前更獲澳門模型協會邀請，擔任模型大使兼評審。
「要砌好一隻靚嘅高達一啲都唔容易，要經過上色、組裝、打磨、劃線、再貼上水貼等，少啲耐性都唔得，但我就非常享受這些過程，因為砌模型時的高專注度，可以令我成個人完全放鬆，能將工作上的壓力消除之餘，每當完成一隻，亦為我帶來無限的滿足感。」

一見鍾情

這天訪問，蘇俏慧從澳門家中精挑細選，運來一大篋高達模型，有些砌好的珍而重之用泡泡紙包好，有些未曾開封的就連膠袋都未拆，「這批是我比較喜歡，和砌得較滿意的高達，有大有細，全部都是我的珍藏。」
蘇俏慧迷上高達，源自多年前看過動畫電影《新機動戰記鋼彈W 無盡的華爾滋》，在片中看到Wing Gundam，她一見鍾情，「大約2014年看過《無盡的華爾滋》裏的Wing Gundam，覺得好有型，就好想自己砌一隻，但後來發現Wing Gundam的部件相當多，對於新手的我有一定難度，於是我就買了些較簡單的入門版高達試砌。
「一般HG版的高達幾小時便砌起，玩了一段時間，慢慢就想砌些難度高少少的版本。不過一隻MG版的Wing Gundam，睇落好似好簡單，但砌落並不是想像中容易，部份活動的關節結構十分複雜，做錯一步，又要拆開重新再砌，還有對巨翼，分別有膠翼和紙翼，需要高技術去完成。」
她笑言每隻高達除了組裝、打磨、劃線、噴漆等基本工序，最後還有一個高難度的工序，「最困難係砌好模型後貼上水貼紙，因為這是整個模型觀感的『點睛』部份，所以要格外小心處理。水貼紙要先浸水令其變軟，用鉗子取出，再準確地貼在模型上，好多時一盒模型只得一張貼紙，稍一不慎撕破或扯斷了，就返唔到轉頭，成件事就變得唔完美。」

日本朝聖

高達在世界各地都有鐵粉，蘇俏慧自從喜歡砌高達模型後，亦成為其中一員，每當知道那裏有展覽，便會和朋友去朝聖，「第一次去日本東京台場睇1:1 的高達，見到幾層樓高的RX78，配合了燈效和音樂，仲識噴煙，我當時就好像個小fans般，喺現場大叫「嘩！嘩！嘩！」表現得相當興奮。後來那裏的RX78換成另一款獨角獸，而橫浜高達展，就臨海展出新的RX78，可以行前行後、及單膝跪地，近距離睇，視覺超震憾，我當然亦唔執輸去打個卡，同時亦買到一些限定版模型。」
她稱買高達模型，從來不看價錢，「我覺得買心頭好唔在於價錢，加上高達模型一般都只是數百元一盒，所以只要合眼緣就會馬上入手。有些限量版錯過了，唔想食炒價，就要靠模型協會的朋友幫手，他們很多時都習慣買多幾盒，以備不時之需，見我想要，都樂意原價放出。」
多年來她每次外遊，都會留意當地有沒有較特別的高達模型售賣，「日本係高達的元祖產地，款色和數量一定最多、最便宜，每次去日本我都會留意，但就唔會刻意去搵某一款。有次去泰國就搵一套紙製高達模型，除了外遊搜購，平日在澳門，我又會在舊城區的玩具店尋寶，試過買到一盒彩色透明限定版高達，不過買買埋埋好多都唔捨得砌。」

勞作高手

因為砌高達，令蘇俏慧認識了不少同道中人，「這些年來因砌模型，而令我認識到一班砌模型的發燒友，他們在工商廈租了單位做工場，有時我上去，他們會教我一些噴漆、打磨的技巧，令我砌模型的技術日漸提升。」
除了技術，她亦歸功自己一雙巧手，和自小對勞作手工的興趣和熱誠，「我小學開始，美勞課的作品很多時都攞到滿分，就連屋企裝燈、砌枱、砌櫃、鋸木、鑽牆和拉電線我都拿手，這些手藝亦間接令我砌模型時更得心應手。現在一般HG和MG版已經滿足唔到我，未來我會挑戰完美級的PG版高達，身邊好多朋友都收藏了不少PG版，但就從未打開過。在疫情期間，我一段時間因沒有工作，於是就心癢癢開了箱，但只是砌好下半身，便接到不少新工作，於是又擺埋一邊。未來日子我會慢慢砌好佢，更會嘗試在高達體內鑲燈，令觀感度提升，相信完成後擺出來，望見都興奮。」