發佈時間：15:36 2024-06-18
被譽為「最強童顏」，現年28歲的羅毓儀（Yuki），2022年憑《下流上車族》的「車蔓蔓」一角人氣急升，接着獲得無綫力捧。早前，她在剛播畢的《神耆小子》中，已成功「升呢」做女主角，出道僅5年，上位神速！事業順暢，可惜感情卻落空。兩個月前，她宣布與拍拖4年的YouTuber Mike分手。
回到昔日兩人一起共處的band房，Yuki不禁淚如泉湧：「感情邊可以話放低就放低㗎！但係我哋真係因為理念唔同，所以真係唔可以喺埋一齊。」望着手上的結他，Yuki喊得更見厲害，因為愧疚未能賺夠錢養家，難怪她的生活依然慳家。近年累積了不少壓力的Yuki，於兩個小時的訪問裏，就喊了半小時，盡情抒發！
永不服輸
2018年，羅毓儀（Yuki）於香港城大的工商管理系，以一級榮譽畢業，順理成章便朝商界發展；於是，她遠赴中山做見習行政人員，但很快就知道這份工作不適合自己。之後，在母親的鼓勵下，她投考藝員訓練班，發展自己喜愛的演藝事業，她坦言：「當年，我只係做咗見習行政人員兩個月左右，覺得好痛苦、好難受，成日問自己究竟想點？究竟自己喺度做緊啲乜嘢？我可以俾啲意見時下嘅年輕人，其實你哋只要用排除法，問吓自己唔鍾意啲乜嘢，慢慢你就會搵到自己想要啲乜嘢。」
無綫第30期藝訓班畢業的Yuki，2019年正式入行，曾經做過海量閒角。那些日子，她也有過低潮期、迷惘時：「訓練班畢業出嚟，有好多人話我個樣好細個，所以有好多機會都溜走咗，同期嘅同學有好多人都有工開；而我可能一個月只係得一、兩日開工，令到我好驚！成日問自己畢業出到嚟點解會冇嘢做？當時只要有一個月冇工開，我嘅心情就會好低落，好難捱，不停內耗，問自己係唔係做得唔夠好？」
幸好因為童年喜愛睇動漫，故事中的主角，總是迎難而上，令Yuki的性格也強大起來，她笑言：「我好慶幸自己好細個就鍾意睇漫畫，其實每個漫畫嘅主角，佢哋永不服輸嘅精神，早早就植咗條根喺我心裏面，令到我每次遇到難關，就一定要過到。雖然好大壓力，會有負面情緒，但係所有動畫帶出嚟嘅訊息，都係叫我哋永不言敗！」
2022年，Yuki在《下流上車族》中飾演「車蔓蔓」，憑着這個跳脫的角色，人氣急升，接着便獲得無綫力捧。出道僅僅5年，她已在《神耆小子》中與人氣男團LOONG 9的成員冼靖峰（Archie）有感情線，「升呢」女主角，上位神速！她分享說機會來得絕不容易：「有好多人覺得喺呢行運氣緊要過一切，我覺得唔完全係囉！我覺得努力係排第一，首先你要背好每一句對白，企好自己嘅位置，先會有人留意到你。當你講對白失誤，第一次講錯咗，人哋會覺得你係緊張；第二次講錯咗，人哋覺得你可能有啲驚；但係第三次講錯，一定係你冇準備！」
「升呢」絕招
她續說：「拍攝嘅時候，所有人都望實你，你企錯位，講錯嘢，呢啲係俾人壞印象。試問有邊個想搵一個成日講錯對白、走錯位嘅演員做戲呀？我每一次收到劇本必定熟讀；跟住開工嗰日，我必定唔會遲到，打醒十二分精神，企喺PA或者導演隔籬，因為驚自己聽唔到要埋位。因為你一行開咗，就浪費咗成隊人嘅時間，我哋做細嘅，一定要將自己做到最好，先至有人搵你開工。」這就是她的「升呢」必殺技！
可是，因為對工作的熱誠與執着，導致Yuki與拍拖4年的YouTuber Mike結束4年情。據悉，Yuki去年遠赴橫店拍攝劇集《巾幗梟雄之懸崖》，令兩人經歷了4個月的「Long D」，因此雙方的問題變得一發不可收拾，望着這個200多呎的band房，回想起昔日與男友及隊友在這裏度過的無數個深夜，Yuki不禁眼泛淚光：「係佢（Mike）教我打鼓㗎！以前我哋喺呢度，經常由夜晚坐到第二朝，我哋有6個隊友。𠵱家雖然同Mike分咗手，但係隊band仲喺度嘅；不過，大家真係好難就時間齊人再喺呢度聚集，人大咗、領悟多咗，就會不斷去改變。以前大家聚埋乜嘢都傾，例如：講吓自己嘅音樂理念、最近聽緊乜嘢歌，真係好開心㗎⋯⋯」
原本，兩人志同道合，鍾意日本動漫之餘，同樣熱愛音樂；而他們的樂隊叫MochiIce，Yuki負責彈結他，Mike則擔當鼓手。兩人還共同經營網上頻道，分享生活片段，她坦承：「畢竟大家都一齊咗咁多年，已經培養咗默契，真係好難搵到一個咁樣嘅人，而且佢係我喺未入行之前已經認識，當然係唔捨得啦！不過，大家真係價值觀差距太大，入咗行之後，我都轉變咗好多。其實，我哋係分開咗一段時間，情緒平復咗，我先正式話俾大家聽分手，估唔到我𠵱家每一次提起都忍唔住喊，我真係唔想再講。」
雖然Yuki已經單身了一段時間，但她直言暫時不想拍拖了：「如果我𠵱家拍拖，大家開始咗，然後我同對方講，我要開工唔得閒，你話幾唔負責任呢，咁樣傷到人哋係作孽嚟㗎！我好想話俾大家聽，我入嚟娛樂圈，係想喺呢個圈有作為，攞啲成就，唔係想入嚟釣金龜，所以我冇諗過要搵啲乜嘢有錢老公！我係一個極度冇安全感嘅人，好勝又唔輸得，我係好想自己搵錢養家，即使將來生小朋友，我都係要諗自己有冇錢養，有冇時間陪伴佢，我先會去生。」
在兩個小時的訪問裏，Yuki喊了半小時，一提到家人又聲淚俱下，望着手上的結他，她愧疚的說：「記得今年嘅年三十晚，我因為彈結他搞到隻手腫晒，屋企人叫我行花市，我就將支結他丟咗出廳發脾氣，𠵱家諗番，我真係覺得好內疚！」接着，她又說：「到𠵱家為止，都係屋企人養緊我，記得我拍緊《神耆小子》嘅時候，經常凌晨4、5點先返屋企，嗰時一入到屋企，全間屋都係着咗燈。原來佢哋喺度等我返屋企，嗰種溫暖嘅感覺，真係令到我好想喊，所以我真係好多謝屋企人！」
Yuki覺得自己每天都給愛包圍，但就相當愧疚自己仍未能賺夠錢養家，所以即使已「升呢」做主角，她依然生活慳家！
