不是人人也可毫無代價唱幸福的歌，回歸最基本，幸福，是要自己爭取的。
今年6月13日便48歲的小肥（徐智勇），轉眼已在香港入行17年，名曲遠的有〈寵物〉、〈時光機〉；較近的還有〈負親〉、〈高登歌〉等，但就一般樂迷而言，還是停留在最前者的層面。
「𠵱家仲有一兩首呢類嘅歌，喺香港歌手嚟講，係幸福嘅。雖然我有一個時期，好抗拒唱〈寵物〉，呢個階段大概都有兩、三年，因為我想變，而且當時我仲未識諗，要對自己嘅舊歌，懷有感恩之心。」
試過心灰意冷，躊躇不安之時，小肥赫然迎來令他茅塞頓開的時機。
「以前我好在意人哋點睇我，但人哋點諗，我係永遠唔會知。喺最灰嘅時候，我會諗究竟要點做先好呢？一路靠自High式咁做，好似唔合乎經濟效益，但根據我嘅情況，真係戒唔甩唱歌嘅，就要頓開咗之後，先至可以主動啲做落去。
「第一次頓開，係4年前我『出櫃』之後，識得對自己好啲、愛自己多啲，對人都真誠啲；第二次係兩年前，我開《撐小肥演唱會》，有一Part係我自由發揮嘅，我記得當時講過，『我𠵱家得15分啫，我要向100分進發！』。」
隨意撥着結他，這刻的小肥，仍然向着100分進發，隨心高唱真我，是真正的幸福。

「變態」下半場

雖說小肥於香港出道17年，但生於長於澳門的他，早於2014年已於當地出道，20年轉瞬即逝，他笑言：「人生就係咁樣，好多嘢到𠵱家仲係記憶猶新，好多唔開心嘅我都唔記得，但開心嘅就仲係歷歷在目。」
經歷蛻變，小肥也為即將舉行的兩場演唱會，命名為《完全變態演唱會2024》，他解說：「唔係鬧人用語嚟，『完全變態』係我讀書時喺科學堂學嘅學名，講毛蟲破繭成為蝴蝶，好啱用嚟形容𠵱家嘅我。」
說到演唱會，他表示會予人耳目一新的感覺，「個Show分兩Part，上半場就俾眾人比較熟悉嘅小肥，但都有少少癲癲哋嘅；下半場就完全變態嘞，係『歌舞昇平，花枝招展』！我以彩虹其中6隻顏色，除咗青色，製作咗6首新歌，每首歌代表一種顏色，都係偏輕快嘅歌。」

出櫃驚魂錄

保持追夢的新鮮度，也是小肥褪變後的正面產物，而褪變的起點，要回到2017年。
「當年我出咗隻碟叫《睡前服》，係一個做一隻碟療癒自己嘅Project。當中有一首歌（〈內外〉）係盧凱彤寫俾我嘅，係好內心、有少少透露我係Gay嘅元素。
「當時歌曲監製叫我唔好唱一套做一套，因為之前有記者問過我係咪Gay嘅，但我否認咗，咁唔通我再開記者招待會講咩？於是我承諾，之後再有人問嘅話，我就認囉。」
一個給自己的承諾，要到2020年才兌現。「我上大師（陳志雲）嘅訪問，佢問我，我就喺訪問中段認咗，之後我咪喊嘅，啲人以為我感動，其實我係驚到喊，哈哈！我返到屋企都仲驚緊，平時個節目係Live嚟，咁啱我嗰次係錄影，錄完一個禮拜之後先出街，所以有一個禮拜時間俾我，好似去交代身後事咁。
「我有諗過好冇打番俾志雲大師嗰邊，要求嗰段唔好出街呢？但最後都係由他去吧，然後就同啲朋友交代，特別係啲Artist朋友，我唔想佢哋俾記者問到，都唔知發生咩事。」

多得「五姑娘」

有指他出櫃後多了桃花，但小肥笑言：「我出櫃前都有㗎，但唔係我鍾意嘅類型，唉！我年紀越嚟越大，就吸引埋啲小朋友（一笑），但我鍾意年紀大過我嗰啲，成件事好矛盾。」
過去經歷3段戀情的小肥，坦言現在享受單身生活，全因為怕煩。「我第一個情人係周柏豪都見過嘅，第二個係最了解對方嘅，仲拍咗10年拖，第三個係台灣男友，都好遷就我嘅，但都頂唔住我，加埋疫情，最後就不歡而散。
「不過，我同第二個男友就變咗好似親人咁嘅關係，我當佢係終生伴侶，但唔係情人。如果要再搵一個，再要適應多幾年⋯⋯唔好嘞！好煩！」
在製作新曲的過程中，他就被藍奕邦質疑過其「單身思想」，「藍奕邦幫我其中一首歌填詞，我哋約咗喺酒吧度傾，佢都有問我嘅愛情觀，我都係話我唔想談戀愛，佢話人生總有（生理）需要，咁我點？我話『五姑娘』（自慰）囉，所以首歌就係講『五姑娘』嘅！」
話畢，訪問場內響起一陣掌聲。

被鋪排理財

事業、愛情也可隨心而行，小肥的財務安排，則好像一早已有安排般，讓他可順勢行事。
問他理財能力時，先得到秒速肯定回應：「差！」旋即補充：「𠵱家稍為好啲啦，因為有個契機，令我喺2017年喺香港置咗業，呢個係一個好好嘅儲蓄，因為我點爛花都好，仲有層樓揸手。」
說到「契機」，可算是一匹布：「我爸、我媽喺澳門買咗樓，係佢哋同我、兩個家姐，仲有阿嫲一齊住嘅，隨住家姐嫁咗、阿嫲同老竇仙遊、我又去咗香港，淨番我媽住。層樓係唐樓，要行5層樓梯，老人家行樓梯唔得，喺屋企睹物思人又唔掂喎，所以我哋就賣咗層樓，用筆錢買咗個有𨋢嘅單位。
「之後新單位個業主又𠼮我哋租番層樓俾佢，而當時阿媽住咗喺大家姐度，我哋就租俾原業主兩年。喺呢段期間，我媽整親腰骨，突然間咩都做唔到，之後就腦退化（認知障礙），後來就要姐姐湊嘞。」
小肥稱徐媽媽現已缺乏自理、言語能力，為方便有人隨時照顧，便入住護老院，他跟兩名胞姊也會定期探望。
「我同家姐商量過，就賣咗澳門嗰層樓，而同時又因為公司有人退股，多咗另一筆錢喺手，然後我個『親人伴侶』就提議，用筆錢喺香港買樓，唔使租樓住。我就用咗888（萬）買咗𠵱家香港呢層樓，四四正正㗎，𠵱家都冇乜點貶值，以前舜燕姐（梁舜燕）都係住嗰度。」
順水推舟下，小肥在港成了業主，他坦言：「𠵱家嘅收入，我叫公司轉一半去我香港戶口供樓，另一半就係俾我日常開支。」

由93到75

阿爺輩早早教落，「唔怕生壞命，最怕改壞名」，原名徐智勇的小肥，以這藝名行走江湖多年，最初亦是人如其名，肥嘟嘟Cute Cute哋，如今則面尖尖，原來背後有一段故事。
「我由93kg跌到𠵱家75kg，但縱使係93嘅時候，我不嬲都有Keep住運動，但磅數都Keep住喺88、90，真係要大幅度跌，係要靠埋飲食嘅。
「我嘅運動量其實係多嘅，打拳、跑步、游水同做Gym，一個禮拜5日，講緊係我肥嘅時候都係咁。不過，我照樣食好多，即係我呢頭做完運動，嗰頭就食九大簋，咁仲衰！」
突破終在2022年出現，「有朋友話Sponsor我食生酮餐，咁Sponsor梗係試啦！我食咗一個禮拜已經見效，兩個禮拜就跌得仲快，一個月直情係嘭嘭聲咁跌，因為我運動量照去，冇減過。」
身體很誠實，現在小肥也持之以恆，「其實我都頂唔住生酮嗰隻肥，所以𠵱家我由初期零糖零澱粉加埋生酮，到𠵱家淨係戒糖戒澱粉，磅數都照落，但係冇咁快。」
後天努力，不但能改變命運，就小肥而言，其藝名已代表了樂壇一個世代，即使人、名不符，大概不會有人介意吧。