雖然不是英雄 伍允龍

英雄，不一定是舉世仰望、平地一聲雷那種。
像伍允龍，7歲便移居芝加哥，繼而隨父、舅父習武，喝港產動作電影的奶長大，即使大學修讀平面設計、藝術教育碩士畢業，也無阻他隻身返港，追尋動作電影夢。
「喺美國教咗1年書，都係想返香港試吓，做老師咩年紀都做到，但演員唔係。當時我有個做武術家嘅夢想，始終由細練功夫練到大；又會幻想如果有一日，可以喺銀幕好似大哥大（洪金寶）、成龍咁就好嘞，就算喺佢哋側邊俾佢哋打嘅，都已經好開心！」
回港的那一年，是2001年。
23年來，46歲的伍允龍除演員外，還當過替身、武師，戲份逐步逐步的增加，當主角、武術指導、武術導演⋯⋯默默耕耘。
直至最近，港產動作電影《九龍城寨之圍城》中「王九」一角，令他人氣暴漲。浮誇的造型、乖張的行徑，演起來入木三分，也令他謝票時被觀眾挑機。
「我Spend咗咁多年做武師、替身，跟住做動作指導、動作導演，呢個經歷令我有𠵱家嘅技術，係要鋪排嘅。如果早啲俾呢個角色我，我都未必Handle到。
「如果最初我留喺美國教書，我可能會組織一個好開心嘅家庭、教吓功夫，但我應該會有遺憾。𠵱家做到今時今日，我係冇遺憾嘅。」
無憾，比做英雄更難；不說你不會知，伍允龍這記飛身一踢，是帶傷上陣。不會說謊的根底，加上日積月累的信心，英雄與否，已無關痛癢。

成就解鎖

「王九」掀起熱潮，本尊伍允龍被安排接受的訪問，一個接一個，問他本刊為第幾個「幸運兒」時，他先想一想，然後還是一臉問號說：「我都唔知，哈哈！」
有緣參與此大製作，他先感謝導演鄭保瑞，「我好鍾意阿瑞嘅作品，直情係佢Fans！不過最初佢只係搵我傾偈，到第3次見面，佢發掘到伍允龍係咩人，先至話搵我做『王九』呢個角色，仲問我介唔介意做反派。
「我心目中嘅演員，係冇形象嘅，所以咩類型嘅角色，我都願意去試。導演好快安排我去試造型，一睇到自己着咗啲咁浮誇嘅衫、留晒長髮、戴副咁嘅眼鏡同黐咗啲鬚，其實我大概都諗到『王九』係一個自卑變自大嘅人。」
造型以外，這次的演出令伍允龍感覺新鮮的，還有：「平時拍動作片，我主要係諗動作，點樣去表現自己嘅功夫，今次完全唔同，當摸索到點演嘅時候，就算係拍文戲，最好玩嘅係，導演會叫我俾5個演繹方法佢揀，所以我好期待每日開工。」
多次身兼演員、動作導演的他，這次只擔任演員一職，但他笑言：「我同Kenji sen（谷垣健治，《圍城》動作指導）識咗20幾年，今次係第一次真正合作，佢好好，有時排一啲場景，好似四子對王九嘅Ending，都有叫我一齊討論，而且佢好Open，都想拍出演員最好嘅一面。
「最初我去荷李活，第1部戲做動作指導（《龍之誕生》），好多嘢都唔識，Kenji sen係毫無保留咁教我，話我知點同人傾嘢、價錢，所以佢好值得信任。」

一世朋友

這次歷時4個多月的拍攝，令伍允龍多了林峯、劉俊謙、胡子彤及張文傑等「兄弟」，而他於圈中最歷史悠久的「兄弟幫」：安志杰及吳建豪，也是他於20多年前拍《少年阿虎》結下的緣份。
「有呢班好兄弟，絕對係一個Blessing（祝福），好感謝主！我遇到嘅都係好人！我哋拍動作片，同打一場仗冇乜分別，會受傷、會好辛苦，觀眾唔知你拍咗50個Take，所以每一個take，都要好似第一個Take咁生猛。
「所以有班兄弟一齊面對呢個困難，出到嚟都好容易成為好朋友，因為我哋係戰友嚟㗎！」
拍出足以維繫一世的好感情，所以伍允龍不會跟好兄弟安志杰、吳建豪比較高低，「我哋入行時間差唔多，不過3兄弟嚟講，我嘅路係走得長啲，但都係一個過程。
「但我睇番自己嘅事業，最大嘅轉變，係簽咗晶哥（王晶），佢俾咗好多機會我，做主角之外，仲做動作導演，增強我嘅信心。繼而係2016年，我拍咗《城寨英雄》，對我事業有好大影響，一步一步咁上。」
現時伍允龍跟編劇呂冠南成立了工作室，參與《圍城》宣傳前，他才完成兼任演員、動作導演及監製的新作《無名火》。
「𠵱家我嘅夢想，都係製作自己喜愛嘅動作電影，分享俾其他人睇。」

伍家秘方

自小習武的伍允龍，除了以硬橋硬馬真功夫，繼續努力實現其動作電影夢，其實他還有一些隱藏技能：漫畫、打機跟烹飪。
「我自細就好鍾意睇漫畫，MARVEL、DC，同電影一樣，漫畫都係一個途徑去講古仔，所以我大學先讀平面設計。
「以前會同班兄弟一齊打機，但係𠵱家啲兄弟姊妹都結晒婚，生晒小朋友，除咗我。」
那何時愛神會降臨到伍允龍身上？「我都想知呀！不過年紀越大，就越會奄尖少少，意思係，我搵緊個永遠嘅對象吖嘛，唔係女朋友。
「想永久嘅，都要夾嘅。我覺得每一個關係，都係由朋友開始，先慢慢了解對方，咁係比較實際。我個妹都係未結婚，唔知係咪我哋家傳係遲婚呢？哈哈！」
伍家家傳的，遲婚是未知之數，但伍媽媽的釀茄子，就肯肯定是不外傳的秘方。
「我媽咪嘅釀茄子、青瓜，係佢嘅Recipe（食譜），我記得我阿爸嗰時做會計，有次帶咗我媽整嘅釀三寶Lunch返公司，佢個老外老細試咗，話係自己人生最好食嘅嘢。我好深刻，所以就學咗。」
伍家兩老之前為了參與愛子傾力演出的《圍城》首映禮，專程由美國飛來香港，這個母親節，伍允龍就可跟父母在香港慶祝，共敘天倫。

同居蜜友

即使「枕邊人」的位置仍在懸空中，但伍允龍並非Walk alone。枕邊沒有人，但有跟他相伴10年的愛犬Emme。
說起愛犬，他的表情更見柔和：「我好錫我隻狗㗎，今年10歲咯！但佢個樣仲好似BB狗咁㗎。」
他還以「愛人」形容Emme：「佢係Lover！返到屋企，有個錫我，又唔會Judge（批評）我嘅生命喺度，其實係好開心嘅！」
早已是愛狗之人的伍允龍，回港時未有再養狗狗，令他有再愛的衝勁，是其好兄弟安志杰。「Andy養咗隻約瑟爹利，有一年佢成日出埠，就送咗隻狗喺我屋企，喺嗰幾個月入面，我知道自己應付到，就同所有朋友講，我都想搵一隻。
「咁啱有個朋友見到有個Shop有約瑟爹利，就叫我去睇吓。我一見到佢（Emme），好細隻，隔籬有幾隻大啲，好似蝦佢咁嘅，我就知係呢隻嘞！」
伍允龍的一見鍾情，至今已是Emme的天長地久，他笑言：「本來我想叫佢做Emma，但都係Emme得意啲，Emme反轉都係Emme，哈哈！」
物理上懸空的位置，Emme輕易地把伍允龍心靈上的空位，填滿了。