人生勝利組，不需要贏在起跑線，路遙才知馬力，豐富的閱歷能轉化為實力，走過高山低谷，方為真正的笑看人生。
上述各項照字面解，貌似輕而易舉，確實領略箇中奧妙的，是75歲的李琳琳。
61年前從影的她，是上一代的花旦，事業如日方中之際，跟當時同樣炙手可熱的姜大衛成婚，到90年代移居溫哥華，便絕跡幕前演出。2011年，她患上大腸癌，在丈夫、兒女的支持，加上樂觀正面的態度，成功對抗病魔。
今年，李琳琳除了慶祝與丈夫的金婚紀念，還復出幕前，當中電影《從今以後》，更是話題之作。
「2023、2024年，我都好滿足，因為我都冇諗過會再喺幕前出現，雖然我再出現番，唔係一個好大嘅篇幅，但係對我嚟講，係有收穫、有得着嘅。
「我係好幸運嘅，我覺得上天唔會特別眷顧我，幸運嘅，生活過得舒適、冇乜病痛；但當有唔如意，或者身體出現狀況，就要接受，搵方法去抵銷佢。」
雖說戲如人生，但李琳琳跟丈夫愛足半世紀，戲劇化從來不是必需品，「我哋係好幸運嘅，好似日日都慶祝緊50周年咁，彼此係一個習慣、一個需求。」
做人道理，從來都要親自領會，且看李琳琳這個教科書「案例」，能讓你有多少感悟？

突破角色

闊別幕前演出30多年的李琳琳，今年即「雙響」復出，先有她參演的Amazon美劇、妮歌潔曼（Nicole Kidman）主演的《Expats》，再有她瞓身宣傳的電影《從今以後》。
訪問這天，是電影的宣傳，本刊已是第4間傳媒的「尾圍用膳」。問李琳琳可有疲憊之感，精神奕奕的她即表示：「冇！因為幫呢部戲係好值得嘅！今次好難得有一個咁嘅角色，我都好開心可以同呢個團隊合作，佢哋都好專業、好敬業樂業。」
戲中李琳琳飾演的同志角色，但她最初的猶豫，並非源於角色。「接呢個戲，我並唔介意角色係咩性取向，做一個演員，係要嘗試唔同嘅角色，我覺得呢個角色，可能係一啲演員從影生涯入面都未必會遇到。不過，導演搵我嘅時候，我係猶豫不決嘅，因為我驚自己成30幾年冇喺幕前正式演出，會生疏、會Out咗，駕馭唔到角色，個心好戰戰兢兢。」
跨過心理關口，全靠相伴50年的枕邊人，「導演係透過阿John（姜大衛）搵我嘅，喺我猶豫嘅時候，我老公就話：『做演員就好似吸毒咁，好難搣得甩（戲癮）㗎！既然有人撩你，你就會心思思想復出㗎啦，咁不如你拍啦，你又咁鍾意呢個劇種。』，我覺得係嘅，於是就接咗嘞。」
戲中的李琳琳較剛強，她笑言，自己也並非弱女子。「我嘅個性唔係好柔情或者好嬌嘅，雖然我個人就細細粒（約5呎2、3吋），但係我都幾硬淨，唔會拖泥帶水。」
自有主意的李琳琳，在接拍另一作品《Expats》時，也有心大心細的時候。
「本來係我個仔姜卓文去試鏡嘅，但佢要拍片俾導演睇，我就喺屋企個廚房同佢拍，講劇嘅對白，我只係Hea住演。點知後來佢同我講，導演冇揀佢，但揀咗我喎。
「我本來都話唔拍㗎，但係導演又對我情有獨鍾，加埋有一個好好嘅價錢，我就拍嘞！我個女幫我個角色改咗個英文名，叫『Sodiasm』，即係掃地阿嬸，因為佢係一個清潔女工。」

示愛宣言

劇集要赴美進行拍攝，惟當時李琳琳家中未有成員能陪伴，而且當時正值疫情需要隔離期間，姜大衛曾表示，十分擔心愛妻。
「因為我不思長進拒絕學新嘢，所以好多新科技都唔識，佢哋就寫低晒點Set wifi同其他嘢俾我，我再喺屋企練習好多次。而且我有成幾十年都冇試過自己一個人搭飛機，所以阿John會擔心。」
擔心是關心的表現，看姜大衛早前奪得金像獎「最佳男配角」時，於台上發表愛的宣言，借獎贈妻作為二人結婚50周年的禮物，就知李琳琳在其心目中的地位，無可代替。
「哈哈！我都估唔到佢會喺台上咁講，雖然係肉麻咗啲，不過我都好開心嘅。因為阿John唔係鍾意講嘢嘅人，我諗佢同我算係講得最多嘢㗎嘞，係好Surprise嘅。
「佢好簡單，唔係諗太多嘢嘅人，先可以容忍到一個咁嘅老婆。我又唔識煮飯、唔識做家務，又唔係一個賢妻良母，佢可以容忍我50年，真係唔簡單！」
話畢，到她向老公示愛：「阿John，我好多謝你，容忍咗我50年。」
李琳琳坦言，兩人共度這半個世紀，是經過不斷磨合才可。「以前我好注重儀式感，一啲特別日子，會寫定張咭，等到（凌晨）12點先擺喺床頭，但係佢睇完只係『哦』，就擺低張咭，我就嬲到咕咕聲。
「後來我俾佢訓練到乜都唔做，就風水輪流轉嘞！𠵱家有咩節日，係佢會買花，夠鐘就錫我一啖，講Happy birthday，我先知原來係自己生日。」

為母方知

相伴50年，其實當時的李琳琳走得很前，是奉女成婚的代表，「唔好學我呀！我覺得既然我哋有咗BB，就要對佢負責，阿John就向我求婚，就咁話：『我哋結婚啦！』，唔浪漫㗎。」
為人母後，她才明白年輕時媽媽為自己深夜歸家候門的原因。「做咗媽媽，先知道對仔女嗰個牽掛有幾大！我老公都叫我唔使等佢哋門，但我唔得；有時又會詐詐諦諦打俾佢哋，問佢哋幾時返屋企。
「𠵱家個個咁大個，我都會擔心佢哋揸車，又會打俾佢哋，叫佢哋小心啲。」
親情是雙向的，李琳琳跟3名兒女，還有女婿們、未來新抱及一眾外孫，感情要好。當2011年她被診斷患大腸癌後，他們也是她抗癌時的精神支柱。
「我好好彩，阿John同啲仔女都好照顧我，年紀大咗，身體冇咁硬朗，但我個人比較樂觀，所以都過得開心、充實。
「當醫生同我講嘅時候，我冇怨點解係我，生老病死係人嘅必經階段，當輪到我嘅時候，就要聽醫生建議囉。」
成功抗癌多年，李琳琳笑言，現在體重維持在90磅以上，希望可以再增磅。「我冇節食㗎，我都好想肥，因為我都覺得自己過瘦，但奈何我好唔容易儲肥咗兩三磅，又會一下子有啲唔係好舒服，就會瘦番3、5磅。
「𠵱家年紀咁大，我啲仔女、我老公都知道，我嘅身體係弱啲，所以佢哋個個都希望我食多啲嘢，我都係。」

飛女解密

「飛女」一詞，不是歌曲，是上世紀形容不按正規生活的少女，常見於粵語長片。
「年輕嘅時候，我係飛女嚟㗎！」李琳琳笑着說。
「嗰時被稱為『飛女』，有啲係好前衛嘅，會啪LSD迷幻藥、隊草，或者男女關係好混亂⋯⋯但係我呢班呢，就係『香港仔海鮮』，晚晚隻隻（歌）跳，音樂一起，我就出去跳舞！」
看着李琳琳，難以想像她隨着節奏做勁舞Dancing Queen？由於時間關係，請以上圖作參考。
「因為我都年輕過、都經歷過，所以我都好少鬧我啲仔女，不過我係嚴厲嘅，所以佢哋都唔敢駁嘴，哈哈！」
不論粵語長片年代，還是現今數碼化年代，「飛女」變成嚴母，威力仍是強大。