人生，練習、課題不斷，跟自己和解，是重新找到自己的重中之重。
能稱得上重中之重，自然不能一步登天，像54歲的林曉峰，21歲入行，是DJ、主持、演員；電台、電視台、電影，均可見其身影。滿滿的入屋度，惟他到51歲，才發掘到自己的新夢想：當歌手。
「喺內地做《披荊斬棘的哥哥》，之後做《聲生不息》，本來我一直都好想唱歌做歌手，咁都可以夢想成真！同時我好感恩，因為咁令更多人留意到我。
「一直以嚟，我做嘅嘢未必有好多人留意，但我係一步一步，跟住自己嘅節奏去做，就係等一個機會，好好把握做好佢。」
把握良機，重新找到自己，現已是Solo歌手的林曉峰，還為自己的首支單曲〈曾經被遺忘的人〉，親自填詞，自己心情自己寫，為其今周於廣州舉行的巡迴音樂會打頭陣。
「呢首係一首同自己溝通和解嘅歌，我用咗3日去寫。以前所有嘢都好趕，根本唔會有同自己溝通嘅時間，直至疫情嗰幾年，喺隔離期間，我終於經常有獨處嘅時候，可以思考自己嘅人生。
「我發現，原來咁多年嚟，我都曾經遺忘過自己，亦都曾經驚俾人遺忘，就算𠵱家已經成為過去，我都想鼓勵自己同埋其他人，可以豁達做人。
「𠵱家喺我嘅世界入面，所有嘢都係有兩面嘅，有啲人聽我首歌，好似好滄桑，但其實係一種笑看風雲，再積極面對自己嘅人生。」
即使做人習作多，只要隨着自己的步調，從不完美中學習，要笑看人生，不難。

古董的寶藏

這3年來，林曉峰以全新的身份示人，拿起「歌手的咪」，走遍內地獻唱，還得到「寶藏歌手」的稱譽。訪問這天，他正積極為即將舉行的巡迴音樂會準備，喝的是養生的暖水，但一聽「寶藏歌手」，他的搞笑硬件便立即啟動，「寶藏？即係喺寶藏入面，發掘古董啦！」
古董也好，寶藏也罷，也經過歲月的洗禮，價值可以不菲，跟他的經歷一樣醇厚。曾跟「古惑仔」、「大灣區哥哥」一同開騷的他，終於可獨享舞台，上月他宣布由廣州出發，再於深圳、順德及東莞舉行4場《想你的FENG吹到了⋯》音樂會後，內地網友旋即大表支持，林曉峰坦言，是夢想成真。
「我一直都好想唱歌，叫我『寶藏歌手』，我係好感恩嘅，咁樣令多啲人留意到我，仲有機會出我入行以嚟嘅第一首單曲。」
歌曲名為〈曾經被遺忘的人〉，林曉峰除親自填詞，把這些年的經歷譜成音階，曲中的一段口哨，也是由他傾力吹奏。
「首歌係鄧智偉寫嘅，錄音嘅時候，佢想我喺間奏部分做啲嘢，原來係『啦⋯啦⋯啦⋯』，後來我提議吹口哨，感覺會自在啲。」

香港第一人

以歌手身份活動3年來，林曉峰絕不欺場，這3年間，其歌聲響遍內地，而初時他增添歌手身份時，令不少網友大為驚奇。
「其實我以前都有唱歌㗎，你諗吓，喺TVB，除咗演戲、主持，唱歌、跳舞、搞笑、雜技、危險動作⋯⋯叫到都要做㗎啦！而叫得我做，我一定盡力嘅，因為要競爭吖嘛，梗係要做得好。
「我諗我係香港唯一一個，做勻晒所有電台、電視台嘅人，有線、TVB、亞視、ViuTV；商台、港台、新城，都係唔係太多人留意啫。」
出身於各大「木人巷」，林曉峰練得一張張鋒利的刀，因此在正式成為歌手後，哪怕是一首別人的歌，他也可透過反覆演出，逐次進步。
「〈海闊天空〉，我諗我唱Live嘅表演，比家駒仲多！我帶呢首歌去咗唔同嘅地方，唔係話我要推廣呢首歌，而係每次上台，我都對歌詞有更深嘅體會，所以唱咗咁多次，每次我都有提升嘅空間。
「第一次唱，我係嗌出嚟、好激情咁唱，『仍然自由自我，永遠高唱我歌⋯⋯』；到後來係雲淡風輕咁唱，有種看透咗嘅感覺。」

優質DNA

林曉峰的履歷，跟其家族的演藝DNA一樣優質，除胞姊、胞兄為林珊珊及林海峰，其舅父、舅母是狄龍跟陶敏明，表弟則是視帝譚俊彥，若他需要相關意見，搵家人方便過Google。
「都唔係㗎，你話舅父嗰啲做大俠嘅經驗，我又唔係咁啱使；其他例如係舞台經驗，我仲豐富過佢哋，我家姐做咗歌手唔係好耐，阿哥又唔係長時間做歌手，問咗佢哋都未必啱我用啦！」
舞台經驗值未必合用，但林家的適當自由度育兒法，就從未過時。林曉峰直言，對於兩名兒子：20歲的林寶及19歲的林熙，也採取自由放飛的教育模式。
「點講都冇用，我自己都後生過，如果係嗰隻『嚟，我教你做人道理！』，俾你都走啦！身教好緊要，我點做，佢哋會睇到嘅，俾佢哋自己感受，好過講啲咩做人道理啦！」
現兩子也負笈海外，林曉峰稱父子三人如常溝通。「我嘅責任係，幫佢哋自由咁飛，去搵佢哋嘅理想，我哋都係好似以前咁，好似朋友咁溝通。我唔會講：『我好掛住你呀！』，咁係阻住佢哋，令佢哋覺得要成世黐住我咁，係唔好嘅。」
親情以外，林曉峰早前被好兄弟謝天華篤爆，最近「紅粉霏霏」，問他是否有新女友，他笑言：「嗰次係因為做緊直播，謝天華咁講到，我咪諗個大家都聽得開心嘅答案囉。我𠵱家好多嘢做㗎，我會享受每一個過程，有咪做好佢，冇嘅我都唔會特別去強求。」

照騙的法則

照片，全仗一系列修圖App的功勞，近年多了「照騙」名稱。
若論非P圖類別，林曉峰的音樂會宣傳海報，則可列為教科書級數。
「張相唔係喺咩Studio影嘅，係有一次我做嘢，同事喺休息期間，叫我行埋一二邊影，睇唔出呢？
「影呢啲相，其實係有一啲動作，影出嚟就一定有效果。」
旋即便猶如撳掣，擺出一系列甫士，一邊轉換，林曉峰還一邊解說：「Poster嗰個係嘴唇痛，呢個係頭痛，再嚟頸痛，嗱！膊頭痛，仲有牙痛⋯⋯」
撇除極富娛樂性的表情，林曉峰無縫接甫的流暢度，充分表現其日積月累的內功，跟修圖App產品「照騙」迥異，完全騙不了人。