匠人精神，極致是窮一生心力，也要追求完美。
凡事又不用想得太遠、去得太盡，看李尚正，外表平凡的他，本於香港大學修讀建築系，只是為了暫避畢業論文的壓力，進入有線當節目助理，繼而先跟林海峰合作，再被周星馳看中，穩打穩紮20年，無心插柳為自己鋪好一磚一瓦，展開不平凡的演藝旅程。
到了43歲的今年，阿正憑《死屍死時四十四》的保安員「李寶安」一角，榮獲提名角逐本屆金像獎「最佳男配角」。
問阿正有當主角的憧憬麼？隨性的他也有一定要求，「做主角，第一好大壓力，第二要用好多好多時間，唔係就對唔住個劇本；做配角反而唔係喎，雖然都要花時間背劇本，但組數少好多。」
20年下來，有線電視也成了現在的HOY電視，阿正還在默默耕耘，演技以外，當主持、「臥底」，也展現其充滿喜感的魅力。
「我揀咗穩定嘅工作，準時出糧就得。呢個同心態有關，我覺得我可以隨時唔做嘢，但係有啲人會覺得冇安全感，例如要養家、供緊樓，咁我又租屋住又冇小朋友，兩樣都唔使。」
有別於一般人「好鍾意返工」的心態，阿正於尋找突破的同時，從沒忽略自己的快樂，才是真正的匠人。

一哥

入行20年首度獲得金像獎提名，李尚正於《死屍死時四十四》中的表現搶Foc，他歸功於導演何爵天、編劇江皓昕及剪接胡大為。
「我同阿昕識咗好耐，今次用咗好多時間背劇本，原本3頁紙千幾字，Cut到盡都仲有900幾字！而導演係可以將好流四嘅配角，變得好好睇；加埋胡大為先生保留咗好多嘢，先有𠵱家嘅效果。」
對手多勁，輸贏不在控制之內；阿正不能預期的，還有：「以前啲女啦！唔係啲嘅⋯⋯有一個，WhatsApp恭喜我，我諗咗幾晚點覆，就錯過咗覆嘅機會嘞。
「我個電話號碼，由有2G網絡就開始用，到𠵱家都冇轉過，好彩冇爭人錢走數。」
以不變應萬變，除電話號碼，還有由有線到HOY電視的工作，近年阿正主持該台的多個節目，由話題度最高的《臥底旅行團》系列，到衍生的《臥底服務團》，收視理想，也發揮了阿正的鬼馬優點，「HOY電視一哥」這名稱，也不脛而走。
「隨時可以拉我落嚟㗎，請多個男仔咪得囉！收視係數字，好飄忽，好嘅，都係一個禮拜啫。
「做《臥底》，開頭我都好糾結嘅，因為有人認得我，咁拍咩啫？但後尾我覺得，習慣咗呢個『臥底』模式，即使係有人認得，都係照做㗎啫。」
節目受歡迎，連帶他跟拍檔「妹頭」盧頌恩的關係，也成了網友關心的問題。「我哋喺節目答過，不過最後剪咗，我同妹頭係同事、朋友囉。」

星爺

在HOY電視的演藝旅程，是現在進行式；阿正是「斜棟族」的始祖，其起步點是HOY的前身有線電視，於娛樂新聞台當節目助理/娛樂記者，到被當時的話事人余詠珊，派到跟林海峰主持《有線娛樂乜人台》，他才有固定的幕前演出。
「Sandy（余）嘅理念係，我係Writer，就要寫埋稿、拍埋片、配埋VO、剪埋片同上埋字幕，所以係學到好多嘢。」
而他於《乜人台》的演出，就引起周星馳的注意，令阿正踏上另一個「斜棟」行列。「到今時今日，我仲係好仰慕阿Jan同星爺，佢哋都仲好活躍，好似LeBron James咁。
「好多人都會問我，有冇俾星爺鬧過，坦白講，真係冇！佢做嘢嘅時候係急，但佢唔捨得鬧我（一笑）。我嘅過人之處，就係一鬧我就會發脾氣，『哼！』咁樣跟住就走，對住星爺都係咁，一次啫。」
問阿正入行以來可有最有成功感之作，他即說：「《美人魚》囉！我次次返大陸，啲人都話：『咦，你咪係嗰個粉腸！好好笑呀你！』，跟住就俾番我睇條片。」

退休

一般人工作的動力，大多是儲錢買樓，但阿正早已上車，高峰期還有數個物業在手，
「買樓係因為外在因素，啱啱出嚟做嘢冇幾耐，爸爸、媽媽就幫我俾咗首期買樓，我還番俾佢哋嘞。
「𠵱家賣晒啦！堅賣，連啲錢都使埋嘞！所以啲人話揸住磚頭係啱嘅，一放就會使晒！要及時行樂。我細個原本嘅計劃，係40歲之前應該要退休，𠵱家使晒啲錢，離呢個計劃越嚟越遠（大笑），所以就要諗吓，點樣重新出發，搵多啲錢。」
電話號碼從未更改；一份工，斷斷續續打了20年，阿正的長情，也適用於形容其感情生活，跟圈外女友拍拖18年，即使對方罹患癌症，他也不離不棄，一紙婚書，並不代表甚麼。
「做人就係咁，我梗係想冇事冇幹，一直到咩（老）啦！（得悉女友患病）開頭嗰一兩年，係有啲無奈嘅，但後尾都知道要繼續㗎，都要搵食㗎。
「佢𠵱家都係盡量工作，因為長期病患，如果唔做嘢，只係全心全意去環遊世界，就會冇咗生存嘅慾望。」
說到底，及時行樂尤關重要。

輕鬆上班與疊球

人到中年，就算有多堅持有多認真，也難免出現滑牙的情況。
即使隨性如阿正，也盡量避免如此情況。「𠵱家我求嘅，係自我嘅突破、改進，同埋有少少檢討。以前我唔會睇番自己嘅節目，𠵱家就會，因為唔檢討自己就冇機會向前。」
工作的用心，阿正的上班路，就相對地輕鬆得多，以訪問這天為例，原本休假的他，因家住HOY電視總部附近，所以可踏着滑板車到達。
問他可是為了返工而搬家，他表示：「唔係！係環境好、租又平，係停車場貴，要成4,000幾蚊一個月，所以我𠵱家冇揸車嘞。」
做事簡單而純粹，阿正連改英文名，也沒有複雜的理由。
「係讀大學嘅時候，開Email要改英文名，我當時打緊Softball（壘球），棒球有一個好勁嘅外野手Ichiro（鈴木一朗），嗰時係我嘅偶像。
「佢係一朗，而我喺屋企排第二，有阿哥有細佬，咁我就係Jiro囉。」
簡單，但離不開的，是用心。