現職導演的文恩澄（Rannes），其實早於〇七年就以歌手身份出道；不過，不擅於交際的她，出完一隻碟之後，便退居幕後從事創作工作。自小就有無限想像力的她，日日都在家搞搞新意思，除了音樂創作之外，一年多前，她因報讀了靈氣班，而愛上了製作靈擺及能量塔，更將這項興趣成為了一門生意，再加上她是小動物愛好者，滿屋都是動物，鸚鵡、金魚、蝦仔、貓仔、狗仔等。
這個位於元朗的單位，室內加室外面積合共約1,400呎，不僅是Rannes的音樂創作小天地，更是其寵物樂園，她笑說：「一年多前，我仲加入我整能量塔嘅工作室，其實地方都係啱啱夠用咋。」

嗜好多多

現年38歲的文恩澄（Rannes），6歲就開始學習彈奏鋼琴，並考獲八級資格，以及五級樂理、三級小提琴。中學時期，她移民美國，大學主修電腦科學，16年前因跟隨家人來港度假，而被發掘入行。其實，自小已經很喜歡創作的她，〇四年已開始以網名「橙橙」，在網上發表自己的作品。入行前，她就曾為許志安作了〈孫果與了因〉一曲。
當年，身為陳曉東師妹的Rannes，雖然〇八年推出個人大碟，備受公司力捧，但她因為性格不喜歡交際，寧願收埋自己默默創作，所以漸漸退居幕後。現職廣告導演及剪接師的她，同時亦為不少微電影、廣告、MV擔任導演及製作工作；而一八年由她執導及剪接之網絡電影 《極品閨蜜》，就獲得十個國際電影節獎項，包括 《最佳導演》。
在過去的兩年，因為疫情關係，Rannes就甚少返回荃灣的製作公司，幾乎天天埋首在家做創作，她哈哈大笑說：「我真係好鬼多嗜好，乜嘢都鍾意收藏，模型公仔、漫畫，儲到一屋都係，雖然我只係同工人兩個人住，但要容納晒我所有嘅嘢，我就一定要住得大，遠啲都唔緊要，我之前係住流浮山，嗰度全幢有2,700呎，當時只係租一萬蚊，不過業主要收番間樓。兩年前，我就四圍搵屋搬，要用萬幾蚊嘅價錢，租咁大嘅地方，我知道好難。」

被鬧港女

她續說：「當時我曾經喺網上徵租，表示希望用15,000元租700至1,000呎，竟然有好多網民留言鬧我，佢哋話：『你呢個死港女，同老闆瞓咪有大屋住囉！』其實，我一直係唔介意住得遠，元朗呢度都只係15,000元租金，室內有700呎，一個大廳加三間房，再加多一個700呎嘅天台，所以住遠啲，就可以住大啲。」這裏除了是一個小型動物園之外，更是她的工作室；而不時做直播的她，更添置了一個設備完善的音樂創作室及直播空間給自己，地方雖小，但五臟俱全。
自稱是動物管理員的Rannes，即使很喜歡小動物，但她表示甚少會去寵物店購買，例如家中的14歲鸚鵡「的的」，就是8年前，她從一位士多伯伯手中領養回來的，她憶述：「我喺寵物界有啲名堂㗎，因為有街坊見到嗰隻鸚鵡骨瘦如柴，生活得唔好，被困喺一個一呎乘一呎嘅籠裏面，於是叫我去救佢。當時，我同嗰位伯伯主人傾，佢話我俾5,000蚊領養費就可以攞走。見到隻鸚鵡咁慘，我就收養咗佢。『的的』當年因為俾人欺負，所以戒備心好強，我有一次都曾經俾佢襲擊，流好多血。」

自製繁忙

此外，Rannes家中還有一隻貓仔及兩隻狗仔，再養埋魚、蝦，確實要花不少心機與精神，她說：「我以前仲有養兩隻兔仔，不過兔仔好容易死。其實，每一隻動物離開我，我都好傷心㗎！」百無禁忌的她，為了寵物死後都能夠陪伴自己，所以她會將牠們的骨灰放在書架上作為紀念。
Rannes聲稱自己是一個時間管理師，因為她不單止是導演、編劇、剪接、歌手、演員、市場策劃師，還是一個手工藝師，她直言喜歡將自己的時間排得滿滿：「一年前，我因為去上身心靈班，而愛上咗整靈擺，後來發覺因為靈擺太細，唔可以整好多花款，於是就學整能量塔。當時，我日日夜夜咁整，整到成屋都係，於是就放上網賣，點知反應好好，變成咗我𠵱家其中一個事業。」她表示，雖然這兩年大部份時間都在家工作，但忙得不可開交，搞到三日兩夜只睡了4小時。現在疫情減退，Rannes已為自己定了一個新的目標，就是每天要早上十時返到公司，並且要作息定時。

【東周刊】更多精彩 敬請瀏覽

《東周網》：https://eastweek.stheadline.com/

《東周刊》FB：https://www.facebook.com/eastweek.com.hk/

《東周刊》IG：https://www.instagram.com/eastweekhk/

《東周刊》微信公眾號：eastweekhk