上周三（2月28日），在尖沙咀一商場舉行了第三屆《香港社交媒體風雲榜》頒獎禮，除了雲集各大網紅之外，還邀得星島新聞集團主席蔡加讚擔任頒獎嘉賓，場面盛大！
然而，不少得獎的網紅，背後亦有一段鮮為人知的辛酸史。譬如：獲得「風雲人物」的YouTuber Ming仔，就試過因一次直播，弄致「公關災難」，令他的人氣直插，幾經努力發掘新題材，才重建昔日的聲威。另一位人氣YouTuber托哥，雖然身高6呎4吋，但就試過在拍攝途中，遇過被人「收陀地」。此外，獲得「網民最愛」的Hillary，就收過不少男網民傳來的「私人部位」照片，令她感到萬分驚嚇！還有，入行年資尚淺的泰妹，曾被不少網民惡意攻擊，但為人樂觀的她，就選擇從負評中「調教」自己。

Ming仔：全城圍插

去年，在台灣和日本都有針對年輕人進行的人氣職業排行榜，Youtuber或稱為網紅、KOL皆是位居榜首。大家對這份「dream job」趨之若鶩，但其實背後隱藏着一段段鮮為人知的辛酸史。
獲得十大「2023香港社交媒體風雲人物」之一，年約40歲的Ming仔（梁嘉銘），90年代移居加拿大，大學畢業後曾在多倫多的華語電視台工作。2010年起，他以「Ming仔」身份開始拍短片《每天自戀多一些》，上載到香港的YouTube播放，因為越來越受歡迎，所以他兩年後回流香港發展，正式走上Youtuber之路。
曾經憑着旅遊及生活知識片，Ming仔擄獲數10萬網民的芳心，但4年前一次網上直播，因社會運動而弄致「公關災難」，結果在短時間內訂閱人數暴跌之餘，有網民更發起罷看，令他人氣直插。
Ming仔憶述：「基本上係全城圍插，建立10幾萬係需要好長時間，但係跌10幾萬，1星期就可以發生，深信我應該都係香港第一人！當時彷彿自己每行1步，做啲咩都係錯，人生從未試過咁樣，唯一辦法就係唔出聲，先可以cut loss。」
閉關近兩年後，Ming仔決定重新出發，並將影片主題轉為時事頻道，加入自己由零開始學習的動畫剪接技巧，又增設國、粵、英等3語頻道。經過一年多時間，他重新吸引到網民的關注。他坦言：「我真係好鍾意做YouTube！當中有起有跌、各樣，整體嚟講，我都係enjoy嘅！我會忠於自己，跟自己喜歡嘅嘢去創作，然之後希望自己可以做好啲，做到好嘅作品出嚟，就自然會吸引到市場上嘅人去睇。無論係起定跌，都會維持呢個心態！」
他又分享說：「其實我每一刻都會幻想自己聽日就會被淘汰，view數、like、留言等係一個計分牌。人生做每一個決定，其實係一個trade off，你唔可以完全好無代價。如果我唔行錯一步棋，我唔會識下次點樣行啱佢，如果YouTube唔摺，我都會繼續做！」如今Ming仔在YouTube的訂閱人數已超過68萬。

泰妹：惡意攻擊

獲得十大「網民最愛」之一、現年22歲的泰妹（Thaimay，楊雅文），是一名港泰混血兒。2022年，她參選YouTube頻道《試當真》舉辦的校花校草選舉時，因參與演出Dear Jane歌曲〈到底發生過什麼事〉MV而人氣急升，結果獲得季軍後。出道短短一年多的她，IG已擁有近9萬粉絲，並於去年5月正式加入樂壇做歌手，且很快便推出個人單曲〈獅吼功〉。最近，她還與ANSONBEAN推出合唱歌〈CALL ME （Late At Night）, Pt .2〉。
泰妹透露，入行初時經常遭網民惡意攻擊，導致欠缺自信，但為人樂觀的她，就選擇從負評中「調教」自己：「喺2023年嘅上半年，我都仲係一個素人，好多謝我嘅團隊、經理人睇得起我；仲有廣告商信任我，俾機會我。原本我係一個冇自信嘅人，但係踏出咗第一步之後，原來觀眾都可以接受我，咁就越嚟越可以邁向我自己鍾意做嘅嘢。多咗人注意自己，難免會有一啲負評、惡意攻擊，我覺得internet就係咁，有好多唔同嘅聲音。其實，有啲觀眾嘅意見真係正嘅，我會睇吓自己點樣可以做好啲，睇下自己嘅作品有咩問題，之後再去改。繼續鍾意做自己鍾意做嘅嘢，唔好俾流量沖昏，保持自己嘅初心！」

Hillary：猥褻相片

獲得十大「網民最愛」之一，現年31歲、模特兒出身的Hillary（劉沛蘅）。入行初期，因樣貌與當年的薛凱琪有幾分相似，所以有「模界薛凱琪」的稱號。此外，由於她的形象健康，加上樣子甜美，故獲得不少廣告商的青睞，邀請拍攝平面及電視廣告。2012年，她首次拍攝微電影《最好的一直都在》，便當上女主角。近年，她因參與ViuTV節目《膠戰》系列的演出，而人氣急升，更獲封為「女神」；然而，Hillary最令津津樂道的，其實是曾經和洪卓立拍拖。當年，兩人相戀期間，就不時以情侶檔出席活動，又經常高調「放閃」；不過，他們於去年11月卻突然在IG宣布分手，結束兩年情。
Hillary除了經常在社交平台上載靚相之外，又會分享美食及拍攝旅行短片，備受網民喜愛。不過，她就投訴，曾收過不少男網民傳來的「私人部位」照片，令她感到驚嚇：「好多時都收到唔少男網民傳來嘅色情留言及相片，好驚呀！（點解唔block咗佢？）冇呀，我唔睇囉！因為如果block咗佢，佢會知道你睇咗，所以我就選擇去無視佢，可能見過一次，以後就唔撳入去。（𠵱家仲有冇？）唔知呀，我冇睇呀！可能分手之後會多啲，有啲會留言：『好想做你老公！』、『可唔可以同你一齊？』、『好想追你呀？』等留言。」相信Hillary盡快公布找到Mr. Right，這些留言便會煙消雲散！

托哥：被收陀地

獲得十大「風雲人物」之一、現年27歲的托哥（Torres，原名別洪優），於2015年土豆網節目《神街坊》的製作人賞識，獲邀擔任該節目的主持，其內容圍繞戀愛觀、性愛觀等，影片很快在內地廣為流傳。2018年，托哥在地鐵上高唱「人人常歡笑，不要眼淚掉」，這條短片令他備受網民關注。同年，他開設自己的YouTube頻道，主要探討香港與外國文化的差異。現時，他的YouTube頻道有逾96萬訂閱，其IG及FB帳號亦同樣有逾20萬粉絲。
成為YouTuber 5年多的托哥表示，入行以來最難過的，就是view數不似預期：「點解我咁努力拍，都會冇人睇，比預期view數少，我就會唔開心啦！但係每一個呢啲唔開心，都係一個學習過程，因為社交媒體個演算法變得好快，有時唔係你嘅內容拍得唔好，可能係你拍嘅內容唔符合佢嘅演算法，咁就要喺每一日難堪嘅日子，學習點樣去進步。」
喜歡探索危險地區的托哥，雖然身高有6呎4吋，但亦不時遇到被人「收陀地」的事件：「通常都係用錢解決哈、哈、哈！」他繼續分享說：「有時工作太多，都會有少少情緒嘅，我覺得做邊行都係一樣嘅，都會有壓力，但係我好幸運可以做到內容創作者。我覺得可以做到自己鍾意做嘅嘢，咁樣人生好有意義。」對於被網民惡意中傷，他表示只會令自己變得更強大：「每一次有網民中傷我，都只會令我更強大，做一個內容創作者，第一樣嘢就要有個強大嘅心臟！每一個中傷你嘅人，都係想你變得更加好，因為佢會話俾你知有咩不足。」