發佈時間：10:00 2023-07-30
在熱播劇《靈戲逼人》中，阮嘉敏（Mandy）的演出備受關注！她飾演「若琳」一角，含羞答答的性格，似足《大時代》中的「慳妹」（周慧敏飾），深得宅男喜愛。
原來Mandy接到角色後，真的狂煲《大》劇，她笑說：「因為我嘅真實性格係同『若琳』剛剛相反，所以要做足功課。收到劇本時，我就捉住媽咪一齊研究，不停睇番以前嘅劇集；同埋我身邊咁啱有朋友個妹都係咁內向，我於是去佢屋企『偷師』。呢個妹妹真係唔係點郁，我試過同佢傾偈，佢真係唔係好敢望我。拍攝之前，我再喺屋企對住塊鏡練表情同陰聲細氣講嘢，真係估唔到反應咁好。」
一六年參選港姐前，原來Mandy已經與劇中的暗戀對象吳子冲，因為模特兒工作而認識，所以今次二人合作，手到拿來，她表示：「我哋識咗十年，所以都好有默契，真實嘅我唔怕醜、唔怕事，亦唔內向，對住鍾意嘅男仔，我會採取主動。呢個角色真係完全唔係阮嘉敏嚟，所以出街前，我都好擔心演得唔似。」
入行七年的Mandy坦言，在《東張西望》工作五年，是她最大的得着，不單止成長了，還看盡人生百態，她憶述：「啲人知道我做呢個節目，一般都有問我驚唔驚老鼠、曱甴？其實呢啲對我嚟講係冇難度嘅，反而見到一啲苦主家庭，我就真係會忍唔住喊囉。記得有一次，有一單工業意外，一個廿五歲嘅女仔冇咗個老公，我一路同佢做訪問，一路忍唔住喊。」Mandy被受訪者感動；而她的梨花帶雨、真摰情感，就獲得網民封她為「《東張》女神」。
【東周刊】更多精彩 敬請瀏覽
《東周網》：https://eastweek.stheadline.com/
《東周刊》FB：https://www.facebook.com/eastweek.com.hk/
《東周刊》IG：https://www.instagram.com/eastweekhk/
《東周刊》微信公眾號：eastweekhk
