並非為了盲目食字，而是在於曾比特來說，愛上唱歌，確實為他帶來一段奇妙旅程。
即將踏入的第5個年頭，他憑着磁性的嗓子，唱入樂迷的心靈，近兩年更由《聲生不息》開始，從香港唱到內地，跨年唱了10場巡迴演唱會，由廣州唱到上海，氣勢勁過山姆。
「2023年，對我係一個大嘅轉變，多咗人識曾比特、知道曾比特嘅性格，所以造就到我喺去年開始，有更加多嘅演出機會。
「Somehow我覺得有好有唔好，好就啱啱講過；唔好嘅，就係大家都見到，我喺2023年嘅作品真係⋯⋯年尾先出一首廣東歌。」
愛唱歌而成名，也令30歲的曾比特，偏離了原本的既定路線。「去年係Focus咗喺另一邊，所以2024年嘅目標，就係Focus番喺唱歌上面，彌補番鍾意聽我唱歌嘅朋友。
「雖然我行得比較慢，但我想Achieve（實現）嘅嘢，同年齡無關，我仲有好多嘢想做，喺紅館開Show啦、出大碟啦、出多啲廣東歌啦，仲有⋯⋯」
即使長路仍漫漫，但頂着招牌爆炸頭的他，走得悠然自得。

人生首次

就如曾比特本人所說，他於去年鮮有新作派台，Solo作品就是去年尾的〈魔氈〉，輕快的曲風，是慣唱慢板悲情歌的他，作出的新嘗試。
「收到呢首歌都係緣份，本來收嘅Demo，啱用嘅都係慢歌，但係等多一陣，就聽到呢首歌。」
曲風有新嘗試，連拍攝MV，曾比特也獻出其人生的第一次。
「因為之前陳葦璇去咗日本拍MV，我都話我好想去日本拍，一嚟我咁大個仔未去過日本，二嚟我好想搭飛機，所以就決定去日本拍。」
你以為他是寓工作於娛樂？緊密的3天旅程，他連走馬看花的時間也欠奉。「我嘅目的地係鳥取砂丘，出發嗰日，我喺廣州做完嘢，搭中港車去機場，凌晨1點Check-in，去到大阪係朝早7點；即刻要搭4個鐘頭車去現場拍攝。
「不過砂丘真係好靚，好有荷李活電影《Dune》（沙丘瀚戰）嘅感覺！我哋喺沙丘中間拍，真係一望無際！」

連番嘗試

雖然到去年年終，曾比特才推出新的廣東作品，但並不代表他懶惰，除要穿梭內地演出，他還拍攝了第一部電影，就是今年的賀歲片之一的《臨時劫案》。
「拍戲嚟講呢，真係好難！因為我零經驗，跟住我發現，原來演戲係好生活化，但係要將生活擺上銀幕，完全唔簡單。」
呷一口咖啡，他定一定神說：「我嘅角色喺戲入面係比較Side（次要），係個古惑仔，喺泳池Locker偷銀包，Suppose見到啲錢係興奮嘅，但嗰啲唔係真錢嚟㗎嘛，咁我點樣先會覺得係真呢？於是要慢慢靠想像。
「呢個鏡頭，我NG咗10幾次，但可能到正式出街，只係得3秒。導演（麥啟光）真係好好，好有耐性咁教我，而且仲冇鬧我，真係好感激佢。」
計劃通常趕不及變化，曾比特的處男電影作亦然，「我喺戲入面，主要係同兩個演員有對手戲，一個係Ansonbean（陳毅燊），我Casting嗰陣就係衝住佢個角色，比我𠵱家嘅角色戇直，但後來導演揀我做古惑啲、寸啲嘅角色。
「另一個對手係大前輩郭富城，第一下見到佢，我覺得佢好大氣場，但親近咗之後，就發現佢好Nice。拍完齣戲之後，我喺一個Event見到佢，佢第一句就同我講：『今次唔使死嘞。』哈哈哈！因為佢喺戲入面『吽』死我，好搞笑！」

見多幾面

去年因工作而當「空中飛人」，曾比特笑言：「習慣咗嘞！而且我鍾意搭飛機，喺飛機上面睇雲，唔同嘅形狀，仲有日落時睇住天空慢慢變色⋯⋯所以我好鍾意搭飛機。」
雖然在飛機上度過了不少時間，但他稱：「大時大節就最好同屋企人、另一半一齊過啦！之前因為要做嘢，我好耐冇見過屋企人，所以嚟緊過農曆新年，我都要多啲陪吓佢哋，而且𢭃吓利是都好應該吖！」
雖然曾比特為家中孻仔，但其兄姊都已成家，問他可會派利是給侄兒、侄女，他秒回：「吓？我都未結婚，派咩呀？梗係問阿媽攞啦！侄仔、侄女仲細，等佢哋大個啲先啦！」
𢭃利是是曾比特的指定動作，他還公開曾家的秘密：「我屋企係由年三十到年初三，都唔熄大廳盞燈。細個我會覺得好嘥電，所以我問過原因，原來唔熄燈，係寓意屋企嘅長輩長命百歲，」
要長命百歲，不單要年年驗身，也要安居樂業，這兩年曾比特人氣上升，但他坦言：「錢唔多囉，所以要買樓就仍需努力。我會覺得，錢係緊要，但見識都好緊要，𠵱家我仲需要擴闊視野。」

VVVIP

每個人的心目中，都有個VIP名單，大多為家人、另一半，曾比特也不例外。
重視家人的他，對拍拖7年的女友Cecilia，關注從不或缺，即使工作行程排得密麻麻，他也抽出時間，作倆口子的Quality Time。
「𠵱家係要以事業為重，另一半亦好支持我去追夢，就算忙，佢都冇詐型嘅。」
早於曾比特入行前，已跟女友一同創辦了工作室「Insane Voice Production」，為他的歌唱教室外，也有為婚禮、晚會擔任現場演唱。上周曾比特於廣州完成內地巡迴演唱會後，周三就已人在跑馬地，欣賞女友於台上的演出，男友力滿滿。
「佢唱歌好好聽，無論喺生活上、舞台上，佢都係一個好Charm嘅人。我喺內地做嘢嘅時候，為咗俾定心丸佢，我就買部琴喺酒店練習，所以大部分的時間，都係喺酒店房。」
重要，並非口裏說便算，要有實際行動證明，才是Very very important！