發佈時間：09:47 2024-01-17
無綫年度盛事《萬千星輝頒獎典禮2023》
於本周日晚（1月14日）圓滿結束！
大熱的佘詩曼（阿佘），憑《新聞女王》的「Man姐」一角，破紀錄橫掃3個女主角獎項，再加上「最佳衣着」，成為4料「視后」；而「視帝」之位，就由陳豪憑《破毒強人》的「文華」一角奪得。
「大滿貫視后」的阿佘，近年北上賺人仔，去年首肯回巢拍劇，據知除遇到《新聞女王》好劇本之外，原來無綫更自動將其酬勞加碼至1,000萬元。至於相隔16年再度封帝的陳豪，近年不僅密密拍劇賺錢，在休息時間，還要幫老婆陳茵媺照顧家庭，遇上疫情更加苦不堪言，結果搞到出現「男人最痛」的脫髮問題。
佘詩曼《女王》價1千萬
今年的《萬千星輝頒獎典禮》移師到澳門上葡京綜合度假村舉行，所有獎項已經名花有主；而被視為各大獎項大熱的佘詩曼（阿佘），先拔頭籌與馬國明獲得「最佳衣着」獎，之後再憑《新聞女王》「Man姐」一角，先後勇奪「馬來西亞最喜愛TVB女主角」、「大灣區最喜愛TVB女主角」及「最佳女主角」（視后）等獎項，創紀錄成為「大滿貫視后」！
阿佘接受訪問時，表示心情仍未平復：「我𠵱家都好似發緊夢，個心都仲係卜卜、卜卜咁跳！好多謝大家俾咗個咁美好嘅回憶我，我一定唔會忘記。真心多謝編劇、監製，打造咗咁好嘅劇本俾我哋，先至可以拍到咁好嘅劇出嚟。因為一個演員要遇到好嘅角色、好嘅劇本唔係一件咁容易嘅事，一生人唔知可以遇到幾多次，希望每次都把握到機會，去呈現自己最好一面俾大家睇。」
對於《新》劇在頒獎禮上狂掃8獎，她透露：「其實我哋拍得好開心，播完套劇，過咗幾個月，我哋都會成日出嚟聚，大家感情都好好。其實由高Ling（最佳女配角）第一次攞獎，我已經忍唔住喊，好戥佢開心！可能好耐冇參加過呢個頒獎禮，令我諗番起好多以前嘅嘢，大家又坐得好近，又可以傾下偈，氣氛好好。」此外，她笑言媽咪一邊打麻雀一邊看頒獎禮：「我攞咗兩個獎之後，佢原來facetime打俾我，我鼠咗出去打番畀佢，佢都好開心。佢話：『恭喜你喎！』我話你唔係打緊牌咩？佢話：『係呀，我哋一路打一路睇嘛！』其實媽咪開心，我最開心！」
據悉，無綫近年不停送上劇本給阿佘，並出動「銀彈」攻勢。有傳，無綫於3年前，已開出600萬元的酬勞，力邀她回巢拍劇；不過，她當年專注賺「人仔」掘金，故婉拒「娘家」的好意。直至遇上《新聞女王》的劇本，她才開始心動，再加上總經理曾志偉在背後發功，她終於首肯；而無綫亦十分識做，傳將阿佘的酬勞調升至1,000萬元。
緋聞男友
不過，在頒獎禮尾聲，無綫就幽了阿佘一默，要她用哨子吹出頒獎嘉賓「初哥哥」張智霖。2000年，阿佘與張智霖合作電視劇《十月初五的月光》，劇集叫好又叫座，兼促使兩人成為螢幕情侶。有傳，當年兩人「過電」戲假情真，搞到當時男方的「正印」袁詠儀呷醋，並親身到片場監場，防「佘」埋身。事隔24年，阿佘一見到緋聞男友即來一個抱抱，相信張太應該不會介意。
陳豪捱出「男人最痛」
至於「視帝」寶座，就由陳豪憑《破毒強人》的「文華」一角，以大熱姿態奪得。最難得的是，可以在老婆陳茵媺（Aimee）的手上接過獎項。
接受訪問時，他表示：「我諗冇乜人試過喺自己太太手上攞獎，仲要嗰個係叫『最佳男主角』！由太太頒俾我嘅話，多咗份意義，可以話係最佳老公。」他坦言今年對獎項有信心：「我係有信心嘅，但就唔知上天會唔會俾呢個獎我，今日印證咗，我覺得成件事好完美。」原來，今次是他相隔16年重奪「視帝」之位，他打趣的說：「其實，唔講我都唔知，原來已經係16定17年前，同埋提名過『最佳男主角』都有廿幾次。我諗我呢個紀錄都冇乜人可以破到㗎喇！證明咗我對做戲嘅熱愛追求係正確嘅，呢個就係一個獎勵。」
問到會否繼續支持老婆拍戲，向「視后」邁進？他說：「我係支持Aimee繼續去追求自己做演員嘅道路。我覺得最緊要係，唔好吓吓都係我同佢一齊拍囉。我希望佢同多啲唔同嘅演員、唔同嘅導演、唔同嘅監製，咁先可以打開佢嘅戲路。」提到《破》劇未能獲「最佳劇集」，他承認有少許失望：「其實，我係好鍾意《破毒強人》呢套劇集，我覺得套劇好有電影感，坦白講，我係覺得每個演員都做得好好，喺觀眾眼前一亮，已經好少劇集可以做到呢個point喇！仲將一班好耐冇睇電視嘅人，吸引返嚟睇電視。」
急救成功
現年52歲的兩屆「視帝」陳豪，2013年與Aimee結婚，婚後3年抱3，誕下兩子一女，故Aimee一度淡出幕前，專心相夫教子。而隨着孩子開始長大，她決定於2022年復出拍劇，並與老公「夫妻檔」拍攝《羅密歐與祝英台》。為配合老婆追夢，陳豪亦出心出力支持，除了要為自己的角色作準備之外，更犧牲休息時間為老婆翻譯劇本，減輕老婆的工作量，還會抽時間湊子女。
奈何在劇集剛開拍時，孻女Camilla不慎確診新冠肺炎，當時兩公婆即停工隔離，後來Aimee同樣確診。那些日子，為了照顧屋企，一直嚴謹抗疫的陳豪，每次開工亦會戴兩個口罩，回家後又罩不離口，完全高度戒備。作為一家之主的他，身心變得疲憊，導致髮線上移，頭頂驚現「男人最痛」的「壓力窿」。幸好，頒獎禮當晚他的「男人最痛」已獲急救成功，頭髮回復濃密。
