更新時間：16:18 2024-01-11
發佈時間：16:18 2024-01-11
發佈時間：16:18 2024-01-11
聖誕新年接 job 接不停嘅英國豪羅啟豪，日前跟肥媽同李麗霞（黑妹）去大馬雲頂處男登台，琴日返抵香港。英國豪分享話：「我呢個中年先入行嘅素人，以前成日喺新聞度睇到啲前輩去外國登台，特別成日聽到話去雲頂，今次可以親身有呢個體驗，感覺好得意！」問到有乜嘢最難忘，一向鍾意食嘢嘅英國豪話：「雲頂嘅嘢食真係多得好緊要！譬如酒店樓下係一個好大嘅商場，每一間舖頭都係餐廳！我就主要揀去食啲地道菜色，當中我學識咗咩係馬來三寶，就係奶茶配咖央多士再配近乎生嘅雞蛋送豉油！咁樣嘅配搭原來好好味，我第一次食唔知隻蛋咁生打到成手成檯都係！好醜怪！」
英國豪今次對住超過 6,000 位觀眾演出，座無虛席，當中更有唔少專程由香港飛過去支持佢嘅豪殼（粉絲暱稱），為現場炒熱氣氛，同為佢活動後舉行祝捷儀式。啟豪琴日返抵香港更有大班豪殼接佢機，豪殼問佢有咁多人嚟接佢機佢有咩感受，啟豪就講笑話：「我 13 歲離開香港嗰年，同二家姐一齊走，二家姐有成三十個朋友嚟送機，我就只係得三個，比較上嚟都有啲啲唔開心㗎！但係宜家嘅我有你哋，今時唔同往日喇！」
最Hit
