發佈時間：16:00 2024-01-22
無綫熱播劇《新聞女王》，以新聞部內鬥為題材，成為近日的城中熱話。縱然有觀眾嘲諷劇情超離地，但確實認真便輸了！
不過，劇中由多位靚女飾演主播和記者，這個就肯定是無綫新聞部的事實；尤其是身材好的主播比比皆是，譬如：之前報道天氣非常跳脫的黃婉曼，以及前財經資訊台的主播溫蕎菲，都被網民捧為「女神」。由於新聞從業員有特定的裝束、規矩及禁忌，兩位「女神」離巢後，都可以做番自己，還不時在社交網派「福利照」，令粉絲大飽眼福。
黃婉曼：大台的禁忌
現年39歲的黃婉曼（Icy），2006年畢業於中大新聞與傳播系，接着加入無綫新聞部。當年，她報道天氣跳脫的一句：「我哋一齊跳出香港！」加上「吸睛」的身材，瞬間在網上走紅，更被追捧成為「新聞女神」！之後，她一度離巢發展，於2010年重返無綫的體育部，負責主持世界盃節目。其時，張國強的一句：「黃婉曼真係好，佢有『波』！」令人留下印象深刻！
跟着，Icy轉戰馬圈，擔任馬會節目《放眼馬世界》的客席主持，因而邂逅會計師兼馬主馮柏基，並於2014年結婚。雖然已成為少奶奶，但她未有停下腳步，還豪花逾10萬元到東京報讀法國藍帶製作麵包課程，更斥資7位數在鰂魚涌開設麵包學校，跟着又在將軍澳開餐廳。儘管疫情下生意大跌，但她都堅持不炒人，可是最終亦難敵加租壓力，宣布結業。
然後，Icy重現幕前，現時與梁凱寧主持港台節目《醫生與你》及《凝聚香港》。雖然仍然是一位主播，但就少了昔日在大台的禁忌，她笑言：「做正式的新聞主播外表係有啲禁忌嘅，例如：頭髮唔可以好似我𠵱家咁樣一長一短，一定要齊整，長頭髮就最好紮起，唔可以披頭散髮；同埋頭髮最好就係光滑，唔好起絲啦！短頭髮其實係最適合嘅，因為個人會醒神啲。而服裝方面，最好就係西裝啦，一定唔可以性感，報新聞唔可以放太多自己嘅感情入去啦！因為你係報道緊一啲事實，要保持中立，要好淡定。最好就唔好似我咁樣，我報告天氣嗰陣成日笑，無端端又跳出嚟！」
對於近日播出的劇集《新聞女王》，主播們急功近利，勾心鬥角，Icy坦言絕無此事：「真實嘅新聞部係冇咁多勾心鬥角。當年新聞部嘅同事，直到𠵱家，我哋都仲係好好嘅朋友。雖然大家各散東西，做咗唔同行業，但係都會成日約出嚟食飯！」至於《新》劇中有專人化妝、有人服侍戴耳機，或者以寶馬做crew車的安排，有網民投訴太離地。Icy解說：「主播係有人化妝整頭，至於用寶馬crew車就絕對無可能！關於戴耳機方面，有時我自己帶唔到，負責收音嘅同事會幫吓手。」
偷拍公安派出所
大學未畢業，已經在電視台新聞部實習的Icy，擁有許多難忘的採訪經驗：「做《新聞透視》係我做記者咁多年最豐富嘅幾年，例如：我訪問過女子監獄，深入了解啲女仔點解會犯罪；另外，我又試過半夜去追訪一啲衣物回收箱，睇吓啲衫實際去咗邊度？我於是三更半夜追住架回收車。」
至於最驚險的一次，Icy 憶述一定是當年跑內地新聞：「因為當時都仲好年輕，所以係比較大膽，例如有一段時間喺內地試過出現好多假嘅人民幣，我就試過孭住個偷拍機，然後入咗去公安派出所偷拍，結果俾人捉咗，好彩最後都冇事。」
做記者近20年，Icy表示獲益良多，見盡民生百態，兼有好深的體會，她無奈的說：「有時見到啲個案都幾心痛，例如我接觸過內地失業嘅工人，佢哋冇地方住，住喺一啲深山裏面，搭個棚，同野狗一齊生活，見到都好心噏。雖然我當年得幾千蚊人工，都好想俾啲錢佢哋做生活費，但係佢哋唔肯收。於是，我就靜雞雞放喺草叢裏面俾佢哋，走咗之後先同佢哋講。」
昔日在大台做新聞時，衝鋒陷陣攞料或是鬼馬地報告天氣，Icy發夢都仍掛念着：「我𠵱家都仲係成日發夢，見到監製叫我：『你快啲去做呢個採訪啦！』又或係發夢見到有人催促我：『快啲喇，夠鐘喇，你要報天氣喇！去化妝！』所以我個心都仲喺呢一行。其實，我𠵱家喺港台都會報道一啲民生同埋社會嘅事，好幸運可以繼續做呢一行。」
