發佈時間：12:15 2026-10-08
娛圈打女楊梓菁（Wiyona）演而優則從商，曾經營首飾店、瑜伽中心等，但前年免疫系統突出現問題，不斷攻擊身體各部位導致健康受影響，身體發出警號。她終學懂要休息，照顧自己，去年更與生意拍檔合資7位數字在大坑開設健康療癒工作室。
新穎配對
自開業以來， Wiyona為讓大眾關注健康生活，先後破格舉行女性療癒祭、「反傳統」選美會等。近日，她又有新搞作，將與合作伙伴Chloe在11月底假山頂破天荒大搞《身心靈配對計劃》，是一個集運動、心靈療癒、遊戲及正面思維講座的交友活動，歡迎30至45歲的單身男女參加，男女名額各40名。Wiyona說︰「呢個世代，好多人用交友apps識對象，但好多都唔work；加上AI盛行，社交圈子好細，人變得孤獨。我哋就構思咗一個有溫度嘅真正交流，到時設計唔同嘅活動，如清走一啲過去情感嘅心理講座、玩一啲互動遊戲、又有健身運動、營火會等，讓參加者增加自我認識，同時探討搵適合自己嘅另一半。成個活動有好多環節，要成5小時，若配對成功，我哋會安排佢哋食晚餐，繼續談心。我哋呢個絕對係《身心靈配對計劃》。」
二人透露計劃揀山頂進行是別出心裁，因為當地是香港情侶的拍拖勝地，在如此浪漫氛圍下自然事半功倍。雖然尚未公開報名，但Chloe表示反應熱烈，不少身邊友人都有興趣。她說︰「我有啲單身朋友，之前去蒲識人，但嗰啲往往唔認真，失敗好多次，唔想再去。其實媾仔媾女唔係最主要，可以透過活動識多啲朋友， 因為有啲人嘅生活圈子有限，不妨結交一啲志同道合嘅朋友。」
相信愛情
現時作為單親媽媽的 Wiyona，被問及到時會否從中搵對象？她笑說︰「雖然我係單身，但永遠相信愛情，幾多歲都唔好放棄，人最緊要開心，會遇到唔同嘅人，每個人都值得被愛和去愛，仲要愛自己。由於我今次係搞手，除要忙打理現場一切，且我又唔慣介紹去識人，我唔擔心冇拖拍，但現時以阿仔和事業為先。」二人指活動正籌備得如火如荼，日後將公布活動詳情。
