發佈時間：16:16 2026-10-07
《愛·回家之三代同糖》（下文簡稱《三代同糖》），於10月5日播出的「『褲』貴門解密」，劇情講述高冠一（容天佑飾）要求唐萬里（吳若希飾）等人為其七年前收購的成人紙尿片品牌構思廣告，期間極盡嚴苛，令萬里等人嗌晒救命。
自薦着尿片搶Fo
天佑飾演的細高生於劇中為了推廣成人紙尿片而出盡法寶，要親自上陣着尿片，向來以靚仔形象示人的他，即時給大家一個好大的驚喜，不少網友留言大讚天佑靚仔又打得，原來都好有喜感，騎呢起上嚟都可以好騎呢。
就網友的讚賞，天佑就話：「首先好多謝大家對我嘅讚賞，我都好鍾意細高生呢個角色，有好多發揮機會，至於做尿片超人，其實原本劇本冇話要着尿片，只係尿片勇士，知道係要着一件超人衫，之後我喺屋企讀讀劇本嘅時候，咁啱個女要換尿片，我就拎咗喺條尿片嚟玩，又覺得好Match劇情，所以開工嘅時候就同導演提出導演批準，啲工作人員都好熱心，個個係咁話要幫我着尿片，當日大家拍得都好開心。」
天佑困鐵籠演技大爆發
另外，容天佑因劇情所需，他要被困在鐵籠裏面，雖然場口只有一、兩秒，但台前幕後一樣絕不馬虎，除了天佑的造型夠晒落泊蒼白，為了將虛弱感演得更逼真，天佑埋位前更「特登唔食早餐」，天佑說：「咁就會攰啲，等把聲音冇開聲，所以聲音都沙沙哋。」他又續指拍攝時亦要非常小心：「因為鐵籠下面有塊木板，我感覺到有啲拮，所以嗰啲無力嘅感覺係真嘅。」
至於負責營救天佑的趙承浚Gary，鏡頭前雖然有力又淡定，但他受訪時坦言這幕「英雄救佑」的戲碼，全靠天佑用陰力頂住：「天佑有用力頂住（彎腰），如果唔係我戚唔起佢。」
容天佑自做了趙承浚Gary的老闆後，他笑言和對方的感情已經昇華到比老婆更親密。天佑笑言：「我同Gary感情好好啦，我哋有一齊去睇音樂會，因為我主要都係同佢有對手戲，劇中佢係我好兄弟，平時有break嘅時候我哋都會傾吓心事，講吓湊仔經，加上佢喺KK園區救咗我出嚟，我冇得唔報答佢啦！」
延伸內容 : 容天佑《愛回家之三代同糖》做CEO 完騷即攬「女」煙韌shopping
延伸內容：林盛斌父愛爆發 帖文激讚「金毛仔」容天佑又乖又勤力 睇好奪「最佳男配角」
延伸內容：容天佑升呢做爸爸 珠寶千金太太扶天恩順利誕巨B 笑指女兒識揀時間出世
延伸內容：容天佑新婚2個月宣布馬年榮升做爸爸 太太扶天恩家世顯赫 億萬駙馬竟恨攞政府兩萬資助
