隨心而活，跟選擇一樣，從來最難能可貴。
「我最慶幸係，我一生人都有選擇，係S嘅（眾數），好多嘅。有好多人打工，因為要搵食，有好多工俾我揀，繼承家業又好，其他都好，我揀到自己最希望做嘅嘢。
「好幸運，去到一啲Crucial（最緊要）嘅三岔口，我都可以好清醒咁，選番自己最想做嘅嘢，就係同音樂有關嘅嘢。」
68歲的區瑞強，選擇了音樂作其事業路，隨心地走着走着，一轉眼，便過了半世紀。
「我冇諗過，50年會過得咁快！我由中學畢業開始，就喺餐廳唱歌，又兼職教結他，到做電台節目、出碟、做電視節目主持、拍劇集、拍電影⋯⋯走勻5台山。」
優悠地坐在自己的黑膠碟上，區瑞強笑言：「𠵱家我每一年，都會同歌迷聚一聚，就係要保育香港廣東歌，將我最熟悉嘅歌，唱晒出嚟，傳承落去。
「雖然我只係一個微小嘅力量，但係只要係我能力範圍許可嘅，我都會繼續唱落去。」
誰不希望隨心而行？要如區瑞強那般，笑得一臉滿足、自豪，最關鍵，是選擇時的決心。

唱歌學外語

入行50周年，為區瑞強每年都舉辦的演唱會，增加多一重意義，這次他舉行3場《50．50經典演唱會2023》，除了紀念入行年期，還有另一個意思。
「我將會喺每一場Show入面，唱晒呢50年嚟最具代表性，亦係大眾最愛嘅50首經典粵語金曲。」
要於3小時唱盡50年，難免令人認為是Mission Impossible，區瑞強聞言即笑道：「我係預先喺電台同社交平台，請一啲明星朋友同大眾揀歌，綜合所有意見，再出一個歌單俾人投票，至於時間，我會挑選一啲歌唱Medley（串燒歌），所以一定唱得晒。」
在這講求互動的年代，他也與時並進，「我仲會有即場打電話點唱環節，俾觀眾喺觀眾席，即時打電話上台點唱，成功點唱仲會有我親筆簽名嘅絕版黑膠碟做禮物！」
皆大歡喜的起點，要回帶到50多年前，區瑞強拾起屬於哥哥的結他開始。
「我有8兄弟姊妹，我係細啲嗰班，所以父母都任我哋自由發揮，我見我哥哥唔用個結他，就拎咗嚟自學。嗰時興民歌，我就同啲同學夾Band，參加校際音樂節。
「我有一個同學係港日混血兒，有次放假佢返日本，返嚟就帶咗份『手信』俾我，係一首日文歌，叫〈Kaze〉，即係我後來改編成〈風〉嘅原曲。我就靠耳仔，逐粒音逐隻字去聽，聽到熟到背番出嚟。」
不論是日文，還是後來的英文，區瑞強都經過反覆細聽，再揣摩歌中意而成。「後來我對住一個日本人唱，佢同我講，聽得明我唱乜，仲話我唱到有北海道嘅口音⋯⋯哈哈！雖然係鄉下音，但起碼代表我唱到嗰種韻味。」

棄牙醫從歌

唱彈出一片天，令區瑞強多了一項求生技能，「我由中三開始，就出嚟打工，自己搵自己嘅使費，中四開始就教結他，由教同學仔彈，到去琴行教，後來中學畢業，我就自製咗3年嘅Gap year（空檔年），日頭教結他，夜晚就喺Steak house唱歌，一個月搵到幾千蚊，除咗唔使用屋企錢，仲可以儲到錢。」
唱出知名度，就在1973年，他獲邀到TVB，於《歡樂今宵》表演，自此正式踏上演藝路。
「嗰3年，我就同一班藝術家，有玩音樂嘅，亦都有畫家，合租咗一個單位，好似𠵱家啲Shared flat咁。到後來，因為我應承過媽媽要讀大學，於是諗住去菲律賓讀牙醫，報晒名交晒學費，已經去到實地視察嘅階段。
「喺當地嘅酒廊，我聽到個菲律賓人唱Live，結他又彈得好犀利，但我問佢收入嘅時候，發現佢搵得好少錢。我喺香港係靠呢樣工作去賺錢，但喺菲律賓做同樣嘅嘢，根本唔足以應付我嘅生活，而且讀牙醫一讀就八年，於是就決定唔讀，咁就做唔到牙醫嘞。」
回到香港，區瑞強更不愁出路，考入浸會傳理系的他，還得到伯樂的幫助。「可能做牙醫會發達，但係未必係我鍾意嘅，後來係Uncle Ray介紹我入港台、簽唱片公司，讀浸會嗰4年，我喺港台、TVB、麗的都有表演，都係我鍾意做嘅嘢。」

音樂DNA

除了對音樂，區瑞強對結婚35年的太太Teresa，同樣專一。二人育有兩子：昕望與昕進，均畢業於美國名牌大學，並已出身，而且俱從事跟音樂相關的行業。
「我大仔𠵱家喺一間大型嘅國際音樂集團，做數碼分析員，唔係分析啲歌，係分析Digit喎。細仔就開製作公司，我同佢喺工作上都成日合作，各自發揮專長，佢讀Marketing，擅長Social media嘅策略；我就叻音樂內容，分工合作。」
兒子各有所成，他笑言：「我冇逼佢哋要做啲乜，可能因為我都係自由發展，呢個成長經歷，令我覺得人生有好多條路可以行。所以我只係為佢哋提供選擇，俾佢哋學彈琴、彈結他、游水、打波，只要佢哋鍾意，就自然有心機學啦！」
而因工作居於外地的昕望，還為父親增添多一個身份，「我做咗爺爺嘞！其實孫女都兩歲幾，有時照鏡，都會有一種『唔係啩？我做咗人Grandpa！』嘅感覺，哈哈！」
說起孫女，區瑞強笑得更燦爛，「以前未有過呢個經驗，女仔係Sweet啲嘅，我哋啱啱成家人去旅行，好多時都坐好耐車，佢就冇停過，播兒歌佢就跟住唱。唔知係咪遺傳呢，佢成隻歌唱晒，而且咬字同發音都好準㗎。
「我都奉勸同我差唔多年紀嘅朋友，一家人做咩都好，都係咁珍貴！小朋友大得好快，要珍惜佢哋每一個成長片段。」

Now and Then and More

有時，比較不一定等於傷害。
看區瑞強與太太Teresa，由拍拖到結婚，攜手共度了45個年頭，由二人世界變成4人的溫暖家庭，至今仍不難見到，區生區太常二人同行。
「結咗婚30幾年，浪漫已經唔係送花咁簡單，最浪漫，係白頭到老，要互相體諒。而且我同太太都鍾意打高爾夫球，有相近嘅興趣都好重要。」
昔日區瑞強對太太一見鍾情，拍拖10年才共諧連理，35年後的今天，他笑稱：「我好少應酬，𠵱家每晚都盡可能返屋企食飯，出面啲嘢食太多味精嘞。」
今昔不用比，因為始終如一，比嚟做乜？