發佈時間：18:12 2026-08-20
男女約會，第一次見面，離不開吃飯，加深了解。
盧鎮業（小野）在新片《廚師發辦》中飾演私房菜廚師，透過交友App去尋找20年前的「女神」，和4個同樣叫Zelda的女生見面。一期一會，為她們煮一餐專屬的料理。
電影提及交友App，小野說：「我玩過online game，識咗個澳門人『老婆』，傾咗個幾月後就fade out喇。」
片中演其中一位Zelda的張紋嘉（Crystal），就玩ICQ認識了初戀男友，「嗰時驚㗎！真身係叔叔點算？所以搵朋友陪去現場，佢見到對辦就走先。」
咸豐年代的情緣，想想也覺得青春，更笑言以前傾3個月才約見面，現時傾3個鐘就出嚟，超爆笑！
網上情緣
現實生活中，小野和影后女友廖子妤感情穩定，Crystal和舞台劇演員男友林子傑也相戀約10年，老夫老妻，難怪二人在笑聲之中剖白情史，也不怕跪玻璃。
「我真係冇玩過交友App，細個交友就有，講緊係20年前玩online game年代。嗰時好興『招公招婆』（搵遊戲伴侶），咁我人生第一個、唯一網上情緣嘅『老婆』，就係大我一年嘅澳門人。我哋交換ICQ，傾咗個幾月就fade out，因為嗰陣仲讀緊書，我冇去澳門搵佢。」小野說。
對比之下，Crystal就實在得多，起碼拖到手。「我第一個男友係喺ICQ random認識，問佢讀邊間中學，覺得OK。其實諗番起佢可以講大話，我仲好大膽，傾咗3個月就約見面。」
小野聽見即刻爆笑：「算耐啦！𠵱家啲人傾3個鐘就出嚟。」
Crystal續說：「嗰陣我哋睇咗一套好浪漫嘅戲，然後就一齊。佢大我兩年，拍咗拖年幾、兩年後，佢移民去紐西蘭，我好傷心。呢段關係都幾浪漫，因為我讀女校，好難識男仔。」
小野聽見，形容有如《初戀無限Touch》的劇情，而身邊朋友成功透過交友App認識到丈夫或太太，也讓他相信找到真愛也不出奇。
片中二人幾乎咀嘴，最後一刻被Crystal截停，她說：「因為呢個單親媽媽知道關係唔會長久，佢可能好有感覺，但同時又存在理性。」
小野笑言好可惜，「喺林克（角色）嘅角度，佢都冇expect錫一啖就會變成間屋嘅爸爸，其實截停都好，大家想法爭咁遠。」
煮食加分
小野在片中廚藝出色，由豪宅的fine dining，到公屋的家常便飯也難不倒他。他認同揀另一半時，如果對方識煮嘢食會加分，「一個人最有吸引力係專注做一件事嘅時候，咁煮嘢食自然會好專注。」
Crystal則說：「加分位係佢肯為你煮一餐飯，呢件事本身已經非常浪漫，未必煮得好食都OK。」言下之意，是否曲線讚自己？
「我試過煮㗎！但男友話：『求吓你，唔好再煮，唞下啦！』坦白講，我對煮嘢食冇乜sense，最經典係整過一個空心蛋糕，焗完後，一刀切開裏面，空嘅？我都唔知點解可以整成咁。」Crystal笑說。
鬼馬的小野，笑言要拜師學藝，「好想學喎！空心蛋糕好有發揮空間，可以擺啲禮物入去。」Crystal說：「係咪食食下有隻戒指咁？」
小野表示，女友廖子妤提過他切東西時要平均，「我比較隨意，好似切西蘭花，有時好大嚿，有時細細粒。我上網搵recipe煮番茄炒蛋，煮到好似餐廳食到嘅味道，佢有讚我煮得唔錯㗎！」
相愛多年，他指愛情保鮮法很簡單，只要不用開大早班，兩人都重視一起吃早餐的時光。
Crystal則說：「我男友好玩得，外人覺得我哋成日嗌交，其實我哋係鬥嘴，搵方法去揶揄對方係我每日最開心嘅事。以前我哋會估下對方鍾唔鍾意，又好神秘，𠵱家改用另一種方式相處。」
延伸內容：盧鎮業《夜王》演太子峰爆紅 有指角色似鍾培生惹熱議 由幕後捱到主角 跟女友廖子妤齊響朵
等錢開飯
人生有無限可能性，小野由幕後走到幕前，收音、場記、獨立電影導演等統統做過，今年更憑《夜王》太子峰一角彈起。Crystal就由女團HotCha單飛發展，舞台劇、電視劇都見到她的蹤影。
回望低潮期，聽說小野的銀行戶口只有300港元，慘慘豬。「我唔慘呀！有邊個冇遇過？好多廿幾歲嘅人戶口都係得幾蚊，要同朋友湊夠100蚊先㩒到出嚟，嗰代人係咁。」
Crystal接着說：「出道初期，當大家以為我好風光時，其實我最窮。我哋（HotCha）咁落力玩《掌門人》節目，正正係因為我哋好需要嗰啲獎金、獎品開飯。不過我冇諗過轉行，最大衝擊只係啲姨媽姑姐見到我多演出，覺得我好有錢，或者過咗一段時間去做舞台劇，啲演員都會以為我住緊豪宅，得閒過嚟玩下舞台劇，其實我真係好需要呢份工。」
小野做過cafe幫補收入，即使專心做幕前時，也曾接幕後的炒散工作，set場擺燈。「記得有次幫音樂平台訪問C AllStar，我企後面，突然安仔（陳健安）望一望我，問：『你係咪拍港台劇集嗰個男仔呀？』我話：『係我呀，繼續做訪問傾偈吖。』」
星途越走越順，小野希望每年起碼拍到一部電影已心滿意足。Crystal就大讚小野是好演員：「希望佢可以做國際巨星，比𠵱家成就更高，唔係講笑，真心。」
學小野話齋，講到似「盧鎮業廣告雜誌」，但有目標、有夢想，並非壞事吧？
延伸內容：《廚師發辦》（The Dating Menu）新片介紹｜盧鎮業、楊偲泳、梁雍婷、張紋嘉、彭秀慧、黃溢濠主演，黃浩然及鍾宏杰執導
