發佈時間：19:15 2023-11-11
歌手馬天佑(Mayao)身為Gym Town Fitness的老闆之一，今日特別在中環舉辦一個慈善活動，並邀請了演員黎峻(Kenneth)和網紅貝依霖(Chantale)從旁協助在場的殘疾人士做拉筋動作，他們不時跪地十分落力。活動後Kenneth和Chantale均表示活動有意義，因自己都熱愛做Gym，所以一邊做運動、一邊幫人，真是一舉兩得！
記者會上，Mayao表示有份投資的健身室一直想做多些慈善工作，亦想推廣Wellness到社區，今日終於可以達成。他回想當日投資健身室，皆因老闆之一是他的健身教練，他笑言：「每次做騷前都要操，成日做運動又要食得好清，真係好辛苦，心靈好脆弱，但佢唔係淨係教你做好個動作，仲好care我個feeling。而今次係我哋第一次搞慈善活動，我一定要親身支持。」
練8舊腹肌
至於Kenneth和Chantale同樣熱愛做Gym，Kenneth更是狂熱份子，幾乎隔日就做一次，每次仲要做一個半鐘，他笑言：「主要係做一個鐘training同半個鐘消脂，好想練好腳同腹，因為腳係支撐成個身體，令運動時平衡得更好，而腹當然係鍾意腹肌嘅形狀，令成個身形線條好睇好多，（咁你操到8舊腹肌未？操得密時會明顯啲，否則6舊都有嘅，如果有時食得多嘢就乸埋一舊都有。」如果操到成效，他坦言一定會開心share，至於為工作騷肌更是無任歡迎，他笑言剃光頭都得。
重訓pat pat位
而Chantale做Gym較喜歡做重量訓練，她坦言：「做重訓可以令身體某啲部位更堅緻，甚至係增加肌肉例如patpat呢個部位，所以做重訓先有效果。」問她還有沒有其他地方要改善？她謙虛笑言：「其實全身都要做消脂運動，暫時一星期做兩次，每次做兩個鐘。」但如果抽唔到時間，她會行多啲路、戒食甜嘢、油膩嘢和澱粉質，以及去美容院做機，她坦言效果一定冇做運動咁好，只是自己感覺良好一點。同場還有「學霸甜心」Kylie C.(鄭杞瑤)現身，她稱因是該健身室的熟客，有慈善活動便來支持下。
