發佈時間：16:27 2026-08-07
在螢幕前，現年27歲的曾錦燊（Charles）經常為了正義搏到盡，他曾經在街頭狂奔追訪小偷，更曾主動請纓挑戰有危險性的採訪，獲得「東張男神」的美譽，確實實至名歸。
不過，回到家中的Charles，會卸下防備變得極為溫柔，窩心地服侍家中的「女朋友」─養了五年的英國短毛金點貓Ahri，兩口子經常在家中卿卿我我。Charles笑言，最鍾意Ahri高竇的性格，將來找女朋友，他也希望女友與愛猫的性格相似，這樣才有挑戰性。
煎熬日子
畢業於第32期無綫藝訓班的曾錦燊（Charles）表示，受訓時可謂人生最煎熬的日子，因為試過「48個鐘冇瞓過」：「人工低係冇所謂嘅，只想多啲出鏡，但係等咁耐，都淨係得鏡頭閃過一下嘅機會，所以個感覺都幾難受。當時我計過，我嘅時薪都只不過係得一個幾毫。」為了生活，他只好在街頭派香水試用裝，抑或戴上厚重又悶熱的公仔頭，在烈日下辛勤工作。每當帶着滿身疲憊回到家中，他的愛寵—英國短毛金點貓Ahri，便成為他最重要、最無可替代的心靈慰藉。
些外，面對演藝事業的迷茫與生活壓力時，Charles總會向Ahri傾訴心事，除了將牠當作專屬的樹窿之外，他又深情地說：「Ahri係我女朋友嚟㗎，本身我係單身、冇拍拖啦，佢又係女仔，返到屋企佢絕對係我傾偈嘅對象，可以俾我攬住，又陪住我，瞓覺前同佢講吓心事、錫下佢、攬住佢。」
母子關係
Charles笑言，自己挑選貓咪的眼光，也反映了擇偶觀：「我本身鍾意貓就係因為有挑戰性，同樣有挑戰性嘅女仔先啱我。有時返屋企，有啲戰利品俾Ahri，佢就好醒目喺門口等我，俾啲貓條佢、貓乾糧佢食，見到我，佢就會非常之熱情。如果冇嘢食，佢就愛理不理。其實Ahri啲性格，都幾似我想搵嘅女朋友特質，難追到、有挑戰性嘅女仔，我其實幾鍾意。」
被問到與陳庭欣的「姊弟戀」緋聞？Charles直說：「我哋喺《東張》之前已經識，佢係非常好嘅師姐。」他又笑稱，兩人其實是「母子關係」：「我成日都同佢講？我哋係兩母子，唔係年齡上，係照顧我嗰方面，佢好似阿媽咁樣照顧我。我哋係情侶？講都冇人信啦，佢好努力咁搵緊另一半㗎。」
尋找伴侶
至於，對待「女朋友」Ahri，Charles絕對細心，他表示因為自己工作繁忙，所以找媽媽同工人每天幫手留意愛貓的清潔狀況：「佢係我女朋友，我梗係要佢好乾淨啦！每日大家都會檢查佢嘅毛髮、指甲，而喺飲食上面，我每個月都會使千幾蚊喺佢身上。」為了讓愛貓身體健康，他購買許多款營養補充品；而每當家中有海鮮宴時，Ahri定會坐在椅子上一同享用，對蝦蟹更是情有獨鍾。儘管百般寵愛，Charles卻從不勉強愛貓進行任何多餘嘅打扮：「佢唔鍾意着衫，鍾意自由自在。」
因為怕愛貓寂寞，所以Charles曾將Ahri的照片交給寵物治療師，詢問對方Ahri會否想要伴侶？結果是：「佢係鍾意自己一個獨佔我嘅愛，暫時唔會想有其他伴侶。」事實上，Ahri的確非常霸道，「佢係好黐住我，有人擺隻貓喺我度嘅時候，佢即刻會抗拒。」因此，Charles目前並無打算再飼養其他寵物。此外，他還認為五歲是貓咪合適的年齡去絕育，一來沒有打算為牠尋找另一半，二來也是體恤牠：「貓貓生仔嘅過程都好辛苦，同埋對身體都有害。」
開創事業
原來，Ahri還是一隻「招財貓」。這些年，Charles的演藝工作上穩步上揚，最令觀眾印象深刻的，莫過於他在《東張西望》的表現，在訪問一宗CD店舖失竊事件時，小偷突然出現，並進行偷竊。他憶述：「見到嗰個人，我梗係行動，攞住支咪，衝出去訪問：『先生你係咪過嚟偷嘢呀？』」小偷隨即逃跑，Charles與團隊便追足他整條街，過程驚險萬分！而憑着這份勇敢，他隨即人氣急升，更獲稱讚是百分百的「東張男神」。另外，他還成功開創自己的服裝店，如今不僅能自給自足，更可付家用予父母，迎來了事業的小豐收。
