發佈時間：16:29 2026-07-29
現年42歲的前TVB小生蔡淇俊，2014年離巢後北上發展，先後開設米線店、火鍋店，惟最終相繼結業，更自爆慘蝕數百萬，被網民封為「執笠界KOL」。但蔡淇俊就堅持到底，屢敗屢戰，近年轉戰直播帶貨並成立新公司，帶領埋一班前香港藝人歌手于淼、前E-kids成員林詠倫（Alan）、前亞視花旦陳靖允等，一起帶貨揾真銀。蔡淇俊成功將事業搞得有聲有色，並在內地成家立室，家庭、事業兩得意，近日更現身短劇《失憶大師》的開鏡儀式，孖住麥玲玲拍短劇瘋狂吸粉！
開拍前一晚收劇本 挑戰記憶力
蔡淇俊雖然入行已逾二十年，但他坦言每次拍戲收到劇本都會非常緊張。他透露今次短劇是由「俊嫂」為他接下的，「開戲前一晚我先至收到劇本，只能夠通宵睇劇本，成個劇本我都要睇晒，了解角色，記住對白，第二日就要開工。」他更感嘆歲月不饒人，現時記憶力已大不如前，「而家年紀大咗，記性都差咗好多。諗番以前喺TVB嘅時候，咁厚嘅劇本，我係點樣背晒㗎呢？」
轉行從商原因 討厭被動等開工
對於當年毅然離開電視圈轉行從商，蔡淇俊直言，其中一個重要原因是對自己演技缺乏信心，「就係因為自己覺得自己演技『麻麻地』，所以轉行做生意。」他更自嘲轉行後「認識我嘅人仲多過喺娛樂圈嗰陣時」。此外，他亦不諱言討厭演員被動等待的工作模式，並引用行內名言：「拍戲十年，等足九年。一集戲裏面出演嘅時間只有十幾秒，我都要化妝等幾個鐘。」他坦言極不喜歡這種不斷等待開工的被動感，「我鍾意掌控自己人生嘅快樂，而唔係被人哋把控我時間嘅感覺。」
自嘲「過氣藝人」 抱兼職心態返娛圈
蔡淇俊強調自己一直只將身份定位為「藝人」和「演員」，從不覺得自己是「明星」。今次回歸拍戲，他更笑言是為了回應街坊的期待，「好多街坊話想睇我拍戲，為咗你哋，我就間唔中出嚟做下兼職囉，好感謝大家鍾意睇一個過氣藝人演嘅戲啊！」報道一出，不少網民紛紛留言為蔡淇俊打氣，並大讚他多年來保養得宜，多年嚟都冇變過，一樣咁靚仔！
