要回到最初，不一定是重頭開始。
50歲的區永權，最為人熟悉的身份，是《東張西望》的主持，各大小、公開或私人活動的MC，要他回到最初幹甚麼？
「如果計入行嘅話，我係1999年，以樂團『星盒子』成員身份，喺台灣出道。但係當時我未Ready，咁都要搵食㗎！」
要搵食，區永權輾轉之間，於2003年加入有線，當娛樂新聞台主播，同期還有陳貝兒、黃翠如等，一晃眼，他先由有線跳到NowTV，再到無綫正式入屋，便已20年。
「除咗唱歌，我都鍾意對住鏡頭做主持，鍾意喺台上面講嘢，最好係有實際效益吖嘛。」
20年下來，當主持，令區永權開飯，到後來的養妻活兒也應付自如，但他對唱歌的那團火，從未熄滅，於是便有了他於8月初，自資5位數製作的單曲〈把稿當歌〉。
「有人問我，係咪一個被MC耽誤嘅歌手，答案係否定嘅！MC嘅工作養起我一家，負擔到我生活龐大嘅開支，而且我又好Enjoy。
「可能好多歌手到我呢個年紀，應該係準備封咪啦，但係我覺得，出一首Solo嘅廣東歌，係我嘅人生中重大嘅計劃，點都要完成佢！」
難得的，從來都是保持初心。

24年一遇

雖說音樂無地域界限，但24年前，區永權出道時，唱的是迎合台灣市場的國語歌；到兩年前跟伍仲衡、蕭正楠組成「HEA」，唱的是合唱歌，要獨自擁有一首母語廣東話作品，這是他的首次。
說到圓夢新作，區永權笑言，能以5位數字完成，全因做得夠慳。「做一首歌好貴！喺Studio錄音係錢、拍MV又係錢，業界最慳咁做，都要用6位數，我用5位數就埋到單，係全靠好多嘢都係拍膊頭，我碌盡人情卡，搵朋友收友情價，其中有個導演，幫手將我平時做MC嘅花絮，剪咗個MV。」
音樂人出身的區永權，曾於2003年為容祖兒的〈忽然單身〉作曲，翌年還包辦曲、詞，成為CASH流行歌曲創作大賽的亞軍。「久別重逢」，這次他為新作作曲，去年以「HEA」名義開Show時，已率先獻唱。事隔1年才推出，原因是：「伍仲衡太忙嘞，錄音要等佢有期！首歌基本上係我寫嘅，但我有一段長時間冇掂音樂，要請佢幫我執執；填詞就搵咗我『星盒子』嘅舊隊友徐繼宗，劉德華嘅〈十七歲〉佢都有份填詞。」
舊隊友兼好朋友，對區永權最了解不過，他笑言：「本來我只係想歌詞寫一個人，本來以唱歌為夢想，但現實嘅環境因素，令佢唱唔到。徐繼宗幫我加咗個Concept，將『把酒當歌』扭到『把稿當歌』，首詞係一個司儀嘅稿，變成歌唱俾人聽。
「成個Flow好正，連我老婆聽完，都感動到想喊。」

體現真．友愛

能於20年前初踏主持之路，是區永權為生計當商場歌手，被介紹到有線，擔任當時初開台的娛樂新聞台主播，還跟同期的陳貝兒、黃翠如等人，成了好友，至今也迎來20年紀念。
而後來「HEA」的組成，也是源於黃翠如。「後來同阿蕭（蕭正楠）熟，都係因為蕭太，哈哈！有次佢約我去佢哋屋企玩，去到黃翠如同我講：『我老公要同你唱歌。』仲要拍片擺上網，於是我揀咗唱張學友嘅〈李香蘭〉，網友嘅反應幾好。
「阿蕭仲同我哋起咗個名叫『一筆區蕭』，upload片又唱埋公司嘅show；之後我介紹佢識多個朋友，就係樂壇神之手伍仲衡，跟住我哋3個仲變埋組合，開埋演唱會。」

一個好爸爸

事業有成，繼而一圓Solo夢，區永權現在的家庭生活，也是100%美滿：跟太太Clara結婚邁向15周年，二人的兒子Aiden跟Ambrose也分別12歲及11歲，說起妻兒，原本已談笑風生的他，更見雀躍。
「我唔係虎爸或者咩嚴父，其實做爸爸之前，我係唔知道自己係咁鍾意小朋友，因為我嘅原生家庭⋯⋯點樣講得Mild啲呢？係唔係好和諧嗰啲，咁冇人教我嘅爸爸媽媽點做人父母嘅。」
養兒方知父母恩，區永權也不例外，「而當我做咗爸爸之後，一方面睇住個暖水壺咁大嘅物體成長，一方面開始明白，以前我嘅父母，為咗搵食而冇時間去陪伴我。所以，我會知道陪啲仔係我人生重要嘅事。
「好似禽晚咁，我同細仔打FIFA，俾佢數咗我5：0，我就嬲啦，點知佢一句：『至少你可以同個仔一齊玩，唔係好開心咩？』，我先覺得係喎。」
年尾便12歲的Ambrose，現在開朗活潑，但早於他十多個月時，幸得Clara細心，發現兒子患有自閉症，才能及早就醫。
「好在我老婆，嗰時發現細仔嘅行為，同大仔好唔同，老婆初初話要帶個仔去Check嘅時候，我係唔想嘅，因為我覺得咁樣會標籤化咗個仔，但係後來都決定要面對。
「當時老婆就日日帶個仔，上晝返學，晏晝就去治療，用咗幾年時間，佢先『跳番出嚟』。」
經過考驗，區氏一家現在4為一體，10號風球也打唔甩。

Big Boss MC

MC，是節目的靈魂，要掌握活動節奏、熟記Rundown、臨場執生、搞活氣氛、適時互動⋯⋯才能令活動圓滿，缺一不可。
區永權是近年的成功MC，以上所述的條件，他無一從缺。不過，「區永權」這個盛大活動，誰是MC？
除右頁的持家有道、甘苦與共，試翻至本欄首頁，看看為區永權化妝Set頭的「鳴謝」，Clara So，正是區太本尊。
「『區永權』這個節目，靈魂就梗係我老婆啦！冇老婆，又點會有啲仔呢？我係認真㗎！
「我哋一家四口係Team work嚟嘅，而且當年我一年抱兩，係我人生其中一項成就解鎖。有人話係咪我過度好色呢？我覺得係佢哋誤解咗我，其實我只係配合者，我唔係入波嗰個，只係中場樞紐交波俾人㗎啫。（一笑）」
說起老婆，區永權既感激對方把家中事務，處理得頭頭是道，下一秒便笑說：「我老婆今朝先話我，掛住去攞車冇拖佢。好在𠵱家有我細仔頂一頂更，拖吓佢、攬吓佢，佢已經好冧。
「我唔係好浪漫嘅人，但重要日子都會送吓花，盡點綿力啦！身體嘅互動都好緊要，我OK嘅，哈哈！」
那你找到你的MC了嗎？