發佈時間：14:00 2025-07-08
90年代的諧星、現年71歲的八両金（葉競生），縱使外形和作風騎呢，但他當年炒樓、炒股狂賺，聲稱身家「億億聲」，後來遇上97金融風暴，身家大縮水。有指，他的老婆八両菜（何顓彤），因而拋夫棄子「走佬」，導致夫妻關係決裂。不過，兩人於前年、離婚26年後，竟然冰釋前嫌，還激罕合體。
可惜，好景不過兩年，八両菜忍不住向《東周刊》大爆，八両金多年來的惡行，包括︰家暴、出軌、刻薄、孤寒、大話連篇、機關算盡等等，既撕破前夫的真面目，還披露他原來患上癌症，命不久矣，八両菜更決絕的說︰「佢患癌係報應！」不過，八両金就激動地反擊：「佢造謠犯口孽！」
八両菜哭訴 多年來備受擺布
曾自封「香港最醜男人」的八両金，縱使外表騎呢，但卻搵到盤滿缽滿。1993年，39歲的他還娶到一個年輕廿載的老婆八両菜（Polly，何顓彤），翌年兒子八両仔（葉小霆）出世，一家三口看似幸福美滿！可惜，一場97年金融風暴，導致八両金身家大縮水；之後，有指八両菜離家出走，搞到八両金父子相依為命。直至前年、兩人離婚26年後，竟然戲劇性大和解，闔家大團聚。當時，八両金表明家門隨時為前妻打開，「我間屋有4間房，各自瞓一間，可以一齊食飯，就當是朋友一齊住，我冇所謂。」
原以為八両金一家終可幸福快樂地走下去，但日前八両菜卻向《東周刊》直指廿多年來慘遭對方擺布，終於忍無可忍要爆大鑊︰「佢當年想我搵多啲錢，踢我去做地產，又成日檢查我戶口簿，佢冇俾家用，佢仲要我俾錢佢，小則5、7千，多則過萬。若搵少咗錢，佢就左一巴、右一巴，拳打腳踢，剉我心口，一個星期幾次家暴。（有冇證據？）當年地產舖同事見我臉有瘀青，有個數學老師同我去過西灣河警局報警。」
延伸內容 : 八両菜含淚剖白：「冇攞過八両金一分一毫！」大病後決定復合？
延伸內容 : 離婚26年激罕合體！ 八両仔望父母復合 八両菜開金口唱《似水流年》送父子
八両菜爆「復合」有內情
除了身體受創之外，精神亦都受盡折磨，故八両菜長期以淚洗臉，還試過抱住5個月大的八両仔企圖去跳軌。直至，她揭發在太古城的寓所內，有一個長期上幾重鎖的櫃，內裏原來收藏了八両金背妻出軌的證據，「佢嗰次凌晨去拍戲，漏低咗鎖匙，我開咗個櫃，見裏面好多佢啲女朋友嘅相同影片。自此，我就冇再流淚。」之後，八両菜還離家出走。
憶述陳年往事，八両菜仍忿忿不平，但舊恨未除，為何前年跟前夫「復合」？她說︰「當時，我身體唔好，體重暴脹至200磅，又入咗幾次醫院。我整親腳嘅事，有求助八両金，佢嗰時要求復合，我有問佢︰『你有咩令我晚年生活好啲？你會唔會搵個單位安置我？個仔同你阿妹呢？起碼你要令我哋老來安樂先得。』佢唔啋我。香港嫌貴，中山、珠海都買得起啩？佢淨係話租，退休嘅錢亦都冇着落⋯⋯你俾佢𠱁入嚟，就要孭起成頭家。」
八両菜越講越激動，還將八両金真正「復合」的目的透露︰「因為佢生癌症，想有人照顧。（佢患咗咩癌？）留番啲私隱。佢可以5、6千元請個工人，但唔願意拎7、8千元使費俾你。佢想有個女人分擔頭家，佢自己嘅錢，就同個仔使，你嘅錢，係幫佢屋企『扶貧』，佢家姐、細妹、細佬定時定候拍門上嚟攞錢。（佢病情如何？）喺2023年得知，我諗佢得番幾個月，個幾月前，我睇到佢嘅新聞，佢水腫，塊面腫緊。」
八両菜爆前夫患重病 周圍借錢
八両菜聲稱有從事照顧癌病者經驗，所以看見八両金身上多處水腫，推測已屬晚期。對於前夫患重病，她決絕的說︰「係報應。我唔會喊，可能會慶祝，係我嘅解脫，佢唔好再好似鬼咁纏住我。」
夫妻再見不是朋友，八両菜力斥八両金老謀深算，離婚後身邊女人團團轉，並且專搵一些內地女學生及有家底的女人，她輕視的說︰「佢之前有個湛江女人，貪人哋老竇有兩層樓。」即使有重病，八両金未有對外公布，反而有錢的他，仍向周遭朋友借錢，八両菜謂︰「到時佢唔還，上咗天堂，你咪上去追佢咯，佢係從來都唔找數㗎。」
今年51歲的八両菜，回望半生，近年左眼有青光眼，左腳小腿有疤痕，亦有過一段破裂的婚姻，還有一個不長進的30歲兒子。她指有日叫兒子陪八両金睇醫生，兒子寧願瞓到中午，卻叫工人代勞。她說︰「我之前俾過提議佢（八両金），佢搵錢叻，又群咁多商家，我實幹型，個仔咁懶惰，將來等個仔有照應，不如攞30、50萬蚊出嚟，俾我搞外賣、小食店，俾番個股份你養個仔，咁咪你好、我好，但一講到錢，佢就會拉黑（刪除）我。」
講錢失感情，八両菜現時獨自生活，自力更生，上門幫人煮飯，閒時做義工，對於前景，她自言︰「見步行步，冇得諗。」
八両金反擊：佢犯口孽
對於八両菜爆八両金患重病及惡行一事，《東周刊》致電身在廣州的八両金了解，聲如洪聲的他，對指控回應︰「佢（八両菜）唔正常㗎，發神經，成日周圍亂咁噏話我得番兩、三個月命，咒我死。你聽吓我把聲，老虎都打死幾隻！你睇吓我3個月後，仲係咪尚在人間，到時你嚟廣州搵我，我請你食飯。佢經常抹黑我，刷存在感，佢又唔講吓當年投資蝕咗十幾廿萬，都係我幫佢填數。其實，我都修行咗廿幾年，如果造謠，周圍咒人，係犯口孽有報應㗎。我𠵱家一條女都冇，專注事業。」
