發佈時間：13:20 2026-07-22
外號「細貓」、今年32歲的唱作歌手應智越，曾大方分享自己從一名「不愛貓者」，蛻變成為極度稱職「鏟屎官」的心路歷程。
對於應智越而言，現時他家中的三隻德文捲毛貓—「夢夢」、「尾尾」及「蛋蛋」，不僅是生活上的傲嬌同伴，更是在社會大環境低迷時，引領他走出精神內耗、尋回心靈平靜與音樂靈感的「心靈導師」。
外號的由來
談起與貓的緣份，應智越笑言這是一場奇妙的命運安排。由於他性格冷傲，似足一隻貓，所以自小被親戚朋友稱呼為「細貓」；而他的胞兄、導演應智贇則為「大貓」。因為與貓性格相似，反而令應智越對貓產生了一種抗拒感，他坦言：「本身我幾唔鍾意貓，係因為我覺得我性格同貓太似囉！貓唔會主動過嚟黐你，佢哋缺乏咗一種好直接、好親近嘅感覺，我其實鍾意養狗多啲。」
適逢有朋友生了一竇德文貓，詢問要不要領養一隻？接着，應智越就開始深入蒐集資料，發現德文貓是一個獨特的品種，跟着徹底顛覆了他對貓科動物的刻板印象。現時養了三隻德文貓，包括：爸爸「尾尾」、媽媽「夢夢」及兒子「蛋蛋」，他興奮地分享說：「我做咗好多資料蒐集，呢個品種嘅貓，性格好似狗仔。佢哋同一般鍾意匿喺梳化底嘅貓好唔同，佢哋好親近人、好friendly，日日都黐住我。佢會同我一齊瞓覺，肚餓又會主動過嚟搵我，放工返到屋企又會飛埋嚟，又會自己去廁所，真係好神奇！」
歡樂與擔憂
除了性格吸引，德文貓更解決了應智越對貓過敏的後顧之憂。原本屬於過敏體質、對貓毛及貓唾液會產生反應的他，發現坊間有特定貓糧，竟然能夠改變貓的唾液成分，從而降低人類的致敏原。他驚喜地表示：「我養呢款貓，完全冇敏感！坊間有貓糧，原來可以令到佢哋嘅口水成分改變，令我嘅敏感降低。」
在照顧貓咪的過程中，應智越獲得了無數的歡樂之餘，也體驗了作為「家長」的擔憂。當提起愛貓的健康狀況時，他至今仍歷歷在目：「有一次我『個女』（「夢夢」）病咗，消化不良，見到佢放屁放得好辛苦，成個身喺度震晒，嗰刻我真係好驚！即刻坐的士去二十四小時嘅寵物醫院，好彩食咗益生菌同藥之後好番好多。」
絕育小插曲
除了突發的疾病之外，半年前幫「尾尾」做絕育手術時，也讓應智越心痛不已，他憶述：「幫『尾尾』絕育開刀嗰陣，睇到真係好心痛、好令人擔心，就咁幫佢拆咗兩粒蛋，令佢捱咗一刀。」有趣的是，在安排「尾尾」絕育前，還發生了一段插曲，大約在去年十一月，「夢夢」突然懷孕，誕下四隻貓BB，應智越留下其中一隻並改名為「蛋蛋」，其餘的便贈予朋友。
因為需要上鏡，所以應智越嚴格控制自己的體重，同時亦為三隻愛貓準備多一份健康餐，他笑指：「我成日減磅，所以成日都會整雞胸肉食，順便整多一份佢哋食；另外，我會當佢哋狗咁樣養，每星期都會帶佢哋出去散步一至兩次。」每逢寵物節，應智越更不會缺席，出錢出力為牠們補充營養品及添置日用品，錫到燶！
