發佈時間：18:43 2026-07-07
單身多年的楊玉梅（Strawberry），活得優雅自若；此外，她還決定終身不生育，並早已將滿腔的母愛傾注在毛孩身上。對她來說狗仔從來不是寵物，既是骨肉，又是無可替代的心靈慰藉。可是，愛得愈深，痛得愈切。
經歷過四隻愛犬接連離世的椎心之痛，她曾以為自己再也無法承受這種生離死別；直到半年前，一隻名為「Happy」的雄性小狗走進她的生命，牠雖然調皮，還會抓傷「媽媽」，但卻展現驚人的靈性，楊玉梅分享說：「我做嘢好唔開心、受到委屈，返到屋企，我滴眼淚，佢真係行埋嚟，同我舔眼淚！」
考牌自救犬
今年61歲的楊玉梅（Strawberry）是圈中出名的「潔癖達人」，對衞生要求極其嚴苛。回憶起當初養狗的點滴，她坦言雖然自己非常潔癖，但為了狗仔的衞生，她逼着自己做了一個驚人的決定：「我以前同時間有四隻狗，分別是芝娃娃、史立莎、約瑟爹利、貴婦狗，我因為拎佢哋去寵物店剪毛，跟住佢哋有皮膚病，但係我有潔癖，我又成日同啲狗仔瞓，最後我為咗佢哋，扚起心肝，自己走去考寵物美容師牌。」
到寵物美容學校實習的日子，對楊玉梅來說，簡直是一場噩夢。因為那裏充滿了髒污與異味，每天都是對心理極限的挑戰：「嗰時去做training好慘，全部俾我哋練習嘅狗仔，真係又污糟又臭！見到嗰啲成身泥同埋成身屎嘅狗仔都想嘔！我又有潔癖，不過冇辦法，我捱吓捱吓又真係考咗個牌番嚟。」回到家後，她化身「魔鬼教練」，親自培訓傭人，她又笑說： 「返到屋企我教工人做，因為有四隻呀嘛，我一個人邊度搞得掂呀？為咗佢哋乾淨，我從來都唔帶佢出去。」害怕外面的細菌與寄生蟲，她的狗成了名副其實的「溫室小花」，足不出戶。
四隻愛犬被楊玉梅視如己出，而在她的悉心照料下，牠們都走到了十四、十五歲的高齡，這是因為她對飲食的執着，亦正是牠們長壽的秘訣。她表示：「我之前啲狗仔都好長命，要好好照顧佢哋，我唔會俾佢哋亂食嘢，我會俾佢哋食天然嘢，我唔會俾佢食罐頭，我唔會俾佢哋食出邊嗰啲副食品。我獎勵佢哋就俾新鮮雞肉佢哋食，平時我又會俾啲菜、南瓜佢哋食，所以佢哋都好健康。」
可惜病魔與歲月終究無情，談及四隻愛犬相繼離世的過程，楊玉梅眼中馬上泛着淚光，因為那是她人生中最沉重的痛，她無奈的說： 「佢哋嘅離世，我都好傷心，喊足十日十夜，仲慘過失戀！見到佢哋死咗我又唔想養⋯⋯」
她繼續憶述：「第一隻離開係約瑟爹利，當時我將佢放咗喺醫院，佢應該知道我就快到醫院，佢見到我先肯走，嗰晚我成晚攬住佢喊。跟住，第二隻係芝娃娃，佢係心臟病，佢喺洗手間門口走嘅⋯⋯係好突發。而史立莎係因為有癌症，不停嘔血唔食嘢，我見到佢好辛苦又幫唔到佢，佢拖住條命都冇用，好多人叫我幫佢打支針俾佢走，當時我就同佢講：『如果你真係唔舒服，你就安心走啦！』我講完之後第二日，佢就走咗，佢走嗰時，我都喺佢身邊。最尾就係貴婦狗，我都好唔捨得！」
親洗最後澡
在愛犬化為灰燼前，楊玉梅一定會親手為牠們洗最後一次澡，這是她身為「媽媽」的最後溫柔，她慨嘆的說：「全部佢哋火化之前，都係我幫佢親手沖涼，每一隻狗走嘅時候，我都同佢哋傾偈、幫佢哋沖涼、錫埋佢哋。我同佢哋講：『點樣，你都喺我身邊。』𠵱家佢哋嘅骨灰都放咗喺屋企。」彷彿牠們從未遠去，卻也成了她心頭揮之不去的傷感 。
痛失四犬後，家裏空蕩蕩的寂靜讓楊玉梅難以適應。半年前，她終究敵不過對毛孩的思念，迎來了新成員、雄性的貴婦狗「Happy」，她坦言：「心思思好想養番狗，半年前就買咗佢番嚟，佢叫Happy⋯⋯之前四隻真係好乖，呢隻就有啲曳，𢱑到我損晒，冇辦法！」雖然Happy偶爾調皮會抓傷她，但卻展現出驚人的靈性，在無數個深夜裏，牠治癒了「媽媽」在工作上受到的委屈，她分享說：「我做嘢好唔開心、受到委屈，返到屋企，我滴眼淚，佢真係行埋嚟，同我舔眼淚，好有靈性！佢好似好想話俾我聽：『媽媽你唔好唔開心、唔好難過。』有佢嘅支持，個心真係好甜！」
最後，面對坊間屢見不鮮的棄養潮，楊玉梅直說：「我養得佢就唔可以棄養佢，一定要養到佢壽終正寢。對毛孩要有責任，養寵物真係要諗清楚！」她字字鏗鏘地發出呼籲！
