發佈時間：11:00 2026-07-01
現年25歲的王汛文（Candice），於2024年參選港姐，並獲得「友誼小姐」，之後簽約無綫成為「親生女」，正式入行。因為擁有「周秀娜與陳法拉混合體」的外貌，故選美結束後短短一個月，她便獲高層青睞，欽點加入王牌節目《東張西望》，迅速「升呢」成為「東張女神」。
由加拿大學成歸來的Candice，曾經有過一段迷惘期：「好迷惘，做咗兩年嘢日日返office，做秘書日日都係做文書工作，所以當時阿爸阿媽都想我選港姐。前年，阿媽同我講，如果我再唔參加，遲幾年就年紀太大喇！我諗咗一陣，就決定咗試吓，如果唔得，再做其他嘢，反正冇嘢會輸。」
縱使選美已經過了兩年，但當時的心路歷程，Candice依然歷歷在目：「我遞表嗰陣時真係好驚、好驚！心諗算啦，無綫都未必揀我。到真係揀我嗰陣時，我又覺得自己未必會入圍；跟住到佢俾我入圍，我又覺得自己未必攞到名次囉。但一路行落去，又覺得幾啱我，好玩同埋好有新意。」Candice又笑言，參選港姐確實是她人生中最大膽的決定。
回想當初剛加入《東張西望》擔任外景主持，Candice坦言壓力大到爆煲：「其實我好驚曱甴，老鼠屋我都仲可以接受到。因為我鍾意做一啲平時我唔會做嘅嘢，跳出我嘅舒適圈，所以導演問我是否做嘅時候，我選擇咗去做，咁就要硬着頭皮上。」
驚魂未定
提起做曱甴屋的採訪，Candice至今仍驚魂未定：「拍咗好多次，我記得最深刻係去到伯伯嘅屋企。我哋發現咗佢喺間屋嘅出邊瞓，同佢傾完之後，發現原來佢平時唔喺入邊瞓，係因為裏面太多雜物同曱甴。我哋於是搵埋社工一齊上去睇，到最後仲一齊幫手執屋，足足執咗8個幾鐘頭，跟住有新嘅傢俬搬入去俾佢。」
她續說：「雖然我唔係做最污糟嗰part，而係做出邊嗰一part，幫手抌嘢，同埋幫佢攞晒啲嘢出嚟，但攞完嘢出嚟之後，幾個鐘之內就變咗勁多曱甴！最震撼嘅一幕，係有個人攞咗一把遮出嚟，點知一打開，全部曱甴喺把遮度飛晒出嚟！因為畫面實在太驚慄，所以最後呢一幕係冇出到街！」
需要面對自己最害怕的甲甴，甚至帶有突發危險的工作，Candice繼續堅持下去。原來，她曾經獲得前輩黎芷珊在港姐特備節目中點名力讚，指她做足功課兼有主持潛質，這番話她銘記於心，所以不要輕易放棄！
Profile
姓名︰王汛文
洋名：Candice
年齡：25歲
身高︰166.5cm
體重︰49kg
三圍：33”、24”、 35”
藝歷︰當選2024年度《香港小姐》的「友誼小姐」及十強佳麗，跟着獲無綫簽約成為「親生女」。主持節目︰《東張西望》、《香港系列之原味道》、《周六聊Teen谷》等；曾參加選秀節目《魔音女團》。
