發佈時間：18:43 2026-06-26
四年一度的《世界盃》又開波，再度燃起無數球迷的熱血，對新城電台DJ科林（吳浩賢）而言，世界盃更是一個開啟他收藏球衣的奇妙起點。
在大氣電波中一向以鬼馬、活力見稱的他，自從在上屆《世界盃》被日本隊的拼勁與精采畫面瘋狂洗腦後，不自覺地患上了嚴重的「衫」心瘋。由當初湊熱鬧、純粹追求穿搭「型格」的貪靚新丁，到後來深入研究球員故事而彻底「中毒」，在短短數年間，科林將屋企打造成珍藏近400多件的球衣的「衣甸園」，數量多到足夠他在一年裏每日着一件。
獨愛日本隊球衣
這天訪問，科林帶了數篋球衣到來，拍攝時更親自將最喜愛的款式鋪滿了整個影樓。談起儲球衣年資，他笑言自己只是新丁，「當初『入坑』的理由非常膚淺，純粹覺得球衣穿搭夠『型』！但深入了解之後，知道每件球衣背後球隊和球員的故事，然後再着上身，感覺成件事層次昇華咗。而最正係，出街絕對唔驚撞衫，如果捧嗰隊贏咗波，第二日着住行街真係帶住一種『勝利者嘅姿態』。即使喺條街見到着住同款球衣嘅路人，大家仲會有一種惺惺相惜嘅眼神交流，幾好玩！」
在接近400件珍藏當中，科林笑言最多是日本隊的球衣，「我喜愛的球員包括三笘薰、上田綺世，到骨董級的本田圭佑、香川真司的球衣，無論是主場、作客，或是龍門的款式，只要庫存未有，我見到就一定買。粗略點算，現在收藏了近50多件日本隊球員的球衣。」
中古店市集尋寶
買到喜愛的珍藏球衣固然開心，但科林笑言，最享受卻是尋寶的過程。「香港好多上樓嘅波衫舖賣舊款球衣，但『好嘢』真係可遇而不可求，遇到啲罕有款式，就要當機立斷買下。」
每次到日本旅行，他更會「雷達全開」，專程去一些賣中古服飾的店舖和大型市集搜刮舊款球衣，「一般球衣價錢由數百至數千元不等，但儲儲下發現，部份更有升值潛力，所以有啲價格較貴價嘅款式，只要負擔到都會買。」有次錯過了一件日本傳奇門將川口能活的經典黑色「火焰」龍門衫，就讓他最「揼心口」。
「嗰次喺日本見到件衫標價折合港幣三、四千元，我當刻嫌貴，諗咗一陣，點知有個外國人喺我面前直接拎走件衫，頭也不回攞去cashier畀錢，從此，我就冇見過呢件『神物』售價低過呢個價錢，𠵱家更瘋狂升至5位數字。」
歐洲球星追碧咸
除了東瀛風，科林亦深受父兄薰陶而留意英格蘭隊，他更自爆是萬人迷碧咸的粉絲：「我細個好鍾意碧咸、純粹因為佢係明星、靚仔又踢波，當時見佢剪咩髮型，我就跟住剪。到近年由追星變成了「追衫」，買了不少『碧咸』出戰英格蘭款式的球衣。」
珍藏中，他亦有少量簽名球衣，「香港近年請好多球星嚟作賽，有次巴西經典球員卡路士隨皇馬來港，我見有機會見到佢，就拎件球衣去簽名和合照。另一次賀歲盃，我準備咗件球衣俾球員簽名，但最後只簽到意大利的迪比亞路。波衫通常簽名簽前面，但我太緊張簽咗喺後面，我之後搵人印番迪比亞路個名上去，成為一件獨一無二的特別版球衣。
「收藏初期，只要心血來潮，我嗰日就會全日出動去搵某一件球衣，好瘋狂，但現在心態就變得隨緣，遇啱先買。雖然現在球衣已儲了一定數量，但在神級收藏家面前，自己只是「皮毛」。」
他又笑言，收藏的球衣還有附帶一個特殊功能，「我收藏嘅每一件球衣都會着，而舊款剪裁寬鬆、衣袖又闊又長，簡直是遮住身上肥肉嘅神物，啱晒我，哈哈！」
戰勝癌症 港隊全員簽名波衫打氣
在眾多藏品中，最被他視作「靈魂支柱」的，卻是一件從未曝光、簽滿港隊全隊上下名字的波衫。科林透露，去年他曾因不幸患上癌症而要停工休息，經歷了一段相當煎熬的低潮期，一位老友知他熱愛足球，竟默默奔走，在一件港隊波衫上，集齊全隊球員的簽名送給他沖喜兼打氣。「呢件港隊波衫背後嘅友情，真係幾多錢都買唔到。」
