發佈時間：13:10 2026-05-29
珠寶商謝瑞麟的孫女Bethany，日前在社交網自爆19歲讀大學一年級時，因懷孕停學一年半。重返校園後，最後一個學期又再大肚，但她未有放棄學業，成功戴上四方帽。25歲時，她已有3名子女，「年輕媽媽唔代表一定會失敗。」
現時變身KOL圈粉的她，在IG自介為「嫁了給韓國人的港女」，更捉埋韓國老公Jaemin上鏡，放閃稱兩人的邂逅有如韓劇的劇情，「最感動係佢為咗我戒煙，嫁得過。」26歲，有家底，又有老公子女錫，其實是人生勝利組才對。
3子之母
Bethany比韓國老公Jaemin年輕9年，兩人在8年前認識，現時育有兩女一子，分別7歲、4歲和7個月大。
港女嫁韓國oppa，而且19歲年紀輕輕就生第一胎，除了緣分，還是緣分。Bethany說：「8年前，有間韓國明星公司去加拿大搞audition，我同幾位韓國朋友貪玩去參加，當時有一個評判同攝影師，個個都話：『嘩！不愧為韓國明星公司，連攝影師都靚仔過人。』冇錯，個攝影師就係我老公。」
發現懷有首胎時，Bethany正就讀Emily Carr University of Art + Design的一年級課程，她決定停學，待生B後繼續學業。當其他人放學去玩，她就趕回家湊B，後來再次懷孕，她仍不放棄讀書，照趕project，最終成功與同齡人同年畢業。
她堅定地表示沒有後悔早生仔，至於網民好奇她老公現時的工作？她就找來老公拍片親自回答，原來他在德國公司做SAP軟體工程師已11年，在韓國又經營小生意。
談到對老公心心眼的原因，她說：「我覺得佢係一個好堅持同有大志嘅人，最感動係我唔鍾意聞煙味，佢二話不說戒煙，所以揀咗佢囉。」
Oppa老公
Bethany開IG做KOL，標注「couple 、beauty、family」，不時分享美妝心得、家庭生活和港韓文化，連李麗珍女兒許倚榕都是其粉絲。
做了韓國新抱多年的Bethany，說得一口流利韓文，她解釋：「識咗我老公之後學嘅，以前鍾意K-pop識好少。」相比之下，她老公Jaemin就沒甚語言天分，最叻講的廣東語是「起身」，有次她拍片叫老公講廣東語，結果變成估歌仔遊戲，聽到𢱑爆頭都聽不出他說：「你鍾意做啲乜嘢？」笑死網民。
另一次，Bethany拍了段片，問老公：「oppa，如果我突然死咗，你之後再婚，咁你死咗，會埋葬喺新老婆定我隔籬？」誰知老公反問：「新老婆靚唔靚？」激到她紮紮跳，指老公超現實，炮製「車頭相」抗議。
Bethany一家現定居加拿大，間中會回港探親，山頂的杜莎夫人蠟像館、海洋公園等地方都有他們的蹤影。雖然她曾指老公不像韓劇男主角般浪漫，如今年情人節，鮮花欠奉，但耍花槍這回事，明嘅。
