發佈時間：14:20 2026-05-11
薛家燕、肥媽（Maria Cordero）和黃夏蕙昨晚（10日）出席《開心大派對》十周年母親節盛宴，本是開心慶祝，卻因李家鼎與長子李泳漢的家庭糾紛，令二人均心痛81歲鼎爺被掏空家財，痛斥李泳漢不孝，勸他靠自己搵工，不要再將老父當人肉提款機。而身為李泳漢和李泳豪契媽的黃夏蕙，則希望一家人以和為貴，兩兄弟好好孝順父親。
肥媽怒斥無良心到極點
肥媽直言忍無可忍，因為鼎爺為此事喊了幾次，「我聽到老人家喺電話喊，真係心傷。」她大罵李泳漢無良心，指施明離世10日後先話俾鼎爺知：「點做得出唔畀爸爸知阿媽走咗？無良心到不得了！」
肥媽坦言勸過鼎爺好多次放手，但他不肯，一時話個孫要交學費，一時話個仔唔夠錢使，她稱：「你一直養佢，唔做都有錢，佢又點會做嘢？由細縱到現在，縱壞晒！」她心痛鼎爺捱到個人瘦晒，手震到連公仔麵都食唔到。
肥媽話老人家要先照顧好自己，夠錢理自己然後先幫人，她續說：「唔識感恩嘅人費事理佢。」她更冷笑說：「要化解都係佢個仔去化解，都係為錢啫，為孝心咩！」肥媽最後表示會煲湯給鼎爺飲，希望他好好保重身體。
薛家燕稱夠大隻可去做保鏢
薛家燕表示明白肥媽為何咁勞氣，因為鼎爺年紀大又為家庭付出好多，做仔的不應要求太多，有需要就靠自己努力，讓爸爸安享晚年。她表示家庭應該充滿愛和互相扶持，不可以單方面要求而不付出。
對於李泳漢聲稱學歷低搵唔到工，家燕姐直言只要肯做，呢個世界沒有餓死的人。她笑言李泳漢「咁大隻又夠惡」，絕對可以去做保鏢。她又指曝光錄音中李泳漢對爸爸講粗口非常唔啱，她說：「佢應該要尊重爸爸，要求唔到就自己努力。」至於細仔李泳豪為爸爸出頭，家燕姐認為他是為父爭取，新抱叫鼎爺唔好使咁多錢，都是想他可以留番錢自己用。
黃夏蕙心痛兩個契仔紛爭
李家鼎與長子李泳漢的家財糾紛越演越烈，身為契媽的黃夏蕙出席活動時表示非常心痛。對於李泳漢聲稱中學未畢業難搵工，黃夏蕙直言只要肯做，唔會搵唔到工。她指子女應該要工作孝順父母，唔需要父母擔心。她感慨地說：「媽媽已經離開，爸爸係佢哋唯一親人，要好好孝順。」
黃夏蕙透露因自己工作忙，與兩位契仔長時間冇見面，不太了解他們的家事，都是睇新聞才知道。對於李泳豪不知施明墓地地址，黃夏蕙稱如果她知道地址一定會告訴李泳豪。她又表示不希望李泳漢按樓，因切肉不離皮，他們是爸爸和細佬，應該以和為貴，她相信他們能夠慢慢解決事件。
