發佈時間：16:41 2026-04-03
農夫日前公開發售第2場《農夫全香港最好笑嘅演唱會》門票，並於1小時內售罄，陸永與C君對此均感到受寵若驚，今日（3日）還開心宣佈加開終極母親節日場。演唱會一開就爆，是否搵麥玲玲師傅算過？陸永笑言玲玲姐仲算緊自己有冇飛俾朋友，並坦言為了農夫會做一樣嘢。
16年後開到3場有進步
農夫16年前在紅館舉行一場演唱會，冇諗過16年後可以開到3場，C君直言進步了3倍（300%），「我估做3場暫時係我哋嘅體力極限，因開紅館騷要有好多力氣。至於點解開日場？因為嗰日係母親節，等大家下晝睇完騷，夜晚可以開開心心陪阿媽；但如果有人睇完唔開心，夜晚都一樣可以陪阿媽，做人最緊要孝順嘛，哈哈！」
延伸內容：農夫出道26年再踏紅館 一小時賣爆 開心宣佈加多一場！
麥玲玲師傅算緊自己有冇飛
被問到是否一早搵麥玲玲師傅算過今年行運，所以一開就爆、再開又爆，陸永笑言：「冇呀，玲玲姐仲算緊佢自己有冇飛俾朋友，但師傅好好，話會力撐我哋，每一場都出現，哈哈！」外界不停有人話搶唔到飛，大會則公佈第3場會有超過6成門票公開發售，希望更多人買到。
C君續稱：「冇試過搞咁多場大型嘅演出，平時睇新聞，啲歌手朋友開騷，話自己都唔夠飛，要俾錢喺公售日搶飛返嚟應酬屋企人同朋友，原來係真㗎，估唔到呢啲事都會發生喺我哋自己身上，好奇妙。」
延伸內容：揭索老婆患焦慮症 愁爆陸永扭盡六壬營救
搞慶功順便慶祝母親節
C君還透露第3場演出，會有媽媽、外母等到場支持，「最好完騷後，主辦搵間又靚又好食嘅餐廳搞個慶功宴，咁我哋就可以帶埋老母、外母去食飯，一齊慶祝埋，祝大家母親節快樂，哈哈！」演唱會將於4月8日可率先在Klook訂票，另門票於4月9日在Urbtix公開發售，未買到飛的歌迷可以留意。
延伸內容：C君變身「C奶」屯門街巿買餸 「吹神」上身搞gag笑爆菜檔老闆娘
《農夫全香港最好笑嘅演唱會》
日期：5月8日、9日/ 5月10日
時間：8:15PM（5月8日、9日）/ 2:30PM（5月10日）
地點：紅磡香港體育館
票價：$780/ $580/ $380
《東周網》訪談系列節目《星桄伴我心》4月重磅嘉賓：
即睇：《中年好聲音4》「鹿七伯」譚永浩 新秀冠軍變賣菜謀生｜戶口剩幾十蚊難受歲月｜神跡驅使愛上網紅杜小喬
立即追蹤《東周刊》全新WhatsApp頻道，緊貼全城熱話、突發猛料、獨家消息！
