更新時間：10:12 2023-11-18
發佈時間：10:12 2023-11-18
發佈時間：10:12 2023-11-18
入行多年嘅「愛美麗」，半紅不黑，雖然都畀佢爬到上去做一綫花旦，但一直以來代表作欠奉，演技更加不被認同，做親都係啲「花瓶」嘅角色，人氣可謂持續低迷。
東姑聽聞，雖然佢做戲唔掂，但做人就好叻，仲同家姐經常以「姊妹花」姿態出擊，主動高攀巴結圈內嘅紅星、名人，甚至富豪、富二代等等。好似早年，佢就成日黐住「寶哥哥」呢啲有頭有面，又識得人多嘅明星玩，仲好襟撈扮晒謙卑小妹妹，對「寶哥哥」呢啲有利用價值嘅前輩，不時擦晒鞋大獻殷勤。
其實，佢一味靠黐住啲紅星，一來可以自抬身價，二來係想識多啲老細，爭取工作機會，或者一個唔覺意，畀佢泊到個好碼頭，就直情上岸可以埋街食井水喇！
早前，終於畀「愛美麗」扑中咗個內地「筍盤」，點知佢飛上枝頭之後，即刻變得睇唔起人，尤其睇唔起啲圈內二、三綫藝人。好似，佢有份入股嘅一間髮型屋，就有人爆料話佢呢個老闆娘超級白鴿眼，紅星有利用價值嘅就貼埋錢當神咁拜，二、三綫嗰啲甚至同佢friend開嗰啲藝人，整頭髮想問佢攞個折頭都難，完全係見高拜見低踩嘅勢利小人。
而髮型屋嘅員工仲爆料話，「愛美麗」份人非常刻薄，幫佢打工冇乜福利之餘，仲借故剋扣呢樣、剋扣嗰樣，搞到公司怨聲載道，雞犬不寧！
娛圈至八聯盟嘅盟主東姑
最Hit
