發佈時間：16:42 2026-03-09
組合廿四味（24herbs）成員李凱賢(Brian)近期因「Hermès版叉燒」食評而爆紅，幽默生動表情，加埋「味道中X晒」、「super fxxking amazing」、好味到「嚇X死」、「so fxxking dope（超讚）」、「insane（瘋狂）」、「味道中X晒」、「fresh、texture really good（新鮮，口感很好）」和「好食到要着多兩條褲！」等超爆形容詞，即時成為網絡大紅人，Hit到爆！李凱賢（Brian）即時成為熱搜，不少年輕網友都對他感到興趣，紛紛起他的底，看看螢幕前係咁dope的大叔究竟係咩料！
李凱賢與陳子聰等組成廿四味
李凱賢與陳子聰同為香港Hip Hop、Rapcore地下樂隊組合廿四味（24herbs）成員，成立於2006年由六子組成，除陳子聰與李凱賢外，還有LMF成員「阿肥」陳偉雄（Phat）及「阿傑」梁永傑（Kit）、地下DJ兼製作人Ghost Style、音樂監製Eddie Chung（Dor Yuk）。
來港寄人籬下 返學以為去「叫雞」
李凱賢生於印尼，於11歲時移居香港生活，入讀英語國際學校，曾到日本東京讀日文，精通粵語、普通話、英語、日文、韓文。李凱賢在1999年開滑板店，又出任香港滑板協會主席，推廣滑板運動。李凱賢及相關人士於2019年斥2,400萬元，收購大坑希雲街禮雲大廈的一個地舖。李凱賢年少時就讀國際學校，身邊的朋友又非富則貴，貴氣出晒嚟，不少網友都覺得李凱賢必定是富二代或富三代，有錢仔一名，對於全身散發貴氣，李凱賢笑言：「係呀呵！我好似好X勁咁，其實我喺印尼出世，我細個嗰時我哋屬於中下階層，唔係好貧窮，有嘢食，有得住，但爸爸媽媽都要返工，不過一定唔係過得豪華。」李凱賢坦言爸爸是做生意的，在他來跟姑媽生活後，生意曾經一落千丈，故此有一段時間，真的有寄人籬下的感覺。「人哋年三十晚，會買新衫新鞋着，但我同家姐真係冇，不過我哋喺印尼嘅時候，真係會有排華，出街都會驚自己生命有問題，所以我可以嚟到香港，都已經好幸運、好感恩，冇錢買嘢，相對地已經係一個好小好小的問題，我唔會覺得唔開心，我感恩喇！」
至於，李凱賢談及來港後入讀國際學校一事，他即瞪大眼睛說：「我啱啱去到間學校時，我真係以為係『叫雞』(召妓)呀！學校係喺大廈裏面，要上三樓，我真係冇諗過，同埋我間學校學費係平到你唔信，佢係畀留喺香港嘅低階層啲嘅外籍人士讀，唔係呢家學費好貴嗰啲，呢家間學校都冇咗喇！」
人生兩件「超 dope（超讚）」
李凱賢童年時自言捱過窮吃過苦，但因為懂得「感恩」，令他人生路上都變得「so fxxking dope（超讚）」，特別是遇上他的惟一。李凱賢於2004年結婚，太太為前韓國組合Tashannie成員Annie Lee，女兒李思妃（Tayla）於2010年出世。李凱賢曾接受傳媒訪問，透露2003年與表兄弟去韓國旅行時，因表哥的朋友是韓國歌手，Annie教對方跳舞唱歌，第一眼見到太太時，可謂一見鍾情，二人相識七個月後，李凱賢於首個情人節便向Annie求婚。「我真係好多謝個天，畀我遇到我太太，我一見到佢我就好鍾意佢，我已經好似隻狗咁，咬住佢唔放，佢係一個好好的女仔，亦都係一個超dope嘅媽媽，我真係好幸運！」
可以在茫茫人海，在世界另一端揾到真愛，李凱賢坦言這一定是他一生中超dope的事，而第二件超dope的是他的女兒李思妃（Tayla）於2010年出世。「Tayla出世真係好dope，佢出世，真係改變咗我好多、好多，我真係好愛佢，唔知點形容，我真係好愛佢哋兩個。」李凱賢不懂形容，但身體行動最實際， 當太太懷孕時，為了母女平安，他食素為二人祈福，女兒出世後，為了女兒健康快樂地成長繼續食素，直至女兒15歲生日才開始吃回一口肉。「 我老婆生咗之後，外母同媽媽都叫我食返肉，但係我想Tayla好啲，所以我繼續戒，直至我個女15歲生日，佢話『爸爸，不如你食返肉啦！』我一食，我開心到流眼淚，Tayla出世我都未流眼淚，我食件豬扒開心到流淚。」李凱賢是一個懂得感恩的人，所以他人生遇到很多dope的事，dope到係人都知，dope到有朋友建議他自創一個屬於自己的中文dope字，祝大家乜都dope。
haters喪插「 嘈、無料、擦鞋」
李凱賢近日因為品評美食而人氣急升，吸粉力強，但有人支持亦會有hater，李凱賢又會點睇？「梗係會有hater，佢哋會話我嘈、無料、擦鞋，但我唔會理佢哋，唔通佢哋鍾意吠，你又會同佢吠呀 ? 唔會吖嘛！佢哋根本就冇性嘅，琛仔(李璨琛)個女Lucy咁得意，佢哋都會話、都會鬧，佢哋真係冇性，所以冇需要理佢哋咁多。只要我太太、女女同家人唔係咁諗就ok， 理得啲hater點謫講，佢哋都冇性嘅。」李凱賢十句有九句都會加個 fxxk字落去，豐富句子，確實小編都好認同他的一句說話：「我講好X多粗口，但我好有禮貌！」拍攝期間，親眼見到他不停向途人、街坊主動Say Hi、點頭示好，Thanks 來Thanks去，李凱賢那份貼地式的親切感真係出晒嚟，即刻來了一個回憶殺，諗起廿四味首《Respect就OK》裏面其中一句歌詞「你有你嘅 style 我有我嘅 way Respect 就 OK Respect 就 OK！」
