現年89歲的資深演員江圖，早於1964年出道，由粵劇界轉戰影視圈逾60年，並先後遊走佳視、無綫、亞視3個電視台，由於他愛打扮，經常身光頸靚，並在劇集中多飾演富人，故被封為「有錢佬」的專業戶。
默默耕耘數十載，帶給觀眾無盡歡樂的江圖，於去年與余慕蓮一同獲得演藝人協會頒發的「傑出演藝大獎」，表揚他們對演藝界獻出大半生。此外，孑然一身的江圖，還受到余慕蓮的啟發，決定仿效對方，將來離世後，捐樓捐身家給慈善機構，幫助有需要的人，造福社會大眾。

粵劇世家

出身於粵劇世家的資深演員江圖（本名蔡志祥），母親馮俠華是粵劇「女鬚生」（反串並戴鬍鬚），曾與名伶任劍輝一同演出；而舅父馮俠魂亦是一代正印文武生；另舅母楚岫雲則是著名粵劇花旦。至於江圖就先在佛山粵劇團演出，之後回港考入新聯電影公司，並開始在圈中發展，拍過《香港屋簷下》、《秋雨春心》等電影，繼而轉投電視界續展星途，初時取藝名江濤，跟着再改為江圖。

當中，江圖在亞視效力達35年，更有「亞視傳奇綠葉」的外號，因愛穿靚衫，打扮富貴，也不介意自出私伙拍劇，故經常獲派扮演「有錢佬」的角色。2010年，他因聽力問題而淡出娛樂圈；不過，他於2019年獲邀參與電影《叔•叔》飾演同志超仔，重現幕前。

現年89歲的江圖，從影逾60年，默默耕耘，去年獲得演藝人協會的首屆「傑出演藝大獎」，並由會長古天樂頒發獎座，表揚他多年來對演藝界的貢獻，同屆得獎者還有88歲的余慕蓮。得獎後，他開心的說：「好鍾意做戲，將來仲可以叫我演出，年前參演《叔•叔》嘅戲分雖然少，但好開心，希望再有機會做戲，我未老到行唔到，仲可以同觀眾見面。」見到余幕蓮看透生死，並於死後捐出所住的一層樓，江圖也覺得這個安排很有意義，所以決定仿效，「我已立咗平安紙，搵咗古天樂、田啟文同卓慧敏協助處理，大家都係透過香港演藝人協會認識。將來百年歸老，我嘅財產會捐晒俾慈善機構。

「天兵」保護

江圖旗下的財產，包括現時居住多年的佐敦寓所。這個單位乃父母於早年以120萬元購下；而他亦一直跟雙親同住，直至兩老離世後才獨居。日前，本刊專誠登門造訪，年事已高的江圖，健康不俗，行得走得，又可自理生活。他大方展示準備捐出來行善約800呎的家居，當中最突出是客廳左右擺放了多尊神像，左邊除了有一幅半埲牆高的千手觀音畫像，還有一個神枱，上面供奉象鼻神、四面神及金剛神，另右邊則供奉兩個天兵。

與佛有緣的江圖憶述︰「我40、50歲時，喺蘇州寒山寺幫亞視拍嘢，見嗰度有張千手觀音畫像石刻，仲裱咗出嚟，縱使有裂紋，我都請咗返嚟，好難得。而四面神，係我一個師傅去泰國修行時，替我請返嚟。象鼻神有招財運，樣樣亨通，但唔主張橫財，試過去澳門，買咗一注，中咗就好走啦。至於，嗰兩個天兵，當年喺泰國皇宮地庫請返嚟，跟咗我30年，每逢我拍戲，遇到阻滯，一叫佢哋，就會保護我。」

除了虔誠參拜神佛之外，喜愛打扮的江圖，對收藏在衣帽間的靚衫和飾物猶如塊寶，並如數家珍般說出每一件的來歷，還逐一拼襯，滿滿的回憶在心頭。當中，他對一件原價8千多元的「龍袍」愛不擇手：「呢件長袍，40年前喺華潤度買，我等減價到5千幾先買，若天氣凍時，我會配埋對boots着；而呢件登台時着，係fans造俾我嘅；仲有呢件⋯⋯」 

余慕蓮回應

由後生至今，江圖都穿着得莊重得體，當年亞視人工2、3萬元一個月，他都會花盡買衫，「我對錢銀唔着緊，亞視嗰啲戲服都唔似有錢佬，我咪出私伙，甚至乎出埋錢買金鏈，落足本去扮。嗰時，我仲年年都爆show，試過有次爆成13萬蚊，我咪先使未來錢，用晒，結果到要交稅時，咪問老竇借，每個月還6千蚊，還足3年。」

此外，因為在劇集中有型有款，江圖還惹來一名金舖老闆娘的青睞，「我當時拍《家春秋》，有個金舖老闆娘睇中我，經朋友介紹下識咗我，佢去名店買衫都會買埋俾我，但因為老闆娘係寡婦，我媽媽唔鍾意，所以冇同佢一齊。而當時仲識好多非富則貴嘅女人，啲人就話：『江圖食軟飯、喺女人堆生存。』但我唔理。我冇同女明星交往，因為覺得呢行貪慕虛榮，所以冇喺呢個圈搵女人。」人生如戲，戲如人生，回望大半生，最後孑然一身，做好後事安排的他笑說：「冇咩遺憾，今年稍後就90歲，好開心！」

對於江圖仿效捐身家一事，余慕蓮接受本刊訪問，她直說：「我同佢唔熟，佢好似同我一樣都係冇人冇物，捐咗去好呀，好過俾人呃，我睇《東張》好多呢啲情況。」

《東周網》訪談系列節目《星桄伴我心》2月重磅嘉賓：
即睇：江欣燕親揭變胖因由│輕狂靡爛歲月 醉倒餐枱底瞓天光│小產BB入樽放睡房 發生靈異事件
即睇：實測Silly程度 帶陳國邦去沙灘𥄫女｜送石油氣爐畀羅敏莊最浪漫 ｜《尋秦記》謝票收花超窩心
即睇：黃凱芹大逼供｜有冇同過周慧敏拍過拖？｜有冇秘密生仔做爸爸？｜有冇內疚心事對亡父說？
即睇：馬德鐘眼濕濕憶亡母：我好痛！ | 難忘當差亡命飛車追賊 | 肉搏朱茵真相 婚姻傳曾亮紅燈
即睇：劉威煌賣珍珠奶茶做到買數銀紙機︱ 愛犬訣別彩虹橋鼻酸感人故事︱ 罕談娛圈最難受歲月：我放棄過！

立即追蹤《東周刊》全新WhatsApp頻道，緊貼全城熱話、突發猛料、獨家消息！