發佈時間：10:00 2026-02-15
九巴後人雷怡暉（Amanda）每年都愛和丈夫到世界各地遊歷，隨着內地城市旅遊配套越來越多元化，最近Amanda就帶同母親及弟弟暢遊近年人氣高企的雲南麗江。
旅途上，他們走遍白沙、束河和大理等多個古城，一大清早就到東巴谷看日照金山絕景，又登上海拔3100米高的玉龍雪山表演場地，觀賞集合500個民族一起表演的《印象•麗江》。
享受完一場場充滿歷史感的美景盛宴後，Amanda再轉到哈爾濱體驗冬日限定的雪國風情，既遊冰雪大世界，又入冰屋食火鍋，看雪地煙花，在如詩似畫的景緻下瘋狂打卡，用相片記錄冬日下的雙城故事。
東巴谷看日照金山
有別於以往外遊只和丈夫享受二人世界，雷怡暉此行帶同媽媽及弟弟一起同遊，「我在20年前已到過雲南旅遊，遊歷過昆明、麗江、香格里拉等著名景區後，唯獨對麗江嘅美景念念不忘。今次出發前，聯絡當地司機一起規劃行程時，對方就提議我哋在麗江多留幾日，慢慢去感受當地濃厚嘅風土民情。」
他們入住麗江金茂隱逸酒店，每日晨早就坐車出發去睇靚景，「我哋去咗白沙、束河、大里和麗江古城，仲有到植物園裏的大經幡打卡。在眾多景點中，最靚係到東巴谷看日照金山美景，我哋天矇光就起程，去到見到日出嘅晨光，照射在梅里雪山上一刻，突然金光閃閃，靚到不得了，但咁靚嘅景色只會維持15分鐘，所以一定要喺日出前到達。雖然天氣好凍，但見到太陽出來，成個人立即溫暖晒。
「除了東巴谷，在栖崖的懸崖咖啡廳亦可以欣賞到日照金山，嗰度有幅8米高嘅落地大玻璃，到日落時份可以邊歎咖啡，邊看同樣是瞬間限定的日照金山醉人景色。」
玉龍雪山震撼歌舞
他們此次行程亮點之一，是到海拔3100米的玉龍雪山高地，觀看由張藝謀執導，以民族文化為主題，雪山作實景的大型歌舞劇《印象‧麗江》，「呢個騷好值得去睇，製作費超過2.5億元人民幣，集合500個民族嘅族民一齊喺雪山上演出。表演者會唱山歌、打鼓、騎馬同跳舞等，響亮的歌聲和鼓聲，喺空曠雪山上不斷迴盪，感覺啲聲音好似彈嚟彈去咁，非常震撼。我哋買咗$300/位嘅VIP門票，可以舒舒服服坐喺中央預留嘅座位，欣賞大約一小時嘅表演。」
由於此行帶着媽媽同行，她編排行程都以舒適休閒為主，「媽媽年紀大，但麗江之旅都能輕鬆應付，因為各個景點啲路都易行，唔會太勞累，加上酒店座落景區周邊，去不同景點，車程也只需十數分鐘。如果行到攰，就一齊返酒店休息完先再出發。今次請個司機更是『周身刀』，除了司機又是導遊，途上詳細介紹景點的特色和歷史，佢仲帶埋擅長攝影嘅表弟嚟同我哋影相，所到之處影嘅相都似大師級作品。」
哈爾濱冰屋打邊爐
遊完麗江，雷怡暉一家再轉到東北哈爾濱繼續旅程，「喺麗江白天氣溫都有攝氏10幾度，但去到哈爾濱就跌到零下20幾度，我哋喺酒店拎支水出街會即刻結冰，食任何嘢嘅動作都要快，食慢少少都凍到硬晒。每次外出又要着好多衫，我老公要着七層厚，我都要着四層，但出到戶外十幾分鐘就頂唔順，要返入室內有暖氣嘅地方暖一陣，先可以再行出去。嗰幾日真係凍到入『根』，每吸一啖空氣，凍感直迫每粒牙齒根部神經。」
連日來，她最開心是暢遊冰雪大世界，「呢個Ice Festival每年用5億人民幣，同大量人力去建造，有好多大型冰雕，觀感好宏偉，但所有展品到3個月後的春天就會融化。」
除了賞冰玩雪，此行她更初嘗在冰屋內打邊爐，「喺其中一間酒店，有個好特別嘅『冰宮火鍋』，用餐嘅廂房係踏入冬季，臨時用冰磚建造嘅冰屋，入到去枱面放滿一盆盆肉類，嗰種又凍又熱嘅感覺真係好難形容，我哋攞起碗筷個個都食唔停口，因為食完身體暖啲嘛！其實內地仲有好多值得去遊覽嘅城巿，嚟緊我計劃去桂林同景德鎮，繼續暢遊大江南北。」
《東周網》訪談系列節目《星桄伴我心》2月重磅嘉賓：
即睇：江欣燕親揭變胖因由│輕狂靡爛歲月 醉倒餐枱底瞓天光│小產BB入樽放睡房 發生靈異事件
即睇：實測Silly程度 帶陳國邦去沙灘𥄫女｜送石油氣爐畀羅敏莊最浪漫 ｜《尋秦記》謝票收花超窩心
即睇：黃凱芹大逼供｜有冇同過周慧敏拍過拖？｜有冇秘密生仔做爸爸？｜有冇內疚心事對亡父說？
即睇：馬德鐘眼濕濕憶亡母：我好痛！ | 難忘當差亡命飛車追賊 | 肉搏朱茵真相 婚姻傳曾亮紅燈
立即追蹤《東周刊》全新WhatsApp頻道，緊貼全城熱話、突發猛料、獨家消息！
