發佈時間：10:00 2026-02-09
2005年香港先生冠軍，現年41歲的高鈞賢（Matthew），與美容界女強人、身家「億億聲」的黃梓漫（Christine）於前年突然宣布結婚；而Matthew之所以極速抱得美人歸，全因他冧招盡出，令Christine嫁給他之餘，又立即為他誕下一個肥肥白白的囡囡。結婚後，一家三口定居深圳，本刊獲邀登堂入室，到他們面積2,500呎的愛巢採訪。
期間，Christine毫不吝嗇地分享Matthew獨門的冧女秘技，她甜絲絲的說：「我老公好sweet 㗎，我哋經常喺露台飲酒談心，佢又成日俾驚喜我，除咗失驚無神送花之外，仲會煎心形牛扒俾我食，令我覺得好幸福！」難怪，Matthew被網民封為新一代「億元駙馬」之首喇！
人生低谷
2024年12月初，高鈞賢（Matthew）突然自爆與年輕10年的圈外女友黃梓漫（Christine）雙喜臨門。原來，兩人已在加拿大註冊結婚，並於去年1月誕下囡囡高子琳（Liona）。每當提起與太太相識的經過，Matthew總是甜在心頭：「4年前，我哋只係朋友，因為佢公司有部分生意係護髮，佢搵我幫手拍片，當時只係朋友約吓食飯，已知道佢細我10年同有小朋友。最初覺得佢好識關心人，又叻、又靚、又勇敢追夢同識得養生。」
其後因為疫情，Matthew由於到內地工作而與Christine重遇，當真愛在瘟疫蔓延時，兩人一撻即着。他慨嘆的說：「我哋經歷過感情上嘅錯摸，先發覺無論對方以前係點﹙結過婚及有小朋友﹚，根本唔係問題，最緊要大家夾，同理解明白我。」
問及Matthew有甚麼獨門冧招？Christine不期然流露出心花怒放的表情，她表示老公不單止在追求的時候才痛錫自己：「結婚之後，佢仲錫我多咗！識佢嘅時候係我人生嘅低谷，當我每一次發脾氣嘅時候，佢都會令到我好開心；另外，Matthew係一個好有心思嘅人，佢好記得所有值得紀念嘅日子，例如相識100日，佢會送花；BB出世嗰日，佢又會送花，坐月出關嗰一日佢又送花。」
她續說：「每一日，佢無論去到邊度，佢都會同我匯報，我係會好清楚佢每一日嘅行程。另外，佢每次接觸女性，佢都會同我匯報得好清楚，令到我好安心。仲有，佢煮餸好叻，特別最叻整牛扒，我當然係最鍾意佢整俾我嘅心形牛扒啦！」
有苦自知
婚後，兩人在深圳南山租了一個2,500呎的單位作為愛巢。這個單位擁有四房兩套，還設有巨型的露台面對西麗湖景，迷人美景盡入眼簾。晚上，Matthew最愛與老婆在這裏談心：「因為日頭各有各忙，老婆會返香港處理佢嘅養生店，我就會喺深圳屋企做直播同湊女。等BB瞓咗，就係我同老婆嘅真正二人世界，摸住酒杯底，喺露台吹吹風，哈哈！」Matthew表示最鍾意老婆對自己心心眼，兩人除了在露台談心之外，亦經常在床上互訴心事及傾談公司的業務，盡用所有時間。
Christine也開心的分享：「同Matthew相遇，就係我人生嘅開始，因為佢試過好多次生意失敗，佢嘅人生經歷，係可以成為我嘅借鑒。好似之前我公司喺美國上市出現咗問題，外面不停將件事渲染，唔係事實嘅全部，令到我好心煩！當時，佢俾咗好多支持我，令到我可以重新調整自己嘅心情。」
對於「27億富婆」的封號，Christine笑說：「我有苦自己知，我有冇錢唔需要攤出嚟俾人哋睇，深圳呢間屋係租番嚟，唔使3萬蚊。其實，Matthew係好努力嘅一個人，因為佢知道做藝人，唔係長久嘅工作，所以佢除咗登台、剪綵、拍廣告之外，一直都有做其他生意，例如：開餐廳，做自家服裝品牌，𠵱家就做直播，一個禮拜開3晚，有時直播6個鐘。有時見到佢咁辛苦，我都好心痛！」
早前，兩夫婦豪擲2,250萬元，購入九龍塘畢架山一號一個3房單位連一個車位。對於，成交價比較銀行網上的估價高出近30%，Matthew聞言馬上說：「我哋又冇留意個價錢係點喎，其實自己住，覺得個價錢啱就買啦！我哋已經睇咗好耐，完全睇唔啱，唯獨呢個單位覺得係我哋想要嘅，因為想囡囡之後喺香港讀書，所以要揀一個有校網嘅地方，呢度至適合不過。」Matthew表示，自己小時候就讀九龍塘的拔萃男書院，所以都想囡囡將來考到九龍塘的名校。港男冠軍又豈只高大俊俏及肌肉脹卜卜，還有甜心、窩心，暖透心！
身家27億元 創美容界傳奇
高鈞賢是黃梓漫（Christine）的第二任老公；而她與前夫就育有一子一女，因性格不合而分開。為免招人話柄，她離婚時選擇淨身出戶，把對方送給自己的手錶和鑽石全部歸還。Christine直言朋友都笑她傻：「他們卻不知在我心中十幾年的青春，早已遠遠超過這些奢侈品的價值很多倍。」
20歲時，Christine開始創業，於10年間由兩個人的公司做到現在超過50人的規模，合共開了4間養生館，業務主要是女性養生、產後護理、瘦身、生髮及幫助小朋友成長發育等。疫情最艱難的時期，她被逼將嫁妝拿去當舖套現，才有錢出糧給員工。關關難過關關過後，她的業務越做越好，生意蒸蒸日上。
去年10月，Christine的公司美妍堂（Charming Medical Limited）更登陸美國納斯達克交易所（股票代碼：MCTA），令她搖身一變成為美國上市公司的揸弗人。不過，她的公司上市後不久，股價一度飆升超過6倍，令她的身家暴漲至逾27億港元；然而，因升得太急速，故遭到有關當局暫時停牌。對於此事，Christine覺得這只不過是一個考驗，經得起考驗才是真正的王道。
