更新時間：17:09 2026-02-04
發佈時間：17:09 2026-02-04
發佈時間：17:09 2026-02-04
上年7月，日本大地震嘅「預言」，嚇到唔少人鼻哥窿都冇肉，轉飛第二度食買玩，mean啲講句，起碼仲有得揀。
新片《末世綠洲2：絕地遷徙》（Greenland 2：Migration）入面嘅謝拉畢拿（Gerard Butler）就冇咁好彩，以為5年前避過彗星撞地球一劫，有啖安樂茶飯食，點知原來係噩夢開始，資源短缺、輻射風暴等問題陸續殺到埋身。佢唯有被迫再次帶住老婆同個仔逃難，將不可能嘅任務變成可能。
謝拉畢拿憑《戰狼300》打響名堂
第一集《末世綠洲》喺2020年推出，今次電影作為續集，製作費高達9,000萬美元（約7億港元），隕石碎片擊落、洪水、地震、斷橋等災難特技場面，要乜有乜，夠震撼。
擔大旗做主角嘅謝拉畢拿，一向man爆，憑《戰狼300》打響名堂，之後再有《白宮淪陷》系列，套套都打打打，好英雄。嚟到《末世綠洲2》，佢還原基本步，做普通人嘅家庭支柱，只係想喺末世之下，由格陵蘭越洋去法國，尋找傳說中嘅隕石坑過「正常生活」。
瞓身為妻兒尋找一線生機
值得俾like嘅係，佢同飾演老婆嘅《死侍》女星Morena Baccarin講明自己受到輻射感染，時日無多。橫死掂死，仍瞓身為妻兒尋找一線生機，呢啲咪真男人囉！
謝拉畢拿話：「逆境會令你睇清一個人，佢哋捱過考驗，關係更加緊密。呢一家人非常堅毅，明白到當生存機會變得渺茫時，心存希望好重要。」
Morena形容呢部電影係佢從影以來拍得最辛苦，「我哋拍咗好多外景戲，喺倫敦同冰島嗰陣，消耗咗好多體力，記得係咁跑同喊，好辛苦。」
演過《陽光兔仔兵》嘅Roman Griffin Davis，喺片中飾演兩人嘅寶具仔。長時間喺不見天日嘅避難所生活，令佢對外面世界充滿好奇，仲情竇初開撩女仔，為呢部災難片加添少少甜。
（現已上映）
《東周網》訪談系列節目《星桄伴我心》2月重磅嘉賓：
即睇：江欣燕親揭變胖因由│輕狂靡爛歲月 醉倒餐枱底瞓天光│小產BB入樽放睡房 發生靈異事件
立即追蹤《東周刊》全新WhatsApp頻道，緊貼全城熱話、突發猛料、獨家消息！
最Hit
