「廟街歌王」尹光最新歌曲〈Dear Myself〉其中一句歌詞：「誰人沒有遺憾，並未進軍Hollywood但過足口癮，十四座那坐客就快歸隱，唱着最後餘韻，數波波點算每顆星球。」只看文字，未聽其聲，已能感受得到尹光由地踎市井嘻哈變得柔情似水，風格豁然不同。
或許人生七十古來稀，現年七十有九，明年踏入八十歲的尹光，昔日數波波、黐膠花的歲月已經飛逝，換來感性自白。
「大家係咪估唔到我都唱到抒情歌呢？其實我都有好多故事，想同大家分享，我下年就去到八十歲，人生經歷了高高低低、浮浮沉沉，走過難、輸過身家，富過又窮過，真係乜都試過晒，過半百年嘅人生經歷，我嘅故事都好精彩同勵志㗎！」
尹光輕輕地哼歌：「聽過幾多落淚大笑歡呼拍手，數一生的智慧與荒謬，所得所失怎說起，轉轉心情人又照舊……」歌如人生。
數完波波，再坐十四座，做埋潮神加Dear Myself，尹光入行五十年，唱歌唱了六十八年，他笑言雖然未去到天王巨星級數，但有幸能混入星塵之中，閃過下、亮過下、自High過 ，最近更揾埋AI尹光做接班人，人生無憾！

越戰爆發 偷渡來港

尹光縱橫樂壇幾十年，經典歌曲〈廟街〉、〈大笪地〉、〈荷里活〉、〈少理阿爸〉、〈你老豆索K〉等都深入民心，歌詞搞鬼又貼地，難得是尹光唱得過癮之餘，更能唱得出那陣陣草根味。
只是唱得出草根味，尹光卻非草根出身，其實他是富貴的越南華僑，父親是一名多元化的生意人，開過幾間戲院、溜冰場、電髮舖、漆畫印板工場等等，童年時的尹光有五、六個傭人服侍，家族很大，開枱吃飯一擺就擺兩圍枱，一圍十幾人，只是越戰爆發，令到尹光由闊少變成難民，走難來到香港。
尹光說：「我喺越南嘅生活都真係幾衣食無憂，不過因為越戰爆發，政府要拉人服兵役，由十八歲拉到四十歲，我老竇話如果我真係要上戰場，九成會死，佢唔想冇咗個仔，就畀錢我去軍營訓練三個月，出嚟又畀錢疏通，我可以去守市區，不用上前線，但咁樣畀法都唔係辦法，佢好驚有一日，我真係要上戰場，最後就安排我偷渡嚟香港，寧願我捱下，都唔好睇住我死。」
回想過去，尹光仍記得幾十年前，由越南逃來香港的上船一刻，他在船上度過九日，七○年大年初二到達香港，展開人生新一頁。「我嗰時得廿幾歲，唔係好識驚，同埋自己都算係好好彩，偷渡過程有驚無險，我坐巴拿馬貨船，能載二千人，上船前坐吉普車，每架車載五人，我坐第一架車上到船，第二架車嘅人全部被捕，所以成艘船都只係得五個人，就係咁，我就嚟到香港。」

求名、求利、求己、勿求人

尹光因為怕錢財露眼招人殺機，故不敢袋太多財物，口袋裏只得三錢真金。 「我嚟香港係走難，情況亂到不得了，我點敢帶咁多錢喺身，當時我只係帶咗少少金傍身， 我唔係嚟香港歎世界，我係嚟捱世界，有晒捱苦嘅心理準備，但好好彩嘅係我由細到大都好鍾意唱歌，喺越南唱過大戲，我愛唱歌，唱歌亦幫到我揾三餐。」
在越南的富貴生活中，尹光坦言父親最討厭他唱歌、做大戲，逼他學做生意，但天意弄人的是，父親越是不讓他接觸的，卻最能影響他的人生，若然尹光不懂得唱歌，這位「廟街歌王」的起點，又會在何處開始？
「喺越南，老竇唔鍾意我唱歌做大戲，但偏偏我好鍾意，嚟到香港，更加係要靠唱歌維生，這都係天意同命運。」
尹光的人生除了唱歌之外，父親的九字真言「求名、求利、求己、勿求人」也植入了他的血液之中，影響着他這大半生。「喺我走嚟香港嘅時候，老竇就同我講咗這九個字，我記到現在，我相信都會帶埋落棺材，求名、求利、求己都好，真係唔好諗住要求人，一定要裝備自己，唔好懶，所以我到現在都係諗住要學習，時興AI，我就玩AI尹光，雖然我就嚟八十歲，但我都冇諗過要停落嚟，我鍾意終身學習。」

賭錢輸身家 求上天打救

尹光推出過不少熱賣唱片，又試過一晚唱九場，紅遍夜總會，更多次於紅館開個唱，場場爆滿，前途錢途都順風順水，可謂無風無浪。
談及風平浪靜的大半生，尹光喝一口水，輕嘆一下，續說：「人生點會無風無浪無逆境？只係尹光係一個好樂天嘅人，就算遇到逆境，我都唔會諗到係世界末日咁。路點難行，都要向前行，冇得縮！」
尹光自言上天對他真的不錯，別說出生於富貴人家，童年生活無憂，長大後又可以寓工作於娛樂，一切皆順利，唯一的人生大挫折都不是上天給他的，而是自己攞嚟。
 「講衰呢！我尹光就真係好衰，可以用我嚟做反面教材，年輕嘅時候，我唱歌登台揾到啲錢，但年少無知、誤交損友，學識咗賭錢，喺一九七九年，在澳洲悉尼登台，跟朋友去到個私家賭檔賭牌九，那時一層樓十幾萬，我一晚輸咗廿萬有多，輸咗咁多錢，當時我嘅人工只得四千美金，因為我係尹光，賭檔借錢給我，只好回港後逐個月攤還。但嗰個時嘅我依然未識驚，返到嚟香港繼續賭，晚晚去打麻將，凌晨三點打到早上十一點。」
賭仔心態，有賭未為輸，直至八四年一個晚上。「有一晚，我又去賭十三張，輸到冇晒錢，要問人借五萬，當時我嘅歌酬大概只得二、三百元，因為嗰時我已經有家庭、有小朋友，我突然好驚會累咗屋企人，於是我喺心裏面求神拜佛，我話只要我可以一鋪翻身，以後就戒賭，個天又真係俾我一鋪翻身喎，既然係咁，我就從此戒賭，一蚊都唔賭。」
說畢，尹光哼唱《賭仔自嘆》：「日夜去賭場嚟到侍候、生意唔撈兩頭游、今日錢財輸曬真係冇修…哈哈哈…我個名叫尹光，意思咪就係揾咁多，光咁多囉！」尹光確實風趣。

AI不能代替的尹光

幾個月前網上出現了「AI尹光」翻唱姜濤的〈Dear My Friend〉以及林家謙〈一人之境〉等歌曲成為全城熱話，尹光突然翻紅被封「光B」。
「AI歌手」的出現，叫歌手們、音樂創作人都感到危機四伏，隨時俾AI搶飯碗。
同樣面對AI挑機的尹光，問他會否擔心要提早退休？他就笑着回應：「幾過癮吖，如果我唔得閒或唔舒服都可以搵AI頂一頂，哈哈哈。」
即將於紅館開演唱會的尹光言出必行，講明會邀請AI尹光「Wan K.」做嘉賓外，早前，已經在新歌〈Dear Myself〉MV中，同「Wan K.」合唱了其中一段：「到了我聲線亦折舊了，我把這個使命過繼AI了」。
年近八十，搵定AI做接班人，潮神不愧為潮神，反而不少紛絲、網民看過MV後，感觸萬分，並紛紛留言：「尹光是無可替代，不可能被AI取代的。」
尹光於娛圈裏唱了大半生，陪伴過不少家庭裏的幾代人成長，「Wan K.」真的可以取代尹光的神級地位嗎？