發佈時間：16:50 2025-12-26
《一周星星》本周日（28日）播出的第4集，嘉賓是未正式上映已熱爆的電影《尋秦記》主角古天樂、宣萱、林峯及朱鑑然，主持則是區永權。這集單是古天樂和宣萱的爆笑互動，已值回票價，區永權求證古仔是否如傳聞所指「唔畀人趷得」，他即指着宣萱稱被趷到冇晒感覺，其後大爆宣萱瘀事反擊：「成日郁手郁腳。」又話自己唔摸得。
宣萱唔趷古天樂唔開心
事緣在「本尊Fact Check」環節中，區永權求證古天樂是否如傳聞所指「唔畀人趷得」，現場即時變得像聯歡會般熱鬧。古仔很大反應說：「你講咩呀？（馬上指着宣萱）佢嗰日唔趷過我唔開心。」區永權聞言直接追問宣萱：「傳聞呢個世上，得你一個可以對住鏡頭趷佢（古仔）。」古仔聞言又「搶答」：「我澄清番先，佢唔對住鏡頭都係趷架喇。」不過宣萱對二人一唱一和卻大力抗議，並指區永權都會寸古仔，古仔聞言再搞笑謂：「我好記仇嘅，你死緊喇今次！」
古仔暗示被宣萱趷到冇晒感覺
此時林峯加入戰團，但並非為宣萱護航：「我喺度諗緊邊一日你係冇趷佢嘅，又好似冇...」、「我未見過有其他人趷佢」。被圍攻的宣萱，即強調「開工我冇趷佢嘅」，豈料古仔依然反對：「你咁都夠膽講吖？」由於戰況太混亂，區永權嘗試作出精闢分析打圓場：「你（指宣萱）會唔會趷佢（指古仔）趷到趷咗都唔覺得趷緊佢呢？」宣萱聞言竟哈哈大笑：「咁我真係唔知。」眼見「沉冤得雪」，古仔加多兩錢肉緊謂：「咪係咯！（點解你畀佢趷？）咁我都唔知吖嘛，我都慣咗喇嘛，你估我想架！」宣萱在節目中，還大方分享成功「趷古仔」的秘訣。
古仔笑宣萱「成日郁手郁腳」
其實宣萱除了把口唔放過古仔，連「雙眼」及「雙手」亦對古仔「零客氣」。事緣其中一Part，宣萱詳談拍攝電影版《尋秦記》時，與當年的當家花旦郭羨妮再度聚首「仲啱傾過以前」時，古仔因一句「即係以前唔啱傾」口多多搭嗲，被宣萱「反白眼」攻擊兼被負評「搞屎棍」。之後宣萱提到重遇歐瑞偉（角色陶總管）時感覺很強烈，並指很快便能投入與對方的感情戲時，古仔又再口多多：「即係你意思係同陶總管有感情線。」宣萱聞言嬲到狂打古仔，古仔只能無奈回應：「成日郁手郁腳。」之後宣萱應區永權要求向古仔表達謝意，熱情的她即作勢送上「熊抱」，古仔見狀即閘住：「唔好郁手郁腳呀喂」、「唔好摸呀！」最後連環慘食檸檬的宣萱竟出拳狂打古仔，十分搞笑。
妙談當年「篤到狂笑」NG網紅片
古仔和宣萱還大談劇集《尋秦記》廣傳至今的網紅NG片，談到其中一條古仔因大力篤宣萱心口、篤到宣萱忍不住爆笑的NG片時，宣萱時隔多年依然覺得搞笑又委屈：「我睇親都笑，我估我睇30次、甚至100次都會笑。」，並稱：「佢冇當我女人咯，總之係...可能對佢嚟講（力度）4㗎啫，但對我嚟講已經係7、8㗎喇。」古仔聞言只能回應：「篤本身唔大力唔係叫做篤嘅，叫做撩！」隨即應區永權要求即場示範向宣萱「撩穴」，宣萱見狀即靈活閃避：「唔好撩我！」
古仔大爆宣萱愛說話
玩完一大輪，古仔才正式為當年力度過猛解畫，期間他除了會大爆宣萱「唔記得對白瘀事」，還笑言宣萱一分鐘都不能停低唔講嘢，古仔：「你叫佢現場唔講嘢1分鐘係冇可能嘅事嚟，呢個係真事。」接着又話：「佢平時一定會同我講嘢架，除咗我病嗰日我先唔應佢架咋。」面對古仔連環強攻，宣萱一度使出「搞笑扁嘴樣」無聲抗議，豈料古仔照辦煮碗扮扁嘴「反擊」。
延伸內容：古天樂林峯合唱《尋秦記》主題曲《天命最高》MV曝光 全陣容晒冷海報有睇頭
延伸內容：《尋秦記》原班人馬古天樂 林峯 宣萱 郭羡妮 滕麗名合體 電影版12.31登場 今首發預告掀集體回憶
延伸內容：尋秦記│苗僑偉上演Ken Or刺秦王 黃文標同古仔兄弟情未了 江華拒演有內情！
《東周網》訪談系列節目《星桄伴我心》12月重磅嘉賓：
即睇：「海馬」老闆鄔友正因翁嘉穗重病痛哭 妙論太太係老虎乸 徙置區小子創富路
即睇：佘詩曼公開美魔女育成秘笈 感傷最後道別許紹雄 驚險慈母心臟停頓20秒
即睇：喬宏96歲遺孀小金子 靠神迹戰勝子宮頸癌 爆喬宏墮機沉船撞車生死刧 靈魂出竅奇異經歷 二人洗手盆見證愛情真諦
即睇：林建明 賈思樂 爆盧海鵬風流多女友 感性剖白患情緒病辛酸 爆笑互窒對對碰 分享71歲凍齡秘笈
立即追蹤《東周刊》全新WhatsApp頻道，緊貼全城熱話、突發猛料、獨家消息！
