發佈時間：14:00 2025-12-21
北非摩洛哥近年成為港人的新興旅遊熱點，就連無綫綜藝節目《帶阿姐看世界》其中一站，亦以摩洛哥作為據點。上位小生阮浩棕早前就帶着阿姐汪明荃出發，去探索這個充滿異國風情的國度。
他們除了騎駱駝進入撒哈拉沙漠、遊歷著名的紅白黃藍四色古城，及海上清真寺等人氣景點，亦暢遊多個地道市集，並到城內的居民家中作客。8日7夜的旅程，雖然邊玩邊工作，但首次踏足非洲的阮浩棕仍然相當興奮，他說：「此行睇到好多好靚的景色，亦體驗到當地不同的文化，我會形容摩洛哥係值得人生必去遊歷嘅一個國家。」
騎駱駝看日出
一向甚少外遊的阮浩棕，為了令拍攝過程順利，事前做足功課，沿途為「阿姐」導賞，「因為我從來未踏足過摩洛哥，而喺節目裏面我需要沿途向阿姐介紹摩洛哥不同景點，所以出發前我花咗好多時間去做功課。全程8日，每日行程都幾緊密。」
要數最好玩的地方，他首選撒哈拉沙漠，「我哋喺沙漠參加咗一個營火晚會，亦有騎駱駝去睇日出。騎駱駝其實一啲都唔容易㗎，因為需要有幾好嘅平衡力，同埋駱駝行走時，要捉實駱駝鞍，但全程有人睇實，都安全嘅，最大挑戰係上落駱駝嗰一刻，因為駱駝喺跪低同起身嘅瞬間，感覺係有少少坐過山車嗰種離心力。不過騎住駱駝喺沙漠中暢遊，確實係一次好寫意嘅經驗。」
四大古城打卡
沙漠以外，他和阿姐又穿梭當地著名的紅、黃、藍、白四色古城，「我哋去咗白色城巿卡薩布蘭卡、藍色小鎮舍夫沙萬、以黃色為主嘅古王城菲斯，及紅色城市馬拉喀什。每個城市都有唔同嘅特色，好似卡薩布蘭卡係一個現代城市，而古城菲斯嘅染坊布滿大大小小好多染缸，見識到好多當地傳統嘅染布工序，不過啲氣味都相當『獨特』。而大城市馬拉喀什，除咗有現代嘅建築同埋好衝擊嘅色彩之外，亦有好重嘅歐洲氣息。
「講到人氣景點就一定係舍夫沙萬，嗰度係一個藍色嘅城鎮，周邊環境真係好靚，會感受到一種慢活，非常輕鬆同舒服。山城周圍都會見到好多貓，因為摩洛哥係一個伊斯蘭教嘅國家，相信貓係聖潔，所以當地人對貓非常友善，我哋喺舍夫沙萬仲特登買咗啲嘢食去餵貓。」
市集地道風情
除了打卡景點，他們亦遊走不同城巿的巿集，「好多巿集售賣嘅工藝品都好相似，如釉下彩塔吉陶鍋，同馬賽克製品等，但不同地區的巿集，亦會找到當地獨有的產品，如菲斯就好多染色皮革，馬拉喀什售賣的產品就以色彩為主，亦因為係大城巿，好多人放工後都到巿集玩，路邊有好多攤檔、攤位遊戲，可以話係一個巨型版嘅香港廟街。」
他稱在摩洛哥不同地區，都能輕易感受到當地人的熱情，「去到唔同嘅巿集，嗰度啲檔主都好熱情地招待，成日都會聽到佢哋用一啲亞洲語言同我哋打招呼，又估我哋係邊個國家嘅人。其中一日我哋去咗一個城鎮歐薩薩Ouarzazate，當地可以話係摩洛哥嘅荷李活，好多歐美嘅電影劇集喺嗰度取景，而且仲係柏柏爾人聚居地，我哋仲探訪咗一個家庭，加深認識到佢哋嘅獨特文化。旅程還探訪了穆斯林世界一間相當重要嘅清真寺，入到去感受到一種獨特嘅寧靜。」
阿姐催淚驚喜
途上阿姐汪明荃不時向阮浩棕送上驚喜，如製作藤籃時，見他繡上心形圖案，即問：「你心度掛住個人吖嘛！做人一個心好喇！唔好整咁多心！」之後在巿集，阿姐又追問他：「使唔使買啲嘢俾女友？」，行程尾段，阿姐更用Al將二人合照裏的自己，生成阮浩棕的已故嫲嫲「上等人」梁舜燕，讓「嫲孫」能夠一起同遊摩洛哥，並配上梁舜燕的語音說出：「好開心，I Love You」，效果震憾，阮浩棕睇片後當場感動得哭成淚人。他坦言整個旅程，阿姐都好專業，「成個旅程好熱、好多車程，但阿姐從無半句怨言，其敬業樂業同堅毅嘅精神令我獲益良多。而我出發前亦預先學習咗《帝女花》其中一節《香夭》，在途上和她一起唱。」
雖然此行長時間保持着工作mode，但阮浩棕除了得到阿姐金石良言的專業指導和鼓勵，還有催淚溫情的驚喜，他說：「今次摩洛哥之旅，確實係相當難忘！」
延伸內容：阿姐汪明荃逼供阮浩棕跟何沛珈戀情 自揭被周潤發嚇親 分享跟老公羅家英養生之道
《東周網》訪談系列節目《星桄伴我心》12月重磅嘉賓：
即睇：「海馬」老闆鄔友正因翁嘉穗重病痛哭 妙論太太係老虎乸 徙置區小子創富路
即睇：佘詩曼公開美魔女育成秘笈 感傷最後道別許紹雄 驚險慈母心臟停頓20秒
即睇：喬宏96歲遺孀小金子 靠神迹戰勝子宮頸癌 爆喬宏墮機沉船撞車生死刧 靈魂出竅奇異經歷 二人洗手盆見證愛情真諦
立即追蹤《東周刊》全新WhatsApp頻道，緊貼全城熱話、突發猛料、獨家消息！
